Read Boros Dusun John 9 Bible Online

John 9 - Boros Dusun bible

John 9

¹Tontok di manau-panau i Yesus, om kokito no dau o tulun di bolou do mantad di kosususu.

²Om uhoto' no di tumatanud di Yesus, i Yesus. Boros ka diyolo', “Guru, nokuro tu' bolou mantad iti tulun di pogkosusuo' i'? Iri tuu nokowonsoi iyau'd dusa o nokobungou dau ko' iri po i dusa di molohing dau?” ka diyolo'.

³Om boros ka di Yesus do suminimbar, “Okon i' ko' i dusa dau ko' dusa po di molohing dau o nokobolou dau, suwai ko' iti nopo om popokito nod tulun di koimayaan di Kinorohingan noo o milo'd momonsoi dot id tinan do tulun diti.

⁴Mositi' no do momonsoi toko' do karaja' di minonuhu' doho' do maso pod anawau. Tu' tumuong i' motindo om aiso' no o tiso' pod tulun do milo'd kumaraja'.

⁵Iyoho' no o tanawau do hiti'd pomogunan, do solinaid ku po do hiti'd pomogunan,” ka dau.

⁶Om koboros poddi di Yesus o miagal diri om pomodula' no iyau do hiri'd tana', om piunango' no dau di tana' i dula' dau. Om polihuto' nogiddi dau i tana' di nounang diri do hiri'd mato di tulun diri.

⁷Om boro-boros no i Yesus dot id tulun diri, “Ongoi ponginglagup do hilo'd Kulam do Siluam,” ka. (Komoyon nopod boros do “Siluam” om “sinuhu'”.) Om ongoi no i tulun diri ponginglagup. Om di nopoddi guminuli' iyau, om kokito noddi iyau.

⁸Om oinsanan nopoddi i hiri'd songkoduwo di tulun diri, om i tulun di nokokito dau do mokipuhawang di gulu po do minomoros dot, “Okon toi ko' ilo' i tulun dit oubas do poirikau do mokipuhawang diri?” ka.

⁹Om haro'ddi ot id pogialatan diyolo' do minomoros dot, “Ilo' nogi' kopio iri,” ka. Nga' haro i' o momoros dot, “Okon, ilo' nopo om koiyo-iyo no di tulun diri,” ka. Nga' boros ka di tulun diri, “Iyoho' nogi' bo iri,” ka.

¹⁰Om boros ka diyolo' dot id dau, “Poingkuro kopio tu' kokito ko noddi?” ka diyolo'.

¹¹Om boros ka dau, “Minongunang do tana' dot okooro' i tulun di roitan dot i Yesus, om polihuto' nogiddi dau dot id mato ku, om boro-boros no, ‘Ongoi ponginglagup do hilo'd Kulam do Siluam,’ ka. Om ongoi oku noddi. Om tontok di minonginglagup oku, om kokito oku noddi,” ka dau.

¹²Om ponguhot po iyolo' dau, “Hinonggo noddi ino tulun?” ka. Om boros ka dau, “Uka, a' oku no koilo,” ka.

¹³Tadau nopo di minongunang i Yesus do tana' do dula' dau o pinongunang, do pinopoungkalat di tulun do bolou'ddi, om nokoontok no do tadau'd Sabat. Om ngoyo' noddi i tulun do bolou di nolingasan diri posolowoto' di tulun do Parisi.

¹⁵Om iyolo' nogi' nga' minonguhot i' dau ondung poingkuro iyau do nokokito. Om boros ka dau, “Linihut dau do burutak iti mato ku, om ongoi oku noddi ponginglagup om kokito oku noddi,” ka dau.

¹⁶Om haro'ddi o piro-piro di tulun do Parisi do minomoros dot, “Okon i' kopio ko' mantad id Kinorohingan i tulun di minomonsoi'd miagal dino, tu' a' i' iyau momusou do tadau'd Sabat,” ka. Nga' boros ka di piro-piro tulun do suwai, “Poingkuro tuu kopio o tulun do kidusa do momonsoi do kongoimayaan do miagal diti?” ka. Om mogisuwai-suwai nopoddi o poboroson diyolo'.

¹⁷Om uhoto' po kawagu di tulun do Parisi i tulun diri, “Poingkuro o diya'd tosorou do pasal di tulun do pinopoungkalat do mato nu?” ka. Om boros ka di tulun diri, “Iyau nopo om nabi,” ka.

¹⁸Nga' a' i' i piro-piro boyoon do tulun do Yohudi monongkuyaan do bolou i tulun diri do mantad di kosususu, om kokito noddi do tontok diri. Om lohowo' noddi diyolo' i molohing di tulun diri,

¹⁹om uhoto' no dot, “Otopot nogi' dot iti i tanak dokoyu di bolou do mantad di nosusu i'? Poingkuro'ddi tu' kokito iddi iyau do baino'?” ka diyolo'.

²⁰Om boros ka di molohing di tulun diri do suminimbar, “Iti nogi' kopio i tanak dahai; om otopot i' do bolou iyau do mantad di kosususu.

²¹Nga' a' i' iyahai koilo ondung poingkuro'ddi iyau'd nokokito diti baino'. Om a' iyahai koilo ondung isai i pinopoungkalat do mato dau. Nga' uhoto' nopo ilo' tu' agayo no'lo'; om milo no do mimpori-pori'd sumimbar,” ka diyolo'.

²²Iyo pogiddi o pinoboros di molohing di tulun diri nga' ooris iyolo' di piro-piro boyoon do tulun do Yohudi; tu' nokopogipapakat no iyolo' dot isai nopo o tulun di momoros dot i Yesus o Raja' do Gampamasi om a' no koino-ino do sumuang di walai'd sasambayangan.

²³Om iri no o kinapabarasan di molohing di tulun diri dot, “Agayo no'lo'; om uhoton nopo dokoyu iyau,” ka.

²⁴Om lohowo' poddi kawagu diyolo' i bolou daa di gulu po, om barasai nod poingkaa, “Sumpa' no do popoboros ko dit otopot. Oilaan i' dahai do kidusa i tulun diri,” ka.

²⁵Om boros ka di tulun diri do suminimbar, “Kidusa tuu ko' aiso' i tulun diri, nga' a' oku i' koilo. Nga' iso' noo o toilaan ku tu' nopo di gulu po om bolou oku, nga' baino' noddi om kokito oku no,” ka dau.

²⁶Om uhoto' po kawagu diyolo' iyau, “Nunu o winonsoi dau dot id diya'? Poingkuro iyau do pinopoungkalat diya'?” ka diyolo'.

²⁷Om boros ka di tulun diri do suminimbar, “Nosusui ku nori dot id dokoyu nga' a' kou i' minokinongou. Om nokuro daa tu' sirongou kou po kawagu? Orohian kou i' daa iyokoyu do sumiliu'd tumatanud dau?” ka.

²⁸Om papalai noddi diyolo' iyau om boro-boros nod, “Iya' i tumatanud dau; okon i' ko' iyahai! Iyahai nopo om tumatanud i' di Musa.

²⁹Oilaan i' dahai do Kinorohingan o minoro-boros dot id di Musa. Nga' iri nopo tulun diri, om a' i' iyahai koilo ondung honggo o tadon,” ka diyolo'.

³⁰Om boros ka di tulun diri, “Suwai no kopio dot a' kou koilo ondung honggo o tadon di tulun diri, om nokoungkalat no dau o mato ku, gisom do kokito oku noddi.

³¹Oilaan toko' i' do tulun nopo di kidusa om a' i' do Kinorohingan pokinongohon, suwai ko' iri no i tulun di momusou'd Kinorohingan om i momonsoi'd korohian dau o pokinongohon dau.

³²Mantad poddi kinoimpuunon diti pomogunan om a' po nokoumbal do haro o nakahabar do tulun di milo do popoungkalat do mato do tulun di bolou do mantad di kosususu.

³³Ondung okon ko' mantad id Kinorohingan i tulun diri, om a' i' daa iyau milo do momonsoi'd nunu nopo,” ka dau.

³⁴Om boros ka diyolo' do suminimbar, “Nunu hoi? Monuduk kopio ko daa dahai, iya' i' noponu'd dusa do mantad di kosususu?” ka. Om mantad poddi om a' no iyau posolokoyon di walai'd sasambayangan.

³⁵Om korongou no di Yesus dot a' noddi diyolo' posuangon di walai'd sasambayangan i tulun diri. Om ngoyo' noddi dau ihumo' i tulun diri om boro-boros nod, “Monongkuyaan ko i' di Tanak do Tulun?” ka.

³⁶Om boros ka di tulun diri, “Isai i tulun diri, oi Tuan? Sunudai oku daa, om otumbayaan oku indo dau,” ka.

³⁷Om boros ka di Yesus, “Nokokito ko no dau. Om iyau no i monokiboro-boros diya' do dinondo,” ka.

³⁸Om boros kaddi di tulun diri, “Otumbayaan oku i' oi Tuhan,” ka. Om otud noddi iyau dot id toguang di Yesus.

³⁹Om boros ka di Yesus, “Kinorikatan ku nopo do hiti'd pomogunan om mongoi pomutus; om kokito indo i tulun do bolou, om obolou i tulun di kokito,” ka dau.

⁴⁰Om haro'ddi o piro-piro di tulun do Parisi di hiri do nokorongou di Yesus do minomoros do miagal diri, om uhoto' no diyolo' iyau, “Do komoyon nu i' pama iyahai'd bolou?” ka diyolo'.

⁴¹Om boros ka di Yesus do suminimbar, “Ondung bolou kou daa, om a' kou nogi' kidusa. Nga' i minomoros kou do, ‘Kokito i' iyahai,’ ka, o popointalang kopio do kidusa kou po,” ka dau.