Read Boros Dusun 2 Corinthians 1 Bible Online

2 Corinthians 1 - Boros Dusun bible

2 Corinthians 1

¹Oi tobpinai-tobpinai, i sidang do Kinorohingan do hiti'd Korintus om koinsanai'd tulun di songonuon do Kinorohingan do pointongkop do watas dot Akaya. Iyoho' no i Paulus i sinuhu' di Kristus Yesus, iyoho' i pinili' do tumanud do korohian do Kinorohingan, om i Timotius i tobpinai toko',

²o mogondos do Kinorohingan, i Tapa' toko', om Tuhan Yesus Kristus do manahak dokoyu do barakat om kosimbayanan do ginawo.

³Royohon no o Kinorohingan, i Tapa' do Tuhan toko' i Yesus Kristus. Iyau no o Tapa' dit osonong kopio, om iyau o Kinorohingan di manahak do tulun do ginawo dit ogirot.

⁴Popogirot kasai' i' iyau do ginawo dahai do pointikid-tikid dot oontok iyahai do kosusaan, om iri no i kokorisan dit aanu dahai do mantad id Kinorohingan diri o komilo-milo dahai do popogirot do ginawo do koinsanai'd tulun dit id suang do kosusaan.

⁵Om iri nogi' i koinggoritan di nongoumbalan do Kristus nga' asaru' no dahai dot ongoumbalan. Om kogirot o ginawo dahai, do Kristus o popogirot.

⁶Om ondung oontok iyahai do kosusaan om iri nopoddi om popogirot no do ginawo dokoyu om mamasi dokoyu. Tu' ondung ogirot o dahai'd ginawo, om iyokoyu nogi' nga' kotonggoi no dot ogirot, om alanut indo o ginawo dokoyu dot id suang kou piya do kosusaan do miagal di kosusaan di noumbalan dahai.

⁷Otumbayaan kasai' i' iyahai om a' koumbal do mikoduwo o ginawo dahai do kosorou do pasal dokoyu, oi tobpinai-tobpinai, tu' oilaan i' dahai do nokotonggoi kou dahai do noinggorit, om iri no o kokuwaan do kotonggoi kou nogindo dahai dot ogirot o ginawo.

⁸Oi tobpinai-tobpinai! Orohian iyahai do koilo kou di kosusaan di nongoumbalan dahai di hilo' iyahai id watas dot Asia. Om a' no ogina-gina' o kawagato' di koinggoritan diri, gisom dot a' no dahai osorou dot apasi po iyahai;

⁹dot iyo nopoddi norotuan nod hukuman do kapatayon o kopurimanan dahai. Nga' nosiliu pogi' o miagal diri nga' poposorou dahai dot a' sumondiu di dahai'd kokorisan suwai ko' sumondiu do Kinorohingan, i mamasi kawagu do tulun do napatai.

¹⁰Om iyau no o pinopoidu' dahai do mantad id koligagaanan do kapatayon do miagal diri kagayo. Om iyau nogindo o mamasi dahai do koimbagu, tu' iyau no o pagandasan dahai.

¹¹Om otumbayaan iyahai do poiduwon pondo kasai' iyahai do Kinorohingan do mantad id koligagaanan, tu' sumambayang kou i' do bagi' dahai, om orohian i' o Kinorohingan do mamarakat dahai, tu' sumimbar iyau di sambayang dit ogumu' no do bagi' dahai om ogumu' nondo o tulun do mongunsikou do Kinorohingan.

¹²Oondos no kopio iyahai, tu' pogiroton i' iyahai di kopurimanan do ginawo dahai do koposi-posion nopo dahai do hiti'd pomogunan diti --- dot okon-okon pondo i kopiisaan dahai dot id dokoyu --- nga' nowonsoi no dahai do mikuwo'd otulid o ginawo, om iso-iso' kopio o ginawo. Om winonsoi dahai iri nga' okon i' ko' mantad id toilaan do tulun, suwai ko' mantad id toilaan di pinatahak do Kinorohingan dot id dahai.

¹³Tu' iri nopo tinulis dahai dot id dokoyu om iri no i milo dokoyu'd basaon om it osuhutan dokoyu. Tu' dinondo nopo om a' kou po koilo ngai' no do pasal dahai. Nga' mogondos oku do koilo kou i' kopio do pasal dahai do koimbagu. Om oondos kou indo dot iyahai o kaandasan dokoyu do tontok di korikatan kawagu do Tuhan Yesus, do miagal dahai tu' oondos dot iyokoyu o kaandasan dahai.

¹⁵Om iri no i kotumbayaan ku'ddi o nokopomusarahan ku do mongoi solowot dokoyu di timpuun i', om kaanu kou indo do barakat dit induwo kopiluap.

¹⁶Tu' osorou ku daa do mumbaya' oku do hino'd dokoyu di paangayan ku do hilo'd Makidunia om mumbaya' oku no kawagu do hino'd dokoyu di pogulian ku do mantad hilo', om milo kou i' do monulung doho' do mamanau oku'd lumombus do hilo'd Yudia.

¹⁷Nga' nowolihan ku noddi i nosorou ku do miagal diri, om popointalang tuu'ddi dot a' nopo oila-ilaan o korohian ku? Tumanud oku tuu do doho'd korohian do tontok di momusorou oku dit apatut ku'd wonsoyon, tu' momoros oku no dot, “Oo,” ka, om koimbagu no om momoros oku nod, “Amu',” ka?

¹⁸Id suang do ngaran do Kinorohingan, i milo do ponongkuyaanan, do poboroson ku no dot iri nopo i batos ku dot id dokoyu'ddi om okon i' ko' it, “Oo,” ka; om koimbagu nopondo, om momoros nod, “Amu',” ka.

¹⁹Tu' i Yesus Kristus nopo, i Tanak do Kinorohingan, i nokosusui dot id dokoyu do pinosusui di Silas, om i Timotius, om i pinosusui ku iyoho', om okon i' ko' momoros dot, “Oo,” ka, om koimbagu nondo om momoros nod, “Amu',” ka. Tu' iyau nopo om ponokoponimbar dot, “Oo,” ka nopo do mantad id Kinorohingan.

²⁰Tu' i Yesus no o pinawayaan do Kinorohingan do minomoros dot, “Oo,” ka, dot id koinsanai di pinabatos dau. Om iri no o poimpahan toko' do momoros dot id Kinorohingan dot, “Amin,” ka, tu' i Yesus Kristus no o kapamarasan toko' do miagal diri. Om iyo pogiddi o wonsoyon dahai nga' orohian iyahai do koinggayo o Kinorohingan.

²¹Kinorohingan no o pinopogirot do kopiisaan dahai om kopiisaan dokoyu dot id Kristus; om iyau nogi' o minomili' dati' do pinotobilang do maan do dau'd songonuon.

²²Om iri noddi o kinoponontuan do Kinorohingan om kinopogiratan kopio dau do sumiliu toko' do songonuon dau, om pinosuang dau o Rusod dau dot id ginawo toko' do maan do pamajamin do patahakon nondo dau dati' o koinsanai di pinabatos dau.

²³Om Kinorohingan no o sasi' ku --- tu' koilo i' iyau dot id suang do ginawo ku --- dot a' oku abayaan do mongoi do hino'd Korintus, tu' mada' oku do tumongob kou.

²⁴Om a' oku i' mononsog dokoyu, do pasal do nunu ot apatut dokoyu'd ponongkuyaanan, tu' notumbayaan kou no kopio do Kristus. Suwai ko' muhup oku no toomod dokoyu do kumaraja', om oruhangan i' o kataadan dokoyu.