Read Boros Dusun 2 Corinthians 12 Bible Online

2 Corinthians 12 - Boros Dusun bible

2 Corinthians 12

¹Atantu' no dot aiso' i' o kountungan ku dot oondos. Nga' oondos oku i' di pinoilaan do Kinorohingan dot id doho' dot id suang do pinointalang, om id pinokitanan.

²Otutunan ku i' o tiso' o tulun do Kristian do pinoinsawat dot id kinoiyonon dit asawat kopio di hilo'd surga, di hopod no om apat o toun do mantad baino'. (Nga' a' i' oilaan ondung tinan kopio dau i pinoinsawat diri ko' pinointalang po toomod --- nga' oilaan id Kinorohingan iri.)

³Om poboroson ku po kawagu i pinoboros ku: Tu' oilaan ku no do pinoinsawat i tulun diri do pinakaa do hilo'd Pirdaus. (Nga' a' ku i' oilaan ondung tinan po tuu kopio dau i pinoinsawat diri ko' pinointalang po toomod iri --- Kinorohingan noo o koilo.) Om hilo' no do nokorongou o tulun diri dit a' nod tulun milo do poboroson om a' o tulun pabanaron do popoboros diri.

⁵Om pasal no di tulun diri o kaandasan ku, om okon i' ko' doho'd tinan o kaandasan ku. Tu' iyoho' nopo om iri no i popointalang do koluhayan ku o kaandasan ku.

⁶Nga' ondung orohian oku dot oondos do nunu nopo, om a' oku i' popimboros dit a' otopot suwai ko' it otopot o poboroson ku. Nga' a' oku i' minggayo-gayo, om aiso' indo o tulun do popoinggayo-gayo doho' ko' mantad di winonsoi ku di nokito dau om i nokoboros ku di norongou dau.

⁷Nga' a' oku i' adalaan do minggayo-gayo dot i pinointalang di koimayaan kopio'ddi o kopinggaya-gayaan ku, tu' haro o toruol dot id tinan ku di pakayon do rogon. Om iri no i toruol diri o pomobog doho' om a' oku i' minggayo-gayo.

⁸Intolu oku no sambayang dot id Tuhan do mokiidu' di toruol diri do mantad id tinan ku,

⁹nga' simbar nogi' o Tuhan do poingkaa, “Osianan oku i' diya' om kabagal nu no i kosianan ku diya'ddi: tu' kointalang nogi' kopio i kogoyoo' do kuasa' ku do tontok dit oluhoi ko,” ka dau. Om iri noddi o kaandasan ku tu' soira' dot oluhoi oku om tontok noddi dot opurimanan ku o Kristus do mongintirung doho' di kokorisan dau.

¹⁰Om otood oku i' do haro piya o koluhayan ku. Om otood oku nogi' dot indaraaton oku piya do Kristus o kopongindaraatan doho'. Om otood oku nogi' do haro piya o kosusaan ku om gusa-gusaon oku piya, om inggoriton oku. Tu' tontok dit oluhoi oku, om tontok nogiddi do kokoris oku.

¹¹Iyo oku no kopio di tulun do basug --- nga' iyokoyu i' o nokobungou doho' do miagal diri. Tu' otopot nopo kopio om iyokoyu daa ot apatut do mamarayou doho'. Tu' mulong piya dot aiso' o ngaran-ngaran ku nga' a' oku i' kopio aala' di “rasul” dit ongoilo kopio'ddi.

¹²Tu' nokointalang no dot id dokoyu o kongoimayaan om i kongosuayan kopio om i winonsoi di kongoimayaan kopio do mikuwo'd alanut o ginawo do popointalang do tulun kopio oku di sinuhu'.

¹³Nunu po toi ot a' ku napadul dot id dokoyu do pataladon di piro-piro o sidang do suwai? Iti po: it a' oku minonusa' dokoyu do mamalansa' doho'. Ompunai oku no di kasalaan ku'ddi!

¹⁴Kointolu ku nodti baino' do kosodia' do mongoi do hino'd dokoyu, om a' oku i' monusa' dokoyu tu' okon i' ko' i haro dot id dokoyu o korohian ku, suwai ko' iyokoyu. Tu' okon i' ko' tangaanak ot apatut do mogihum do kaakan-akanan do molohing, suwai ko' i molohing ot apatut do mogihum do kaakan-akanan do tangaanak.

¹⁵Om ka pogiddi dot orohian oku do papatahak do nunu nopo dot id dokoyu, om tinan ku piya nga' patahakon ku i'. Ondung miagal diri o kosianan ku dokoyu, om apatut po tuu dot a' kou osianan doho'?

¹⁶A' kou toi kosokodung i' dot a' oku insan ponusa' dokoyu? Nga' haro i' o momoros dot oilo kopio oku kaka do monipu' dokoyu; om manganu oku do kountungan do mantad id dokoyu dot i poninipu' ku dokoyu o ralan ku do manganu'ddi.

¹⁷Nga' poingkuro kopio daa dot osiliu o miagal diri. Nokoumbal oku toi do minanganu do kountungan do mantad id dokoyu dot i tulun di sinuhu' ku o minongoi panganu do mantad id dokoyu?

¹⁸Sinuhu' ku i Titus do mongoi do hino'd dokoyu, om haro nogi' o sinuhu' ku do tulun do Kristian do suwai do tuminanud dau. Haro toi o kountungan do nanu di Titus do mantad id dokoyu? Nga' miagal i' o kobinsuhu' do ginawo dahai do kumaraja'. Om miagal o kowoyo-woyoo' dahai.

¹⁹Osorou nopo doti' dokoyu om solinaid nopodti om maso no dahai do tumotos do pokotopot do tinan dahai dot id dokoyu. Nga' oborulong kou i' do momusorou! Oilaan id Kinorohingan do nunu nopo i pinoboros dahai'ddi om miontok id korohian do Kristus. Om koinsanai di wonsoyon dahai nga' popogirot i' do koposi-posion dokoyu di don rusod.

²⁰Ooris oku do tontok nopondo do mongoi oku do hino'd dokoyu om a' kou indo miagal di soro-sorohon ku. Tu' haro i' dotindo ot id pogialatan dokoyu do mogisosongkiwal om osolon om otogod, om haro doti' i momusorou no do dau'd tinan, om haro o mongindaraat do wokon, om haro i mogisuwai-suwai o korohian om haro o minggayo-gayo om haro i mamagangau.

²¹Om ooris oku do poinsiribaon oku nondod Kinorohingan dot id toguang dokoyu do korikot oku do hino'd dokoyu, om mihad oku nondo dot id toguang dokoyu tu' ogumu' i' ot id pogialatan dokoyu do nokowonsoi'd dusa di gulu, om aiso' i' o kinosimbanon di kowoyo-woyoon diyolo', om a' iyolo' ruminologo di wonsoyon diyolo' di magampahu', om i kososomu' om it a' ongosonong.