Read Boros Dusun 2 Corinthians 2 Bible Online

2 Corinthians 2 - Boros Dusun bible

2 Corinthians 2

¹Iyo nopoddi om nokopomusorou oku no kopio dot a' oku nondo kawagu mongoi olimbuha' dokoyu dot ondung popotongob oku no dokoyu.

²Tu' ondung popotongob oku dokoyu, om isai poddi o monginsasamod doho', dot okon ko' iri kasai' i tulun di pinotongob ku?

³Om iri no o kinoponulisan ku di surat diri dot id dokoyu. Tu' a' oku i' mongoi pogolimbuha' dokoyu dot ondung popotongob kou no doho', om iyokoyu nogi' daa it apatut do popotood doho'. Tu' oilaan ku no kopio dot ondung otood oku om iyokoyu ngai' nga' kotonggoi indo dot otood.

⁴Tu' tontok nopod minonulis oku di surat diri om awagat tomod om osusa' o ginawo ku om monuru' po o romou ku. Nga' okon i' ko' poposusa' do ginawo dokoyu o kinoponulisan ku'ddi suwai ko' popoilo oku dokoyu dot osianan kopio oku dokoyu.

⁵Nga' ondung haro o tulun do pinotongob dot isai nopo, om okon i' ko' winonsoi dau iri dot id doho', suwai ko' winonsoi dau iri dot id piro-piro o tulun dot id pogialatan dokoyu, om a' oku i' orohian do monogod kopio dau.

⁶Tu' ula' no i nihukum di tulun dot ogumu' di tulun di minomonsoi do miagal diri.

⁷Om baino' nopo om mositi' no dot ompunan dokoyu i tulun diri, om insasamadan no iyau om a' i' iyau adalaan do tumongob gisom dot aiso' nondo o kokoyo-koyoon do pomusarahan dau.

⁸Iyo nopoddi om suhuon ku no kopio iyokoyu do popoilo kopio dau dot otopot i' dot osianan kopio kou dau.

⁹Tu' iri no o kinoponulisan ku di surat diri dot id dokoyu tu' pongilo kopio ku dokoyu ondung tumanud kasai' kou po di ponudukan ku.

¹⁰Ondung mangampun kou do tulun di nakasala' dot id dokoyu, om iyoho' nga' mangampun nogi' di tulun diri. Tu' nunu nopo i noompunan ku dot ondung haro no it apatut dot ompunan --- om ompunan ku i' iri dot id toguang do Kristus do koinsanangan dokoyu.

¹¹Winonsoi ku pogi' o miagal diri nga' mada' oku do haro o ralan do rogon do momorinta' dati' tu' noilaan toko' no i natantu' mantad di rogon do wonsoyon dau.

¹²Om tontok di nokorikot oku do hilo'd Troas do minongoi poposusui do Habar dot Osonong do pasal do Kristus, om noiwangan nod Tuhan o ralan ku do kumaraja' dot id kinoiyonon diri.

¹³Nga' a' nopo osimbayan o ginawo ku tu' a' oku nokosolowot di Titus, i tobpinai toko' do hilo'. Om pongintod-intod oku noddi di tulun do hiri, om pakayaai ku no do hilo'd Makidunia.

¹⁴Nga' pounsikou nod Kinorohingan! Tu' woyoon kasai' i' iyahai dau do tumanud di posukan di Kristus di nakamanang, tu' poimpasi i' iyahai do poingiso' do Kristus. Pinakai nogi' iyahai do Kinorohingan do popotongkop di habar do pasal do Kristus do miagal do tawau dit osonong o kosingudan tu' tumongkop do hinonggo-honggo nopo.

¹⁵Tu' iyahai nopo om miagal do tawau do kominyan dit osonong o kosingudan, i tutudan do Kristus do patahakon dot id Kinorohingan. Id tulun nopo di kumaa no dot id karaagon, om iyo iyahai di tawau do kapatayon di mamatai; nga' id tulun nopo di maso do posion om iyahai nopo om miagal di tawau dit osonong o kosingudan di papakaa dot id koposion. Iyo nopoddi om isai o kowonsoi ngai' di karaja'ddi?

¹⁷Om okon i' ko' miagal iyahai di kogumuan do tulun di mongigit diti habar do mantad id Kinorohingan do miagal no di dapu' di dagangon. Nga' iyahai nopo tu' sinuhu' do Kinorohingan om osonong i' o kapamansayan dahai'ddi, okito id Kinorohingan do posusui iyahai di habar diri do miagal do susuhuon do Kristus.