Read Boros Dusun 2 Corinthians 3 Bible Online

2 Corinthians 3 - Boros Dusun bible

2 Corinthians 3

¹Iyo nopoddi, om mamarayou tuu'ddi iyahai do tinan dahai do miagal diri? Ko' minog tuu'ddi iyahai do haro o surat do pamarayou do pokoyoon dot id dokoyu ko' mantad id dokoyu do miagal do tulun do suwai tu' kisurat do pamarayou?

²Nga' iyokoyu no o surat di pamarayou dahai, i pointulis dot id ginawo dahai om it oilaan om it abasa' do pointikid-tikid do tulun.

³Om okito no diyolo' dot iyokoyu no o miagal do surat di tinulis do Kristus i pinokirim dau do pinoigitan dahai. Nga' okon i' ko' i dawat o pinonulis di surat diri, suwai ko' i Rusod do Kinorohingan di poimpasi, om okon i' ko' tinulis do hiri'd watu di ponunulisan, suwai ko' hiri'd ginawo'd tulun.

⁴Koboro-boros nopo dahai do miagal diti nga' ogirot i' kopio o pogogondos dahai dot id Kinorohingan dot i Kristus o kapagandasan.

⁵Tu' aiso' i' o nunu-nunu do poimpahan dahai do popoboros do koilo iyahai do momonsoi do karaja'dti, nga' Kinorohingan i' o manahak dahai do komiloo' do momonsoi'dti.

⁶Tu' iyau no o minanahak dahai do komiloo' do sumiliu do susuhuon di tumpongo do wagu, i tumpongo di poingimpou di Rusod do Kinorohingan, om okon i' ko' poingimpou dit oturan di tinulis. Tu' iri nopo i tinulis om papakaa no dot id kapatayon, nga' Rusod nopod Kinorohingan om manahak do koposion.

⁷Tontok nopo di winonsoi om pinokikir do hiri'd watu i Tourat di papakaa dot id kapatayon diri om titiu no o tulinau do Kinorohingan di kosorong kopio dot id rabas di Musa. Iri nopo i tulinau'ddi nga' kosorong no kopio gisom dot a' no kasaap do montong di rabas di Musa i tulun dot Israil do mulong piya do tontok nopoddi om tumimpuun no do tumanus i tulinau'ddi. Om ondung miagal diri o kogoyoo' di kagayaan do pinorikot do tontok di pinatahak i Tourat di papakaa dot id kapatayon diri,

⁸om okon-okon pondo o kogoyoo' do kagayaan di poimpuunon i tumpongo di pinatahak do Rusod do Kinorohingan.

⁹Tu' ondung miagal diri o kagayaan di Tourat di momohukum do tulun diri, om okon-okon pondo o kogoyoo' do kagayaan di tumpongo di popoulud do tulun dot id Kinorohingan.

¹⁰Nga' milo nod poboroson dot iri nopo i kagayaan di gulu po om aiso' no o kagayaan do baino', tu' notori' no di kagayaan di dinondo.

¹¹Tu' ondung kikagayaan it oruhai'd tumanus, om okon-okon pondo o kagayaan dit a' tumanus do gisom do poingompus.

¹²Om iri noddi o katama-tama' dahai do popoboros do miagal diti tu' miagal no kopio'ddi o soro-sorohon dahai.

¹³Om iyahai nopo om a' i' miagal di Musa tu' minonirung do rabas dau do mada' dot okito di tulun dot Israil do tumanus i tulinau do Tuhan dot id rabas dau.

¹⁴Om poinsompon noddi o pomusarahan diyolo'. Om gisom piya do baino' nga' poinsompon kasai' poddi di pinonirung o pomusarahan diyolo' di tontok di minambasa' iyolo' di piro-piro o buuk di pinotulisan di tumpongo di laid diri. Nga' oidu' nopo i nokotirung diri om koiso' o tulun dot id Kristus.

¹⁵Om dinondo piya nga' poinsompon kasai' i' di pinonirung o pomusarahan diyolo' do tontok di mambasa' iyolo' di Tourat di Musa.

¹⁶Nga' ondung haro o tulun do tumimbaba' do Tuhan, om iduwon indo i pinonirung diri do mantad id rabas di tulun diri.

¹⁷Komoyon nopod Tuhan di pinoboros do hiti om iri i Rusod. Om hinonggo nopo o haro o Rusod do Tuhan om hiri no do haro o kosimbayanan, om aiso' o kokogos.

¹⁸Baino' nopoddi om oinsanan toko' nopo dot a' tirungon o rabas, om iyati' no o popotitiu di tulinau do mantad id Tuhan Yesus. Om iri no o poposimban kasai' do kowoyo-woyoon toko' do miyo dau. Om marang-tarang i' o tulinau toko'. Iri nopo i tulinau'ddi om mantad i' dot id Rusod, om iri nopo i Rusod diri om Tuhan i'.