Read Boros Dusun 2 Corinthians 8 Bible Online

2 Corinthians 8 - Boros Dusun bible

2 Corinthians 8

¹Oi tobpinai-tobpinai, orohian iyahai do popoilo dokoyu do kosonongo' do Kinorohingan dot id piro-piro sidang do hilo'd Makidunia.

²Noontok no iyolo' do piro-piro o kosusaan dit angawagat di mogumbal daa diyolo'. Nga' maso piya diyolo' dot id suang do kosusaan diri, nga' otood i' iyolo' om opuhawang kopio do manahak do maan do ponulung do tulun do suwai, do mulong piya do mosikin kopio iyolo'.

³Om katama' oku no do popoboros dot iyolo' nopo om papatahak nopo do songkuro nopo i milo diyolo' do patahakon, om haro nogi' dot ogumu' ko' iri o patahakon diyolo'. Om aiso' i' o monuhu' diyolo'ddi,

⁴nga' pokionuo' nopo kopio diyolo' dot id dahai, do muhup iyolo' do manahak do maan do ponulung di tulun di songonuon do Kinorohingan di hilo'd Yudia.

⁵Om ogumu' i' ko' i nosorou mantad dahai i pinatahak diyolo'. Nga' id gulu nopo kopio om pinatahak diyolo' o tinan diyolo' dot id Tuhan, om patahako' nogiddi diyolo' dot id dahai, do tumanud di korohian do Kinorohingan.

⁶Om iri no o kopongodsuuran dahai di Titus --- i minonimpuun do karaja'dti --- do popotilombus diti karaja' dot osonong dot id pogialatan dokoyu.

⁷Iyokoyu nopo om kaya' do koinsanai do nunu nopo: Kaya' kou dot id suang do kotumbayaan, om toilaan do mimboros, om kaya' kou do toilaan, om aparu' kou do momonsoi do nunu nopo. Om agayo o kosianan dokoyu dot id dahai. Iyo nopoddi om kumaparu' kou no kopio iyokoyu dot id suang do karaja' dot osonong diti.

⁸Okon i' ko' poboroson ku iti om silihon dot oturan. Nga' popoilo oku no do poingkuro o kogoyoo' do ginawo do tulun do suwai do monulung do wokon, om orohian oku nogi' do koilo ondung songkuro no o kogoyoo' do kosianan dokoyu.

⁹Nokoilo kou no do kosianan kopio toko' di Yesus Kristus i Tuhan toko'. Tu' mulong po do kaya' iyau nga' suminiliu i' iyau do mosikin do maan do koinsanangan dokoyu, om kaya' kou i' dot i komosikino' dau o papakaya' dokoyu.

¹⁰Osorou ku nopo iyoho' om tontok no do maso'dti do pootuson dokoyu i karaja' di notimpuunan dokoyu di toun di nakatalib. Tu' iyokoyu no o gulu kosorou do momonsoi do miagal diri. Om iyokoyu o minonimpuun do minomonsoi di karaja'ddi.

¹¹Iyo nopoddi om potilombuson no dokoyu i karaja'ddi do miagal di timpuun kou i' do minomonsoi tu' agayo o ginawo dokoyu do mangatur diti karaja'dti, om iyo noddi do gisom dot opongo do tumanud di songkuro nopo i milo dokoyu do wonsoyon.

¹²Ondung osinggawa' o ginawo dokoyu do manahak om romiton no do Kinorohingan i pinatahak dokoyu'ddi do tumanud di haro dot id dokoyu, om okon i' ko' it aiso' dot id dokoyu.

¹³Okon i' ko' koboro-boros ku do miagal diti om popoidu' oku do tulun do suwai do mantad id tonggungan diyolo'. Om papawagat oku do tonggungan dokoyu. Nga' ongosima' kou i' do dinondo, om apatut id manahak kou diyolo' i haro o kokurangan. Om soira pondo do haro o kokurangan dokoyu iyokoyu, om osima' iyolo', om iyolo' nondo o monulung dokoyu. Om kopitulung-tulung kou indo.

¹⁵Tu' nokotulis no dot id Buuk do Kinorohingan o poingkaa, “I tulun dit ogumu' o naanu nga' a' i' adalaan kosima', om i tulun dit okuri' o naanu nga' aiso' i' o kokurangan,” ka.

¹⁶Mongunsikou no kopio iyahai'd Kinorohingan tu' pinaparu' dau i Titus do monulung dokoyu do miagal dahai.

¹⁷Tu' okon nopo ko' agaan noo o ginawo di Titus do momonsoi di ponuhuan dahai, suwai ko' agayo nogi' kopio o ginawo dau do monulung dokoyu gisom do tontuo' nopo dau dot iyau o mongoi do hino'd dokoyu.

¹⁸Om pinatanud nogi' dahai di Titus o songulun o tobpinai di pusohon kopio do koinsanai do sidang dot i karaja' dau do popinsusui do Habar dot Osonong do mantad id Kinorohingan o kopomusahan.

¹⁹Om iri nogi' i tulun diri o nopili' om tinantu' do sidang do mongoruhang dahai do mimpanau do popingatod di ponulung diri, om koinggayo indo o Tuhan. Om kokito kou indo do kogoyoo' do ginawo dahai do monulung.

²⁰Om antaan-taan i' kopio dahai om aiso' indo o tulun do papasala' do papatahak iyahai di maan do ponulung dot irad kopio'ddi kogumu'.

²¹Korohian nopo dahai om otulid o wonsoyon dahai dot okon nopo ko' id toguang do Tuhan, nga' id toguang nogi' do tulun.

²²Potonudon nogi' dahai di Titus om i tobpinai di komoyon dahai'ddi o songulun o tobpinai'd suwai. Tu' asaru' no dahai dot umbalan iyau, om nokointalang no kopio dot orohian iyau do monulung. Om baino' noddi om okon-okon po o kogoyoo' do ginawo dau do monulung dokoyu tu' monongkuyaan kopio i' iyau dokoyu.

²³I Titus nopo, om tambalut ku, i muhup doho' do kumaraja' do monulung dokoyu. Om ilo' no duwo o tobpinai do manud-tanud dau om sinuhu' di piro-piro sidang, om osiliu i' iyolo' do kaandasan do Kristus.

²⁴Om mogondos iyahai do pointalangon dokoyu o kosianan dokoyu dot id diyolo', om ongkoilo indo o koinsanai'd sidang dot osianan kou diyolo'. Om ongkoilo iyolo' di kapamarayahan dahai dokoyu.