Read Boros Dusun Philemon 1 Bible Online

Philemon 1 - Boros Dusun bible

Philemon 1

¹Oi tobpinai ku i Pilimun, i tambalut om i koruhang dahai do kumaraja'! Iyoho', i Paulus, i poinggiil do Kristus Yesus o nokopogiilan, om i Timotius i tobpinai toko', o monulis diti surat diti dot id diya',

²om id sidang di tumimung do hiri'd walai nu; om id di Apia, i tobpinai toko'd tondu', om id di Arkipus, i koruhang toko' do kumaraja'.

³Mogondos iyahai do Kinorohingan i Tapa' toko' om Tuhan Yesus Kristus do manahak dokoyu do barakat om kosimbayanan do ginawo.

⁴Pointikid-tikid do sumambayang oku om roiton kasai' ku nopo o ngaran nu, oi tobpinai, om mongunsikou oku dot id Kinorohingan.

⁵Tu' nokorongou oku dot otumbayaan kopio ko do Tuhan Yesus om osianan ko do koinsanai di tulun do songonuon do Kinorohingan.

⁶Pokionuon ku nopo dot id sambayang ku, om iti nopo kopogiobpinayan toko', iyati' i notumbayaan, om popoimbulai daa do toilaan dit aralom do pasal do koinsanai di barakat di naanu toko' di nokoiso' toko' di Kristus.

⁷Oi Pilimun i tobpinai ku, otood no kopio o ginawo ku om noodsuur oku di kosianan nu dot id koinsanai di tulun di songonuon do Kinorohingan. Oinsanan nopo i tulun di songonuon do Kinorohingan dot ongotood dot iya' o kataadan.

⁸Iyo nopoddi, om a' oku no ointingayaman do monuhu' diya' do momonsoi dit apatut nu'd wonsoyon, tu' tobpinai oku no diya' dit iso-iso' o kinotumbayaan.

⁹Nga' osianan oku i' diya', om mokianu oku nopo diya'. Iyoho' nopo om nokolohing no om poinggiil oku do dinondo dot i Kristus Yesus o nokogiilan ku.

¹⁰Haro o tiso' o pokionuon ku diya', iyoho' i Paulus o mokianu, do wonsoyon nu dot id di Onisimus, i tanak ku dot id suang do Kristus. Tu' id suang no do giil diti do nosiliu oku dau do tapa' dau dot id suang do rusod.

¹¹Tu' aiso' i' o guna' dau dot id diya' di gulu po, nga' baino' nopoddi om kiguna' noddi iyau dot id diya' dot okon ko' iya' noo nga' iyoho' nga' kiguna' i' dau.

¹²Baino' nopodti om suhuon ku i tulun di kosianan ku'ddi do gumuli' dot id diya'.

¹³Otopot nopo kopio om orohian oku daa do poundorong iyau do poinsugku' doho' do sumowoli diya', om koponguhup i' iyau doho' do solinaid ku do poinggiil dot i poposusui do Habar dot Osonong do mantad id Kinorohingan o kinopogiilan.

¹⁴Nga' a' oku i' momonsoi do nunu nopo dot a' ko po kaakun. Korohian ku nopo om iya' o manantu' do tumanud di kagaanan do ginawo nu; om a' oku i' mononsog diya'.

¹⁵Iri no doti' o kinotongkiadan di Onisimus diya' dot oruhai, tu' asanganu nu indo kawagu iyau do gisom dot alaid.

¹⁶Tu' baino' nopoddi om okon no ko' miagal do turipon nu iyau, suwai ko' osonong po ko' mantad diri. Iyau nga' tulun no do Kristian di kosianan kopio. Om kiguna' kopio iyau dot id doho', om okon-okon pondo dot id diya'. Tu' atantu' no do haro o guna' dau, do miagal do turipon ko' tobpinai dot id suang do Tuhan!

¹⁷Iyo nopoddi, om ondung mambalut kopio ko doho', it oiyo do tulun do Kristian, om romiton no kawagu i Onisimus do miagal dot iyoho' o romiton nu.

¹⁸Om ondung kisala' iyau ko' kiutang po dot id diya', om ookuro dot iyoho' piya o mananggung ngai'ddi.

¹⁹Om tulison ku nopo o miagal diti dot iyoho' kopio o monulis: Iyoho' no, i Paulus o mambayar ngai'ddi. (Atantu' no dot a' no minog do posorohon ku iya' do kiutang ko dot id doho', dot i koposi-posion nu do wagu do nosiliu ko'd tulun do Kristian o tutang nu.)

²⁰Iyo nopoddi, om id suang nod ngaran do Tuhan, do pokionuon kopio ku iya' do monulung doho'. Om potoodo' no o ginawo ku do miagal do tobpinai oku diya' dot id suang do Kristus.

²¹Kinoponulisan ku nopo do surat diti, om otumbayaan oku do wonsoyon nu i' i pokionuon ku dot id diya'. Om oilaan ku do momonsoi ko do lobi ko' mantad diri.

²²Om tulungon oku nogi' do poposodia' do bilik dot iyonon ku do hino'd walai nu, tu' mogondos oku i' do simbaron do Kinorohingan o sambayang do koinsanai dokoyu, oi tobpinai-tobpinai. Om pogulion oku kawagu dau do hino'd dokoyu.

²³Om i Ipapras, i koruhang ku do poinggiil, do Kristus o kinopogiilan nga' poporikot nogi' do tabi' dot id diya'.

²⁴Om i Markus om i Aristarkus, om i Dimas om i Lukas i tambalut ku do kumaraja', nga' poporikot nogi' do tabi' dot id diya'.

²⁵Om pokionuon ku no do barakatan kou di Tuhan Yesus Kristus.