Read Boros Dusun 2 John 1 Bible Online

2 John 1 - Boros Dusun bible

2 John 1

¹Kumaa dot id tondu' di nopili' do Kinorohingan, om kumaa dot id tangaanak di tondu'. Iti nopo surat diti om mantad id doho', i boyoon do sidang dit osianan kopio dokoyu. Om okon i' ko' iyoho' noo ot osianan dokoyu nga' oinsanan nogi' i tulun di nokotutun do Kinorohingan dit otopot dot osianan dokoyu.

²Tu' poingiyon no o Kinorohingan dot id suang do ginawo toko', om moyo-woyo' kasai' iyau dati' do gisom do poingompus.

³Pokionuon ku no dot onuan toko' do Kinorohingan Tapa', om i Yesus Kristus i Tanak di Tapa' diri, do barakat om kosianan om kosimbayanan do ginawo. Om pokionuon ku no dot aanu toko' ngai' iri do mikuwo'd otulid o ginawo om mikuwo'd osianan.

⁴Otood oku no do nokoilo do haro o tangaanak nu, oi tondu', do miagal di ponuhuan do Kinorohingan i Tapa' dot id dati'.

⁵Iyo nopoddi, oi tondu', om pokionuon ku no kopio do mogiinsian-sian toko'. Iti nopo poboroson ku dokoyu diti om okon i' ko' ponuhuan do wagu; iti nopo ponuhuan diti om nokoboros no dot id dati' do mantad di kotumbayaai toko' i'.

⁶Komoyon nopod osianan om tumanud ngai' di ponuhuan do Kinorohingan. Om ponuhuan nopo di norongou dokoyu do mantad di timpuun i' om monuhu' kopio dokoyu do mogiinsian-sian.

⁷Ogumu' no o gomponipu' do nokotongkop diti pomogunan. Iyolo' nopo om i tulun dit a' otumbayaan do ruminikot i Yesus do hiti'd pomogunan do suminiliu'd tulun. Tulun nopo do miagal diri om gomponipu' i' om Pisangod do Kristus.

⁸Iyo nopoddi, om mumbangan-bangan kou no, om a' kou i' atagakan di pinanatasan dahai do momonsoi do bagi' dokoyu. Om tumotos kou no om angaanu ngai' i' dokoyu it isomuli' dokoyu do mantad id Kinorohingan.

⁹Tulun nopo dit a' gumirot kopio dot id ponudukan di Kristus, tu' sumansala' nogi' do mantad id ponudukan di nokotuduk di Kristus om aiso' no dot id dau o Kinorohingan. Tulun nopo di poinggirot kasai' dot id ponudukan di Kristus om komoyon nopoddi om haro no dot id dau o Kinorohingan Tapa' om i Tanak.

¹⁰Iyo nopoddi, om ondung haro o tulun do korikot do mongoi poposusui dot id dokoyu do ponudukan dit a' nokotuduk di Kristus, om kada' dokoyu posolokoyo' i tulun diri dot id walai dokoyu om kada' kou tabi' di tulun diri.

¹¹Tu' iri nopo tulun di tumabi' di tulun do miagal diri om kotonggoi no di tulun diri do momonsoi di wonsoyon dau dit araat.

¹²Ogumu' po daa kopio ot apatut ku'd posunudon dot id dokoyu nga' osorou ku dot osonong nogi' dot a' ku tulison do hiti'd surat. Om mogondos oku do koongoi oku kolimbuha' dokoyu, om koboro-boros oku i' kopio dokoyu, om ongotood ngai' toko' indo.

¹³Om i tangaanak di tobpinai nu'd tondu', oi tondu', i nopili' nogid Kinorohingan nga' poporikot id tabi' dot id diya', oi tondu'.