Read Boros Dusun Jude 1 Bible Online

Jude 1 - Boros Dusun bible

Jude 1

¹Oi tobpinai-tobpinai di nolohou no do Kinorohingan om i kosianan kopio do Kinorohingan Tapa', om i gompion do bagi' di Yesus Kristus, iyoho' no --- i Yudas --- i tobpinai di Yakub, i susuhuon di Yesus Kristus,

²o mogondos dot: onuan kou do Kinorohingan do barakat, om kosianan om kosimbayanan do ginawo dit a' ogina-gina' o kogoyoo'.

³Oi tobpinai-tobpinai di kosianan ku! Kinoponulisan ku nopo kopio do surat diti dot id dokoyu om popoilo do pasal di koposion di naanu toko'. Nga' baino' nodti om noodsuur oku do monosihat dokoyu dot id suang do surat diti om tumilombus kou i' do tumotos kopio do pokotopot di kotumbayaan di pinatahak do Kinorohingan dot id tulun di songonuon dau dit insan noo patahako' do gisom dot alaid.

⁴Tu' a' toko' i' noilaan do haro no o piro-piro o tulun dit araat do minomolisok-lisok do ruminikot dot id pogialatan toko'. Iyolo' no i tulun dit angaraat kopio di monomputul di habar do pasal do kosianan do Kinorohingan dot id dati', do mogihum iyolo' do ralan do monguru di korohian do tinan diyolo'. Om mada' iyolo' di Yesus Kristus, i Pomorinta' dit iso' noo om iyau noo, om iyau o Tuhan toko'. Mantad po di timpuun i' om nokoboros mantad no i pomohukum diyolo' dot id suang do Buuk do Kinorohingan.

⁵Koinsanai'ddi om nongoilaan ngai' no dokoyu, nga' orohian oku po do popoboros dot id dokoyu do pasal do kowoyo-woyoo' do Tuhan do minamasi di tulun dot Israil do mantad id pomogunan do Masir, nga' pinatai iddi dau i tulun dit id pogialatan diyolo' dit a' notumbayaan.

⁶Soroho' pogi' i piro-piro moloikat di tuminolibamban di diyolo'd kuasaon, gisom do tuminongkiad iyolo' di diyolo'd kinoiyonon. Nga' kagasai noddi do Kinorohingan i piro-piro moloikat diri do rantai di poingkogos kasai' do gisom do poingompus, dot id kinoiyonon dit otuong do hiti'd saalom do tana'. Om hilo' kasai' no iyolo' do gisom dot orikot i Tadau di koronob kopio di kopomohukuman diyolo'.

⁷Soroho' pogi' i bandar do Sodom om Gomura om i kabandaran dot id posorili'; kowoyo-woyoon nopod tulun do hiri nga' miagal di winonsoi di piro-piro moloikat di noroitan di tiinu'. Miningwonsoi iyolo' dit araat om minagampahu' iyolo', gisom do ninggorit iyolo' do hukuman do tapui dit a' opisok do gisom do poingompus do maan do popoinsan do koinsanai'd tulun.

⁸Om iyo nogiddi i tulun di noroitan di tiinu', tu' minsorou nopo iyolo' do gisom do kowonsoi iyolo'd dusa dot id tinan diyolo'. Om poinsiriba-ribaon diyolo' o kuasa' do Kinorohingan. Om mongindaraat dit ongkikagayaan di songingiyon do hilo'd surga.

⁹Om i Mikail piya i boyoon di moloikat nga' a' i' insan pomonsoi do miagal diri. Tontok di minisongkiwal iyolo' di Rogon ondung isai diyolo' o kaanu di rata' di Musa, om a' i' nakatama' i Mikail do pinapasala' di Rogon do minimboros do boros do mongindaraat. Suwai ko' pomoros nopo i Mikail do poingkaa, “Togodon ko i' bo do Tuhan dino!” ka.

¹⁰Nga' iti nopo tulun diti om songkiwalon nopo diyolo' om indaraaton o koinsanai dit a' diyolo' osuhutan. Miagal po iyolo' di nintorusan dit aiso' o toila-ilaan, tu' pongilo nopo diyolo' do nunu nopo om iri no i kopurimanan diyolo'. Nga' iri nogi' i karaag diyolo'.

¹¹Obungou no kopio iyolo'! Tu' suminusui i' iyolo' di ralan di winayaan di Kain. Mokimaanu-anu nopo iyolo'd tusin, om tumomod nopo iyolo' do rumatu' dot id kubong di kopolidon do miagal di Biliam. Om pinatai diri iyolo' tu' suminaap i' iyolo' do miagal di Kora.

¹²Tontok do papaharo kou do poginakanan, om kososomu' no kopio i kowoyo-woyoon di tulun diri dot id pogialatan dokoyu. Tu' ongodoot kopio iyolo' do makan om a' ointingayaman om diyolo' nod tinan o sorohon diyolo'. Miagal no iyolo' di haun di tilibon do ribut, nga' a' i' poposondot do rasam. Om miagal nogi' iyolo' do kayu dit a' mongua' do tontok piya di maso do koponguaan; om miagal iyolo' di kayu di nutus do pinitonggoi do gamut om kapatai nopoddi kopio.

¹³Miagal po iyolo' di tumbak dit opuhod do hilo'd rahat; tu' poporuab do puta' om iyolo' nga' popoimbulai nogi' di wowonsoyon diyolo' di kointingayam kopio, do miagal di puta' di koruab. Om miagal iyolo' di rombituon di mimpanau om nokosodia' no do Kinorohingan o tiyonon diyolo' di hiri'd kinoiyonon dit otuong kopio do gisom do poingompus.

¹⁴I Hinok, i koturu' no do sinakagon do suminolusuk di Adam nga' nokoumbal i' do pinopoboros do pasal di tulun diri di gulu po. Boros kad Hinok, “Ontong pogi', rumikot nondo o Tuhan do miwoyo' do rinibuan o moloikat dau dit olidang

¹⁵do mongoi pomutus do koinsanai'd tulun. Hukuman nondo do Tuhan i tulun dit araat tu' i piningwansayan diyolo' dit angaraat o kopomohukuman. Om hukuman dau i tulun dit ongkidusa om i tulun di mongingindaraat tu' i boboroson diyolo' do mongindaraat o kopomohukuman,” ka.

¹⁶Iri nopo i tulun diri om managalai nopo do mimboros dot araatan om papasala' do tulun do suwai. Om mintanud iyolo' di kongorohian diyolo' di kidusa. Om mamarayou iyolo' do diyolo'd tinan, om mamarayou-rayou iyolo' do tulun do suwai do ralan diyolo' do manganu do kountungan.

¹⁷Nga' iyokoyu nopo, oi tobpinai-tobpinai di kosianan ku, om sorohon no dokoyu i nokoboros di piro-piro o rasul do Tuhan toko' i Yesus Kristus di gulu po.

¹⁸Pinopoilo mantad iyolo' dokoyu di gulu po dot oruhai nopondo o kopupuson diti pomogunan om mimbulai nondo o tulun do momohingi-hingi dokoyu, iri no i tulun di kowoyo-woyoon nopo om tumanud di kongorohian diyolo' di kidusa.

¹⁹Om iyolo' no i popoimbulai dot a' kopogiuludan. A' nogi' iyolo' porintaon di Rusod do Kinorohingan suwai ko' porintaon iyolo' di kongorohian di kowoyo-woyoon do dom pomogunan.

²⁰Nga' iyokoyu nopo, oi tobpinai-tobpinai ku, om tumilombus kou nopo do gumirot dot id kotumbayaan dokoyu dot id di Yesus Kristus. Iri nopo kotumbayaan dokoyu'ddi om olidang kopio. Daamot nopodti om sumambayang kou no do mikuwo'd kuasa' do Rusod do Kinorohingan.

²¹Om pointirungon kasai' no dokoyu o koposi-posion dokoyu dot id kosianan do Kinorohingan do solinaid dokoyu do magandad di Yesus Kristus i Tuhan toko', do papatahak dot id dokoyu di koposion dit otopot kopio om i poingompus dot i kosianan dau o kapanahakan dau.

²²Pointalangon no dokoyu o kosianan dokoyu dot id tulun di mikoduwo o ginawo.

²³Gayaton no o tulun do suwai do poposoliwan do mantad id tapui, om apasi i' iyolo'. Pointalangon no dokoyu o kosianan dokoyu dot id tulun do suwai do mikuwo'd ooris, nga' karaatai kou no di pakayan piya diyolo' di nososomu' di korohian diyolo' di kidusa.

²⁴Kinorohingan no o milo do momogompi' dokoyu om a' kou i' aratu', om iyau o milo do mongigit dokoyu dot id toguang dau di kikagayaan do mikuwo'd otood kou om aiso' o bohiton dokoyu dot id toguang dau,

²⁵om iyau noo o Kinorohingan, i Gampamasi dati' dot i Yesus Kristus i Tuhan toko' o pinamasi. Om iyau no o Kinorohingan di kikagayaan om it agayo kopio, om i kisinundu om i kikuasa' do mantad di gulu po om gisom do poingompus! Amin.