Read Bribri Mateo 1 Bible Online

Mateo 1 - Bribri bible

Mateo 1

¹Jesucristo dör se' blú bak kiè David e' aleri, David dör Abraham aleri. Jesucristo yë́pa bak ko̱s e'pa wëpa kiè dör i' es:

²Abraham alà dör Isaac, e' alà dör Jacob, e' ala'r dör Judá ena iëlpa.

³Judá ala'r dör Fares ena Zérah, e'pa mì dör Tamar. Fares alà dör Hesrón, e' alà dör Aram.

⁴E' alà dör Aminadab, e' alà dör Nahasón, e' alà dör Salmón.

⁵E' alà dör Booz, e' mì dör Rahab. Booz alà dör Obed, e' mì dör Rut. Obed alà dör Jesé,

⁶E' alà dör se' blú bak David e'. Se' blú bak David, e' alà dör Salomón, e' mì bak Urías ta̱ ke̱we.

⁷Salomón alà dör Roboam, e' alà dör Abías, e' alà dör Asá.

⁸E' alà dör Josafat, e' alà dör Joram, e' alà dör Ozías.

⁹E' alà dör Jotam, e' alà dör Acaz, e' alà dör Ezequías.

¹⁰E' alà dör Manasés, e' alà dör Amón, e' alà dör Josías.

¹¹E' ala'r dör Jeconías ena iëlpa. E' ké̱wö ska' ta̱ Israel aleripa klö'wé̱lur Babilonia wakpa tö ta̱ itsé̱mirakitö Babilonia.

¹²Israel aleripa aneyalne Babilonia, e' ukuöki̱ ta̱ Jeconías alà kiè Salatiel e' ku̱ne. Ie' alà dör Zorobabel,

¹³E' alà dör Abihud, e' alà dör Eliaquim, E' alà dör Azor.

¹⁴E' alà dör Sadoc, e' alà dör Aquim, e' alà dör Eliud.

¹⁵E' alà dör Eleazar, e' alà dör Matán, e' alà dör Jacob.

¹⁶E' alà dör José, e' dör María wëm. María dör Jesús mì. Jesús dör wé̱ pairine'bitu̱ idi' wa s'blúie e'.[1]

¹⁷Es Abraham ké̱wö ska' döka̱ David ku̱ne', eta̱ Jesús ditséwö alöne döka̱ dabom eyök kí̱ tkëtökicha (14). Ñies David ké̱wö ska' döka̱ Israel aleripa minetse̱r Babilonia, eta̱ Jesús ditséwö alöne döka̱ dabom eyök kí̱ tkëtökicha (14). Ñies Israel aleripa minetse̱r döka̱ wé̱ pairine'bitu̱ idi' wa s'blúie e' de, eta̱ Jesús ditséwö alöne döka̱ dabom eyök kí̱ tkëtökicha (14).

¹⁸I' dör Jesucristo ku̱ne' e' pakè: Ie' mì kiè María. E' bakia̱ busi ka̱m se̱r wëm ta̱, erë ittè me'bak se̱nukwa̱ wëm kiè José e' ta̱. Ka̱m ie'pa se̱rwa̱ ñita̱, ka̱m ie'pa ñì kö̀wa̱, eta̱ María bukluneka̱ Wiköl Batse'r diché wa.

¹⁹José dör wëm buaë yësyësë, e' kue̱ki̱ ie' kë̀ é̱na María jaëwa̱kka̱ sulitane wörki̱. E' kue̱ki̱ ie' tö ibikeitsé: “Sú̱yö imèa̱t bë̀rë.”

²⁰Ie' tso'ia̱ ibikeitsök ta̱ ikapowa̱ ta̱ ikabsué̱ tö Skëköl biyöchökwak de eköl e' tö ie' a̱ iché: “A José, David aleri, María bukluneka̱ e' dör Wiköl Batse'r diché wa. E' kue̱ki̱ kë̀ be' suanuk se̱nukwa̱ ie' ta̱.

²¹Ie' alà ku̱rdaë eköl wák wëm. Ikiè múka̱bö Jesús[2] Ie' tö iwakpa tsa̱tkeraë se̱ne sulu nuí̱ yöki̱, e' kue̱ki̱ ikiè múka̱ es.” Es Skëköl biyöchökwak tté José ta̱.

²²E' ko̱s tka es a̱s ì yë'a̱tbak Skëköl tö itteköl wa e' wà tkö̀, e' tö ichè:

²³“Busi eköl kë̀ wa̱ wëm kaule e' buklurdaka̱, e' alà ku̱rdaë wák wëm, ikirdaë Emanuel.”[3] (s'kiè e' wà kiane chè: “Skëköl tso' se' ta̱”).

²⁴Mik José ti̱'neka̱ne, eta̱ ie' tö iwé̱ we̱s Skëköl biyöchökwak tö ie' a̱ iché es. Ie' ulabatséwa̱ María ta̱.

²⁵Erë alà ka̱m ku̱r, e' yöki̱ ie'pa kë̀ ñì kànewa̱. Mik alà ku̱ne, eta̱ José tö ikiè méka̱ Jesús.