Read Bribri Juan 2 Bible Online

Juan 2 - Bribri bible

Juan 2

¹Böiki es ta̱ ulabatsè Caná a̱te̱ Galilea ee̱, ee̱ Jesús mì tso'.

²Ñies Jesús ena ittökatapa kiule, e'pa de ulabatsè e' ké̱wö tkö'u̱k.

³Mik ie'pa vino e̱newa, eta̱ Jesús mì tö iché ie' a̱: —Vino e̱newa.

⁴Jesús tö ie' a̱ iché: —¿Iö́k be' tö e' ché ye' a̱? Ka̱m ye' ké̱wö dö̀ iwà kkachoie tö yi dör ye'.

⁵Eta̱ imì tö iché íyi watiökwakpa a̱: —Ì ko̱s chekeitö a' a̱, e' ú̱ a' tö es.

⁶Ee̱ ska̱u̱ tso' teröl (6) judiowak e̱' batse'u̱kerak Skëköl a̱, e' dí dapa'wo̱ie. Ska̱u̱ ek ë̀ a̱ di' choka̱ galon döka̱ dabom böyök (20) ö dabom mañayök (30) ekkë.

⁷Jesús tö iché watiökwakpa a̱: —Ska̱u̱ ikkëpa wà iö́ka̱ chië di' wa. Ta̱ watiökwakpa tö iwà iéka̱rak es.

⁸Eta̱ Jesús tö iché ia̱rak: —I' ta̱ itsá̱ yö́ttsa̱ elkela ta̱ itsú̱mi iké̱wö tkö'u̱k wökir a̱ pattsè. Es ie'pa tö iwé̱.

⁹Eta̱ iwökir tö di' yöne vinoie e' pattsé. Ie' kë̀ wa̱ ijche̱r tö wé̱ vino e' datse̱ (erë watiökwakpa tö di' yéttsa̱, e'pa ë̀ wa̱ ijche̱r tö wé̱ idatse̱.) E' kue̱ki̱ ie' tö wëm ulabatske, e' kié

¹⁰ta̱ ichéitö ia̱: —Sulitane wöblane vino bua'iewa̱, ese watiök ke̱we. Mik s'kiulepa tö iyé tai̱ë, eta̱ vino ëse watieke. Erë be' tö vino bua'ie blé, ikkë e̱rpa be' tö iwatieke.

¹¹I' wé̱ Jesús tö Caná a̱te̱ Galilea ee̱, e' dör ì kë̀ o̱r yi a̱ ese tsá̱ o̱' ie' tö. E' wa ie' tö ilo tai̱ë, e' kkaché ie'pa a̱, ta̱ ittökatapa e̱rblé ie' mik.

¹²E' ukuöki̱ ta̱ ie' mía̱ imì ta̱, iëlpa ta̱, ñies ittökatapa ta̱, ká̱ kiè Cafarnaúm ee̱. Ee̱ ie'pa e̱' tsé̱a̱t ká̱ böt ká̱ mañat ekkë alè.

¹³Judiowak Yë́pa Yërulune Egipto e' ké̱wö tkö'wè̱ dökewa̱tke tsi̱net, e' kue̱ki̱ Jesús mía̱ Jerusalén ka̱wö e' tkö'u̱k.

¹⁴Mik ie' de Skëköl wé pamik, eta̱ ie' tö obeja ena bakala pupula ena nuböl ese watau̱kwakpa kué̱. Ñies inuköl mane'u̱kwakpa[3] kué̱itö tulurdak imesa o̱'mik.

¹⁵Ta̱ ie' tö ttsa' tréwa̱, e' wa ie' tö íyi watau̱kwakpa ko̱s trë'wé̱yal iobeja ibakala tso' ko̱s e' ta̱. Ñies inuköl mane'u̱kwakpa inuköl tuléttsa̱itö ta̱ imesa trélurka̱.

¹⁶Ie' tö iché nuböl watau̱kwakpa a̱: —¡Íyi i' yö́lur se̱raa̱! ¡Kë̀ ye' Yë́ u klö'wa̱rwa̱ a' íyi watuo̱ie!

¹⁷E' ukuöki̱ ta̱ ittökatapa é̱na ia̱newa̱ tö Skëköl yëkkuö tö iché: “Be' u dalër tai̱ë ye' é̱na, e' tsa̱tkeraë ye' tö dö̀ ye' duö̀wa̱ ekkë.”

¹⁸Judiowak wökirpa tö ichaké Jesús a̱: —Ì kë̀ o̱r yi a̱ ¿e' wé̱se wè̱mi be' tö sa' a̱ iwà kkachoie tö be' wa̱ ka̱wö ta̱' íyi ikkë wo̱ie?

¹⁹Ie' tö iiu̱té: —U i' tkéttsa̱ a' tö, e' ta̱ böiki es ta̱ ye' tö iyuéka̱ne.

²⁰Ie'pa tö iché ia̱: —U i' kané dör duas dabom tkëyök kí̱ teröl (46), eta̱ ¿we̱s iyuèka̱mi be' tö ká̱ mañatk ë̀?

²¹Erë u cheke ie' tö, e' dör iwák e̱' chöke.

²²E' kue̱ki̱ mik ie' shke̱neka̱ne, eta̱ ittökatapa é̱na ia̱newa̱ tö ie' tö iyë' es. E' kue̱ki̱ ie'pa tö Skëköl yëkkuö ena ì yë' Jesús tö e' klö'wé̱.

²³Mik Jesús tso' Jerusalén Judiowak Yë́pa Yërulune Egipto e' ké̱wö tkö'u̱k, eta̱ ì kë̀ o̱r yi a̱ ese we̱ke ie' tö tai̱ë. E' kue̱ki̱ tai̱ë pë' e̱rblé ie' mik.

²⁴Erë ie' wa̱ ie'pa e̱r su̱ule buaë, e' kue̱ki̱ kë̀ ie' e̱rblëne ie'pa mik.

²⁵Ie' wák wa̱ ijche̱r buaë we̱s sulitane e̱r dör. E' kue̱ki̱ kë̀ yi a̱ ì yënuk ie' a̱ tö we̱s se' e̱r dör.