Read Buka Helaga (Hiri Motu) 1993 GENESE 13 Bible Online

GENESE 13 - Buka Helaga (Hiri Motu) 1993 bible

GENESE 13

¹Aberamo ese Aigupito ena tano ia rakatania, ia bona iena adavana danu. Iena kohu ibounai ia abia lao. Idia lao mirigini kahanai, Negebe ena tano dekenai. Lota danu idia lao.

²Aberamo be kohu momo tauna, iena mamoe, nanigosi, boromakau, siliva bona golo be momo herea.

³Negebe dekena amo ia laolao, ia lao Betele hanua dekenai, vadaeni iena palai ruma ia haginia lou, ena gabu gunana dekenai, Betele hanua bona Ai hanua edia huanai.

⁴Unai gabu be guna boubou patana ia karaia gabuna. Unuseni Aberamo be Lohiabada dekenai ma ia tomadiho.

⁵Lota danu, Aberamo danu ia lao tauna, be mai ena mamoe, nanigosi bona boromakau, bona ia danu idia noho palai ruma taudia danu.

⁶Tano be hegeregere lasi idia ruaosi gabu tamona dekenai do idia noho hebou, badina be edia boromakau be momo herea.

⁷Unai dainai Aberamo ena boromakau naria taudia be Lota ena boromakau naria taudia danu idia heai. Unai neganai Kanana taudia bona Perisi taudia be unai tano dekenai idia noho.

⁸Vadaeni Aberamo ese Lota dekenai ia gwau, “Ita be varavara, oiemu taudia bona lauegu taudia idia heai be dika.

⁹Ita parara be namo. Oiemu ura tano mani oi abia hidi, vadaeni oi ese lau oi rakatania. Oi be kahana oi lao, lau be kahana do lau lao.”

¹⁰Vadaeni Lota ese iena matana ia negea, Ioridane Sinavai ena koura ia itaia, ibounai be mai edia ranu. Ia be Lohiabada ena uma gabu bamona, bona Aigupito ena tano bamona danu, ia lao bona Soara. (Inai be Lohiabada ese Sodoma hanua bona Gomora hanua ia hadikaia ore lasi neganai.)

¹¹Vadaeni Lota ese Ioridane koura ibounai ia abia hidi, bona dina ia daekau kahana dekenai ia lao. Idia ruaosi idia parara unai bamona.

¹²Aberamo be Kanana ena tano dekenai ia noho, bona Lota be koura ena hanuadia dekenai ia lao, bona Sodoma kahirakahira dekenai ia ese iena palai ruma ia haginia.

¹³Sodoma taudia be dika bada, Lohiabada ena vairana dekenai kara dika bada idia karaia.

¹⁴Lota ia rakatania murinai, Lohiabada ese Aberamo dekenai ia hereva, ia gwau, “Inai gabu dekena amo oiemu matana oi negea kahana ibounai dekenai.

¹⁵Hari oi itaia noho tano ibounai oi dekenai, bona oiemu tubuna dekenai do lau henia, ia lao bona hanaihanai.

¹⁶Oi dekenai tubuna momo herea do lau henia, bona tau ta ese idia do ia duahia diba lasi, tanobada ena tano kahu ibounai ena momo ia duahia diba lasi bamona.

¹⁷Oi toreisi, inai tano ibounai do oi hanaia lao, badina be ibounai oi dekenai do lau henia.”

¹⁸Vadaeni Aberamo ese iena palai ruma ia lokua, ia toreisi, ia lao Heberona dekenai. Unuseni ia noho, Mamare ena au helagadia kahirakahira. Unuseni boubou patana ta ia karaia, Lohiabada dekenai.