Read Buka Helaga (Hiri Motu) 1993 GENESE 14 Bible Online

GENESE 14 - Buka Helaga (Hiri Motu) 1993 bible

GENESE 14

¹Amarapela, Sinara tano ena king, Arioka, Elasara tano ena king, Kedoralaomere, Elama tano ena king, bona Tidala, Goimi tano ena king,

²be idia lao tuari king 5 danu, Bera, Sodoma ena, Birisa, Gomora ena, Sinaba, Adima ena, Semebere, Seboimi ena, bona Bela ena king. Bela ena ladana ta be Soara.

³Inai king 5 be idia haboua tamona Sidima Koura dekenai. Inai gabu, hari ena ladana be Mase Davara.

⁴Lagani 12 lalonai idia be king Kedoralaomere dekenai hesiai gaukara idia karaia, to lagani namba 13 dekenai idia toreisi, idia tuari henia.

⁵Lagani namba 14 dekenai Kedoralaomere, mai ena durua taudia danu, ese ia toreisi, Repaima taudia, Asataroto Karanaimi dekenai ia halusidia, bona Susima taudia, Hamo dekenai ia halusidia, bona Emima taudia, Save Kiriataimi dekenai ia halusidia.

⁶Hori taudia danu, edia ororo, ladana Seiri dekenai ia halusidia, bona ia luludia ia lao bona El Parana, taunimanima noho lasi tano ena hetoa badinai.

⁷Vadaeni Kedoralaomere ia giroa mai Kadesi dekenai, (ena ladana ta be “Kota Hereva ena Ranu Gabuna”), bona ia ese Amaleka taudia ibounai idia halusidia. Ma ia ese Amoro taudia, Hasasono Tamara dekenai idia noho, danu ia halusidia.

⁸Vadaeni Sodoma ena king bona Gomora ena king bona Adima ena king bona Seboimi ena king bona Bela (ladana ta be Soara) ena king, be edia tuari taudia idia haboua Sidima Koura dekenai, tuari totona.

⁹Inai king 5 ese king 4, Kedoralaomere, Elama ena king, bona Tidala, Goimi ena king, bona Amarapela, Sinara ena king, bona Arioka, Elasara ena king dekenai idia tuari henia.

¹⁰Unai Sidima Koura be mai ena pisi guri momo herea. Vadaeni Sodoma ena king bona Gomora ena king be tuari dekena amo idia ura heau neganai, pisi guri lalonai idia moru. To taunimanima oredia be ororo dekenai idia heau mauri.

¹¹Unai king 4 ese kohu ibounai bona aniani ibounai Sodoma bona Gomora dekenai idia dadia, bona hanua idia rakatania lao.

¹²Lota, Aberamo ena vavana, Sodoma dekenai ia noho. Vadaeni idia ese ia danu idia dogoatao, idia abia lao, mai ena kohu ibounai.

¹³To heau mauri tauna ta ia lao, Aberamo, Heberu tauna dekenai ia hamaoroa. Aberamo be Mamare, Amoro tauna, Esakolo bona Anere edia kakana ena au helagadia kahirakahira ia noho. Inai tau toi be Aberamo danu idia turana karaia vadaeni.

¹⁴Aberamo ia kamonai iena varavara be idia abia mauri. Vadaeni, ia ese iena palai ruma noho tuari taudia ia haboua. Idia ibounai be tatau 318. Bona idia ese unai king taudia murinai idia raka, ia lao bona Dano hanua.

¹⁵Unuseni Aberamo bona ena tatau idia parara, orea rua idia lao, hanuaboi lalonai unai king taudia idia tuari henidia, idia halusidia. Bona Aberamo ia luludia, ia lao bona Hoba, Damaseko ena mirigini kahana dekenai.

¹⁶Kohu ibounai idia abia lou. Aberamo ena varavara Lota mai ena kohu danu, bona hahine bona taudia momo danu ia abia lou.

¹⁷Aberamo ese Kedoralaomere bona king haida ia halusidia murinai, ia giroa mai, bona Sodoma ena king ese ia danu ia hedavari Save Koura dekenai, ena ladana ta be, King ena Koura.

¹⁸Vadaeni Melekisedeka, Salema ena king, ia be Ataiai Momokani Dirava ena helaga tauna, ese paraoa bona uaina ia mailaia Aberamo dekenai.

¹⁹Ia ese Aberamo ia hanamoa, ia gwau, “Ataiai Momokani Dirava, guba bona tanobada karaia Dirava ese, Aberamo ia hanamoa be namo,

²⁰Ataiai Momokani Dirava lau hanamoa inai. Ia ese kwalimu oi dekenai ia henia, oi dekenai idia tuari taudia dekena amo.” Bona Aberamo ese ia abia kohu ibounai ia haria kahana 10, bona kahana ta Melekisedeka dekenai ia henia.

²¹Bona Sodoma ena king ese Aberamo dekenai ia hereva, ia gwau, “Oi abia kohu ibounai oi dogoatao noho, to lauegu taunimanima sibona lau dekenai oi henia.

²²To Aberamo ese ia haere, ia gwau, “Lau ese Lohiabada, Ataiai Momokani Dirava, guba bona tanobada ia karaia Diravana ena vairanai hari lau gwauhamata metau henia,

²³lau gwau, oiemu kohu ta do lau abia lasi, tamaka varo danu do lau abia lasi. Gabeai do oi gwau, ‘Aberamo ena kohu momo be lau dekena amo ia abia’ garina.

²⁴Lau sibona be gau ta do lau abia lasi. Lauegu taudia idia ania vadaeni aniani sibona lau dekenai oi henia. Bona lauegu turana Anere bona Esakolo bona Mamare edia kohu kahana do idia abia, inai sibona.”