Read Buka Helaga (Hiri Motu) 1993 GENESE 17 Bible Online

GENESE 17 - Buka Helaga (Hiri Motu) 1993 bible

GENESE 17

¹Aberamo ena mauri lagani be 99 neganai, Lohiabada ese ia dekenai ia hedinarai, ia gwau, “Lau be Siahu Ibounai Dirava, lau dekenai do oi kamonai oiemu mauri dinadia ibounai, bona kara maoromaoro do oi karaia.

²Lauegu gwauhamata taravatuna, oi bona lau iseda huanai lau karaia inai, bona tubudia momo do lau henia oi dekenai.”

³Vadaeni Aberamo ia tui diho, bona iena vairana ia atoa diho, tano dekenai. Dirava ia gwau,

⁴“Oi danu do lau badinaia gwauhamata taravatuna be inai: Oi be dohore bese momo edia tubuna.

⁵Oiemu ladana be do idia atoa lou lasi Aberamo, to do idia atoa Aberahamo, badina be bese momo havaraia tauna oi lau halaoa inai.

⁶Tubudia momo oi dekenai do lau henia, bona idia haida be dohore king taudia. Oiemu tubuna be momo dainai, bese momo dohore idia vara oi dekenai.

⁷“Lauegu gwauhamata taravatuna oi bona oiemu tubuna dekenai do lau badinaia vairai negadia dekenai. Ia be noho hanaihanai gwauhamata taravatuna. Lau be dohore oiemu Dirava, bona oiemu tubuna edia Dirava.

⁸Inai hari oi noho idau tauna bamona tano do lau henia oi dekenai, bona oiemu tubuna dekenai. Inai Kanana tano ibounai be oiemu, bona oiemu tubuna edia, ela bona hanaihanai, bona lau be edia Dirava do lau noho.”

⁹Dirava ese Aberahamo dekenai ma ia hereva, ia gwau, “Oi danu ese inai gwauhamata taravatuna lau bona oi, iseda huanai do oi badinaia, oi bona oiemu tubuna taudia, vairai negadia lalonai.

¹⁰Inai gwauhamata taravatuna ena toana, be oi bona oiemu tubuna taudia ese do umui karaia momokani: Emui tatau ibounai be kopina utua kara do idia abia.

¹¹Emui kopina do umui utua, inai be gwauhamata taravatuna oi bona lau iseda huanai ena toana.

¹²Emui memero ibounai ta ta dina 8 idia abia neganai, edia kopina do umui utua. Emui ruma dekenai vara hesiai taudia danu edia kopina do umui utua. Bona idau taudia dekena amo umui hoia hesiai taudia danu edia kopina do umui utua.

¹³Inai ibounai ta ta kopina utua kara do idia abia, bona inai be emui tauanina dekenai ena toa ta, lauegu hanaihanai noho gwauhamata taravatuna umui dekenai ena toana.

¹⁴Bema emui tau ta be kopina utua kara ia abia lasi, ia be iena bese taudia dekena amo do umui atoa siri, badina be lau dekenai gwauhamata taravatuna ia badinaia lasi dainai.”

¹⁵Dirava ese Aberahamo dekenai ia hereva, ia gwau, “Oiemu adavana ena ladana oi atoa lou lasi Sarai, iena ladana hari be Sara.

¹⁶Lau ese do lau hanamoa, bona ia dekena amo natuna mero oi dekenai do lau henia. Lau ese Sara do lau hanamoa, bona ia be dohore bese idauidau edia sinana, bona iena tubuna haida be dohore king taudia.”

¹⁷Aberahamo ia tui diho, iena vairana ia atoa diho tano dekenai, to inai bamona ia laloa neganai, ia kiri, ia gwau, “Iena mauri lagani be 100 tauna, natuna ta do ia havaraia diba? Sara danu ena mauri lagani be 90, be dohore ia mara, a?”

¹⁸Dirava dekenai ia hereva, ia gwau, “Oi dekenai lau noinoi, Isamaela ena mauri do oi naria namonamo.”

¹⁹To Dirava ia gwau, “Lasi, oiemu adavana Sara be natuna mero do ia havaraia, bona iena ladana do oi atoa Isako. Lauegu gwauhamata taravatuna Isako dekenai, bona iena tubuna dekenai do lau badinaia. Ia be noho hanaihanai gwauhamata taravatuna.

²⁰Oi ese oi noinoi, lau ese Isamaela do lau naria, bona lau be inai bamona do lau karaia. Ia be dohore king natuna 12 edia tamana, bona iena tubudia dekenai bese badana ta do lau karaia.

²¹To lauegu gwauhamata taravatuna oiemu natuna Isako dekenai be do lau badinaia. Ia be Sara dekenai do ia vara, vaira lagani inai bamona nega dekenai.”

²²Dirava ese iena hereva ia hadokoa, vadaeni ia daekau, Aberahamo ia rakatania.

²³Unai dina dekenai, Aberahamo ese iena natuna Isamaela bona iena hesiai memero ibounai edia kopina ia utua, iena ruma dekenai idia vara taudia, bona ia hoia taudia danu, iena ruma noho tatau ibounai, Dirava ena oda hegeregere.

²⁴Aberahamo ena mauri lagani be 99 neganai kopina utua ia abia.

²⁵Iena natuna Isamaela ena mauri lagani be 13.

²⁶Idia ruaosi be kopina utua idia abia dina tamona dekenai,

²⁷iena hesiai memero ibounai danu.