Read Buka Helaga (Hiri Motu) 1993 GENESE 2 Bible Online

GENESE 2 - Buka Helaga (Hiri Motu) 1993 bible

GENESE 2

¹Vadaeni, guba bona tanobada mai edia anina ibounai be Dirava ese ia karaia haorea.

²Dina namba 7 dekenai, Dirava ia itaia, iena gaukara ibounai be idia ore, vadaeni unai dina namba 7 lalonai ia laga-ani sibona, iena gaukara ia rakatania.

³Bona Dirava ese dina namba 7 ia hanamoa, bona dina helaga ia halaoa, badina be unai dina dekenai Dirava ese iena gau ibounai karaia gaukara ia rakatania, ia laga-ani.

⁴Guba bona tanobada bona noho gaudia ibounai karaia dalana be inai bamona:

⁵Lohiabada Dirava ese tanobada bona guba ia karaia neganai, uda dekenai au ta tanobada dekenai ia noho lasi, bona ava aniani ta do ia vara lasi. Badina be Lohiabada Dirava ese medu tanobada dekenai be ia do hadihoa lasi, bona tau ta ia noho lasi tano naria totona.

⁶To varahu be tanobada dekena amo ia daekau, tano ena kopina ia hapariparia.

⁷Bona Lohiabada Dirava ese tano ena kahu dekena amo tau ta ia karaia, bona Dirava ese mauri ena lagana be unai tau ena udu baubau lalonai ia hiriria vareai, vadaeni unai tau ese mauri ia davaria vadaeni.

⁸Lohiabada Dirava ese uma ta dina ia daekau kahana dekenai ia karaia, ladana Eden, bona unai gabu dekenai, ia karaia vadaeni tauna ia atoa, unuseni ia noho.

⁹Lohiabada Dirava ese tano dekena amo toana namo au ibounai ia havaraia, bona aniani idia atoa audia danu. Ma Dirava ese uma ena huana dekenai mauri ena au, bona kara namo bona kara dika hadibaia auna danu ia havaraia.

¹⁰Eden dekena amo sinavai ta ia heau lao, uma ia hapariparia totona. Unai uma dekena amo sinavai ia parara, sinavai hani idia lao.

¹¹Sinavai ginigunana ena ladana be Pisona, ia be Havila tano ia heau hagegea, unai gabu dekenai golo korikori ia noho.

¹²Unuseni noho golo be namo herea, bedolaka bona onuku nadi danu idia noho.

¹³Sinavai iharuana ena ladana be Gihona, ia be Kusu tano ia heau hagegea.

¹⁴Sinavai ihatoina ena ladana be Taigarisi, ia be Asuria tano ena dina ia daekau kahana dekenai ia heau lao. Sinavai namba 4 be Euperate.

¹⁵Lohiabada Dirava ese unai tau ia abia, Eden ena uma gabu lalonai ia atoa, do ia geia bona naria totona.

¹⁶Lohiabada Dirava ese unai tau dekenai taravatu ia atoa, ia gwau, “Uma gabu dekenai gini au ibounai edia huahua oi ania diba, idia be taravatu lasi,

¹⁷to kara namo bona kara dika hadibaia au ena huahua oi ania lasi, badina be inai huahua oi ania dina dekenai do oi mase momokani.”

¹⁸Lohiabada Dirava ma ia gwau, “Unai tau sibona ia noho be ia namo lasi, lau ese durua tauna ia bamona do lau karaia.”

¹⁹Bona Dirava ese tano dekena amo tanobada ena boromakau ibounai ia karaia, bona ataiai manudia ibounai danu. Vadaeni, ia ese unai tau ena vairana dekenai ia hakaudia lao, do ia diba dahaka bona dahaka ladana idia dekenai ia atoa totona. Bona dahaka ladana unai tau ese inai mauri gaudia dekenai ia atoa, be edia ladana.

²⁰Vadaeni, unai tau ese boromakau ibounai dekenai ladana ia atoa, bona ataiai manudia bona tanobada boroma ibounai danu, to idia edia huanai unai tau dekenai durua tauna ta ia davaria lasi.

²¹Vadaeni Lohiabada Dirava ese unai tau ia hamahutaia mase. Bona ia mahuta neganai, iena ruduna turia ta ia kokia, bona turia gabuna ia koua hidio dekenai.

²²Bona Lohiabada Dirava ese unai tau ena ruduna turia dekena amo hahine ta ia karaia, vadaeni tau dekenai hahine ia abia lao.

²³Vadaeni unai tau ia gwau, “Inai harihari lau bamona tauna ia noho. Ia be lauegu turia ena turia, bona lauegu hidio ena hidio. Iena ladana do idia atoa, Hahine, badina be tau dekena amo be ia kokia.”

²⁴Unai dainai tau ese tamana sinana do ia rakatania, iena adavana dekenai do ia noho, ruaosi be tauanina tamona do idia lao.

²⁵Idia ruaosi, tau mai ena adavana danu be kopina kavakava, to idia be hemarai lasi.