Read Buka Helaga (Hiri Motu) 1993 GENESE 20 Bible Online

GENESE 20 - Buka Helaga (Hiri Motu) 1993 bible

GENESE 20

¹Unai neganai Aberahamo ia toreisi, ia laolao, diho kahana dekenai ia lao, Gerara dekenai ia noho, Kadesi bona Suru edia huanai.

²Vadaeni Aberahamo ese Sara totona ia hereva, ia gwau, “Ia be lauegu taihuna.” Vadaeni Abimeleka, Gerara ena king ese ia abia.

³Unai hanuaboi Dirava ese Abimeleka ia hedinarai henia nihi dekenai, ia gwau, “Oi kamonai, oi be mase tauna, inai hahine oi abia dainai, badina ia be tau ta ena adavana.”

⁴To Abimeleka be inai hahine dekenai be ia do sihari henia lasi. Vadaeni ia gwau “Lohiabada e, kara maoromaoro tauna do oi alaia mase, a?

⁵Inai tau ese ia hamaoroa lau dekenai, ia gwau, ‘Inai be lauegu taihuna, ani?’ Hahine danu ia hamaoroa lau dekenai, ia gwau, ‘Ia be lauegu taihuna.’ Inai kara lau karaia neganai, lauegu laloa be mai maoromaoro danu, bona lauegu imana be miro lasi.”

⁶Vadaeni Dirava ese nihi dekenai ia haere henia, ia gwau, “Lau diba oiemu laloa be kerere lasi inai kara oi karaia neganai. Unai dekenai lauegu vairana dekenai do oi kerere garina lau koua oi, do oi sihari henia lasi totona.

⁷Unai dainai unai tau dekenai iena adavana do oi henia lou, badina ia be peroveta tauna, vadaeni ia ese oi totona do ia guriguri, vadaeni do oi mauri. To bema oi henia lou lasi, oi diba momokani, dohore oi mase, oi bona oiemu ruma taudia ibounai.”

⁸Unai dainai Abimeleka ia toreisi, iena hesiai taudia ibounai dekenai ia boiboi, unai kara ia hamaoroa idia dekenai, vadaeni idia gari maragi lasi.

⁹Vadaeni Abimeleka ese Aberahamo dekenai ia boiboi, ia gwau, “Edena bamona oi karaia vadaeni ai dekenai? Edena kerere oi dekenai lau karaia dainai lau bona lauegu basileia dekenai inai bamona oi karaia do ai kerere totona? Mai taravatu ena kara ta oi karaia vadaeni lau dekenai?”

¹⁰Abimeleka ese Aberahamo dekenai ma ia nanadaia, ia gwau, “Dahaka totona inai kara oi karaia vadaeni?”

¹¹Vadaeni Aberahamo ia haere, ia gwau, “Badina be lau laloa inai gabu dekenai Dirava dekenai matauraia kara be lasi, vadaeni lau laloa be, lauegu adavana totona dohore idia alaia mase lau.

¹²Bona inai danu, ia be momokani lauegu taihuna, aiemai tamana be tamona, to aiemai sinana be idau, vadaeni ai ruaosi ai headava.

¹³To Dirava ese lau ia siaia, lauegu tamana ena ruma lau rakatania neganai, Sara dekenai lau hamaoroa, lau gwau, “Inai bamona do oi bogahisihisi lau dekenai, do ita lao gabu ibounai dekenai do oi hereva lau totona, oi gwau, ‘Ia be lauegu taihuna.’ ”

¹⁴Vadaeni Abimeleka ese mamoe bona boromakau bona hesiai taudia bona hesiai hahine be Aberahamo dekenai ia henia, bona iena adavana Sara ia henia lou.

¹⁵Abimeleka danu ia gwau, “Oi itaia, lauegu tano ibounai be oiemu vairana dekenai, oiemu ura gabuna dekenai do oi noho.”

¹⁶Ia ese Sara dekenai danu ia hamaoroa, ia gwau, “Oi itaia, siliva moni 1,000 oiemu taihuna dekenai lau henia vadaeni, oiemu hemarai kokia totona taunimanima ibounai edia vairana dekenai. Ibounai do idia diba oi be kerere oi karaia lasi.”

¹⁷Inai kara Sara dekenai ia vara dainai, Lohiabada ese Abimeleka ena hahine ibounai edia natuna havaraia dalana ia koua. Unai dainai Aberahamo ese Dirava dekenai ia guriguri, vadaeni Dirava ese Abimeleka ia hanamoa lou, bona iena adavana bona iena hesiai hahine danu ia hanamoa lou, vadaeni edia natuna idia havaraia.