Read Buka Helaga (Hiri Motu) 1993 GENESE 21 Bible Online

GENESE 21 - Buka Helaga (Hiri Motu) 1993 bible

GENESE 21

¹Lohiabada ese Sara ia durua, iena gwauhamata hegeregerena.

²Vadaeni ia be rogorogo, bona mero ta ia abia Aberahamo dekenai, ia be buruka neganai. Mero ena vara nega be Dirava ia gwauraia guna hegeregerena.

³Aberahamo ese iena natuna mero ena ladana ia atoa Isako.

⁴Mero ena mauri dinadia be 8 neganai, Aberahamo ese iena kopina ia utua, Dirava ena oda hegeregerena.

⁵Aberahamo ena mauri lagani be 100, Isako ia vara neganai.

⁶Sara ia gwau, “Dirava ese lau dekenai moale bona kiri ia henia vadaeni. Lauegu sivarai idia kamonai taudia ibounai be do idia kiri lau danu.”

⁷Ma ia gwau, “Daika ese Aberahamo dekenai ia hamaoroa diba, Sara ese iena natuna dekenai rata do ia henia? To momokani, lau buruka neganai, natuna mero lau havaraia vadaeni ia dekenai.”

⁸Mero be ia tubu, bona rata ia negea dina dekenai, Aberahamo ese aria badana ia karaia.

⁹Dina ta Hagara, Aigupito hahine ena natuna Isamaela, Aberahamo ese ia havaraia merona, be Isako danu idia gadara noho.

¹⁰Sara ia itaia, bona Aberahamo dekenai ia gwau, “Unai hesiai hahine mai ena natuna oi lulua lao. Badina be namo lasi unai hesiai hahine ena natuna ese oiemu kohu kahana do ia abia. Lauegu natuna Isako sibona ese inai kohu do ia abia.”

¹¹Aberahamo ena lalona be hisihisi bada, badina Isamaela danu be iena natuna.

¹²To Dirava ese Aberahamo dekenai ia hereva, ia gwau, “Unai mero bona oiemu hesiai hahine Hagara dekenai oi laloa momo lasi. Sara ena ura do oi karaia, badina be Isako dekena amo, lau gwauhamata vadaeni bese, be do oi abia.

¹³Lau be natuna momo danu hesiai hahine ena mero dekenai do lau henia, bona idia be dohore bese ta. Ia danu be oiemu natuna.”

¹⁴Kerukeru, daba maragi neganai, Aberahamo ese Hagara dekenai aniani bona ranu danu be nani kopina lalonai ia henia. Idia be Hagara ena doruna dekenai ia atoa, bona ia siaia lao, mero danu. Vadaeni, hahine ia lao, bona Bere Sieba ena taunimanima lasi gabuna dekenai ia loaloa.

¹⁵Ranu ia ore vadaeni neganai, ia ese mero ia atoa au maragina henunai.

¹⁶Vadaeni, sisina ia raka lao, diba pidia ena daudau hegeregerena, bona ia helai diho. Sibona dekenai ia hereva, ia gwau, “Mero ena mase lau ura lasi lau itaia.” Unuseni ia helai noho neganai, natuna ia tai hamatamaia.

¹⁷Dirava ese mero ena tai ia kamonai, bona Dirava ena aneru guba dekena amo Hagara dekenai ia hereva, ia gwau, “Hagara e, dahaka dekenai oi laloa momo? Oi gari lasi. Dirava ese mero ena tai ia kamonai vadaeni.

¹⁸Oi toreisi, mero oi abia isi, bona oiemu imana dekenai oi dogoatao. Iena natudia dekena amo bese badana do lau havaraia.”

¹⁹Dirava ese hahine ena matana ia kehoa, bona ranu guri ta ia itaia, vadaeni nani ena kopina ia hahonua, mero dekenai ranu ia henia.

²⁰Ia tubu daekau noho neganai, Dirava ese unai mero Isamaela dekenai ia noho. Ia be Parana tano ena taunimanima lasi gabuna dekenai ia noho, bona ia be labana diba momo tauna.

²¹Iena sinana ese hahine ta Aigupito dekena amo ia abia, Isamaela ese ia adavaia.

²²Unai neganai Abimeleka bona Pikola, iena tuari orea ena biaguna, ese Aberahamo dekenai idia lao, idia gwau, “Dirava ese oi danu ia noho oiemu kara ibounai lalonai.

²³Unai dainai, Dirava ena vairana dekenai gwauhamata oi henia, lau o lauegu natuna o lauegu tubuna do oi koia lasi. Lau be oi dekenai nega ta lau koikoi lasi, unai dainai lau dekenai oi gwauhamata, kara namo sibona do oi karaia lau dekenai, bona inai hari oi noho tano dekenai danu.”

²⁴Aberahamo ia gwau, “Vadaeni, lau gwauhamata inai.”

²⁵To Aberahamo ese Abimeleka dekenai ia maumau, ia gwau, “Oiemu hesiai taudia ese lauegu ranu guri ta idia abia kava.”

²⁶Abimeleka ia gwau, “Lau diba lasi inai kara, lau oi hamaoroa lasi guna, bona inai hereva be hari sibona lau kamonai.”

²⁷Vadaeni Aberahamo ese mamoe bona boromakau haida Abimeleka dekenai ia henia, bona idia ruaosi maino idia karaia.

²⁸Aberahamo ese iena mamoe orea dekena amo mamoe natudia 7 ia abia siri.

²⁹Abimeleka ese Aberahamo dekenai ia henanadaia, ia gwau, “Badina dahaka inai bamona oi karaia?”

³⁰Aberahamo ia haere, ia gwau, “Inai mamoe natudia 7 oi abia dae be namo. Inai oi karaia neganai, oi gwauraia hedinarai lau ese inai ranu guri lau geia vadaeni.”

³¹Vadaeni unai gabu ena ladana idia atoa Bere Sieba, badina be idia ruaosi idia gwauhamata hebou.

³²Vadaeni Bere Sieba dekenai maino idia karaia, inai murinai Abimeleka bona Pikola, iena tuari orea ena biaguna, idia giroa lou Pilistia, edia tano dekenai.

³³Bona Aberahamo ese au ta ia hadoa Bere Sieba dekenai, bona Lohiabada, Noho Hanaihanai Dirava dekenai ia tomadiho henia.

³⁴Aberahamo be Pilistia edia tano dekenai nega daudau ia noho.