Read Buka Helaga (Hiri Motu) 1993 GENESE 22 Bible Online

GENESE 22 - Buka Helaga (Hiri Motu) 1993 bible

GENESE 22

¹Inai murinai, Dirava ese ia ura Aberahamo do ia tohoa, vadaeni ia dekenai ia gwau, “Aberahamo e!” Aberahamo ia gwau, “Lau inai.”

²Dirava ia gwau, “Oiemu natuna oi abia, oi sibona oiemu natuna korikori, Isako, oi lalokau henia merona. Moraia tano dekenai do umui lao. Unuseni oi do lau hamaoroa, ororo ta ena ataiai, mero be lahi boubou gauna do oi halaoa.”

³Kerukeru daba maragina dekenai, Aberahamo ese iena doniki ia abia hegaegae, iena natuna Isako bona iena hesiai taudia rua ia danu ia abia. Lahi boubou ena au ia siria, bona ia toreisi, Dirava ia hamaoroa gabuna dekenai ia raka hamatamaia.

⁴Dina namba 3 dekenai Aberahamo ese gabuna ia itaia, daudau dekenai.

⁵Vadaeni, iena hesiai taudia dekenai ia gwau, “Umui ruaosi doniki danu iniseni umui noho. Lau be inai mero danu do ai lao unuseni, tomadiho totona, gabeai do ai giroa mai umui dekenai.”

⁶Aberahamo ese lahi boubou ena au ia henia iena natuna Isako dekenai, do ia huaia lao totona. To Aberahamo sibona ese lahi bona kaia iena imana dekenai ia abia lao. Idia ruaosi idia raka hamatamaia hebou.

⁷Nega sisina Isako ese iena tamana Aberahamo dekenai ia hereva, ia gwau, “Tamagu e.” Ia haere, ia gwau, “Natugu e, lau inai.” Isako ia gwau, “Lau itaia, oi dekenai lahi bona au idia noho, to lahi boubou gauna ena mamoe be edeseni?”

⁸Aberahamo ia haere, ia gwau, “Natugu e, Dirava sibona ese mamoe do ia henia, lahi boubou gauna totona.” Vadaeni, ruaosi ma idia raka lao.

⁹Ia dekenai Dirava ese ia hamaoroa gabuna dekenai idia ginidae neganai, Aberahamo ese boubou patana ia haginia, bona patana ena latanai au ia atoa hegaegae. Vadaeni iena natuna be varo dekenai ia kwatua, bona boubou patana dekenai ia atoa, au latanai.

¹⁰Vadaeni Aberahamo ese iena imana dekenai kaia ia abia, iena natuna alaia mase totona.

¹¹To Lohiabada ena aneru ese guba dekena amo ia dekenai ia boiboi, ia gwau, “Aberahamo e, Aberahamo e!” Ia haere, ia gwau, “Lau inai.”

¹²Ia gwau, “Oiemu imana mero dekenai oi atoa lasi, kara ta danu oi karaia lasi ia dekenai. Harihari lau diba vadaeni, oi be Dirava oi gari henia momokani, badina be oiemu natuna korikori lau ura abia neganai, oi dogoatao lasi.”

¹³Aberahamo ese iena matana ia negea, bona ia murinai mamoe tau ta ia itaia, au ta ese ia dogoatao noho, iena doana dekenai. Ia lao, mamoe ia abia, bona ia henia, lahi boubou gauna totona, vadaeni unai mamoe ese iena natuna ena gabuna ia abia.

¹⁴Aberahamo ese unai gabu ena ladana ia atoa, “Lohiabada ia Henia”. Inai bamona idia gwauraia, ia mai bona hari, idia gwau, “Lohiabada ese ia henia, iena ororo dekenai.”

¹⁵Lohiabada ena aneru ese Aberahamo dekenai ma ia boiboi lou nega iharuana, guba dekena amo.

¹⁶Ia gwau, “Lohiabada ese inai bamona ia hereva: Lau sibona egu ladana dekenai gwauhamata metauna lau gwauraia inai: Oiemu natuna mero tamona sibona, lau abia gwauraia neganai oi dogoatao lasi. Inai kara oi karaia dainai, lau ese oi do lau hanamoa bada herea.

¹⁷Lau gwauhamata inai, tubudia momo oi dekenai do lau henia, edia momo be guba dekenai noho hisiu, bona kone dekenai noho miri bamona. Oiemu tubuna taudia ese idia dekenai idia tuari taudia edia hanua ibounai do idia abia.

¹⁸Tanobada besedia ibounai ese lau dekenai do idia noinoi, idia do lau hanamoa, oiemu tubuna lau hanamodia vadaeni hegeregerena. Inai bamona do idia noinoi, badina be oi ese lauegu oda oi kamonai henia dainai.”

¹⁹Aberahamo ese iena hesiai taudia ruaosi dekenai ia giroa lou, vadaeni ibounai idia giroa lou Bere Sieba dekenai, Aberahamo ena noho gabuna.

²⁰Gabeai Aberahamo ese hereva ta ia kamonai, iena tadina Nahoro ena adavana Milika ese natudia ia havaraia.

²¹Tau guna ena ladana be Usu, iena tadina be Busu bona Kemuela, Arama ena tamana,

²²Keseda bona Haso bona Pilidasa bona Idilapa bona Betuela.

²³Inai Betuela be Rebeka ena tamana. Inai natuna memero 8 be Milika ese ia havaraia Aberahamo ena tadina Nahoro dekenai.

²⁴Nahoro ena adavana iharuana Reuma ese danu natudia ia havaraia, edia ladana be Teba, bona Gahama bona Tahasa, bona Maka.