Read Buka Helaga (Hiri Motu) 1993 GENESE 23 Bible Online

GENESE 23 - Buka Helaga (Hiri Motu) 1993 bible

GENESE 23

¹Sara ena mauri lagani ibounai be 127.

²Sara be Kiriata Araba dekenai ia mase, unai hanua be Kanana tano dekenai, ma ena ladana ta be Heberona. Aberahamo be ruma dekenai ia raka vareai, Sara totona ia taitai.

³Vadaeni Aberahamo be mase rumana dekena amo ia diho, Hiti taudia dekenai ia hamaorodia, ia gwau,

⁴“Lau be umui emui huana dekenai idau tauna bamona lau noho, tano ta mani umui henia lau dekenai, lauegu guria gabuna dekenai do lau halaoa, unuseni lauegu hahine do lau guria.”

⁵Vadaeni, Hiti taudia ese idia haere, idia gwau,

⁶“Tau badana e, oi be lohia badana ta aiemai huana dekenai. Aiemai guria gabudia edia huana dekenai, gabu namo herea ta do oi abia hidi, oiemu hahine do oi guria, ai ta ta aiemai guria gabuna do ai koua diba lasi oi dekena amo.”

⁷Vadaeni Aberahamo ia toreisi, Hiti taudia edia vairana dekenai iena kwarana ia atoa diho,

⁸ia hamaoroa idia dekenai, ia gwau, “Bema umui emui lalona ia hegeregere, lauegu hahine iniseni bema lau guria, Eparona Sohara dekenai mani umui noia lau totona,

⁹ia ese Makapela nadi ena matuna, iena tano ena hetoa lalonai gauna bema ia henia lau dekenai, lau ese tano ena davana korikori do lau henia ia dekenai, lauegu guria gabuna do lau halaoa.”

¹⁰Inai Eparona be Hiti taudia edia huanai ia helai noho. Vadaeni Eparona, Hiti tauna, ese Aberahamo dekenai ia haere, Hiti taudia edia vairana dekenai, bona iena hanua taudia ibounai edia vairana dekenai, ia gwau,

¹¹“Tau badana e, lasi, unai tano mai ena nadi kohua danu do lau henia oi dekenai, lauegu bese taudia ibounai edia vairana dekenai dohore lau henia oi dekenai, oiemu hahine guria gabuna do oi halaoa.”

¹²Vadaeni Aberahamo ese unai gabu taudia, Hiti taudia edia vairana dekenai iena kwarana ia atoa diho.

¹³Vadaeni Aberahamo ese Eparona dekenai ia hereva, unai gabu taudia edia vairana dekenai, ia gwau, “Mani oi kamonai henia lau dekenai, unai tano ena davana mani lau henia oi dekenai, oi abia, vadaeni lauegu hahine unuseni do lau guria.”

¹⁴Vadaeni Eparona ese Aberahamo dekenai ia haere, ia gwau,

¹⁵“Tau badana e, oi kamonai, unai tano ena davana be siliva moni 400, ita ruaosi iseda huanai unai be gau ta, a? Oiemu hahine be unuseni do oi guria.”

¹⁶Aberahamo ese Eparona ena hereva ia kamonai, Hiti taudia edia vairana dekenai tano ena davana unai bamona ia gwauraia, vadaeni siliva moni 400 ia duahia, bona ia henia. Inai siliva moni ena metau be hoihoi taudia idia gaukaralaia noho moni ena metau hegeregerena.

¹⁷Unai dainai Eparona ena tano Makapela dekenai, Mamare ena badibadinai, mai ena kohua bona au danu ibounai be,

¹⁸Aberahamo ese iena tano korikori dekenai ia halaoa, Hiti taudia edia vairana dekenai, bona unai hanua lalonai idia haboua taudia ibounai edia vairana dekenai ia hoia.

¹⁹Vadaeni Aberahamo ese iena adavana Sara ia guria, Makapela nadi ena matuna lalonai, Mamare ena badibadinai. Unai gabu be Heberona, Kanana tano dekenai,

²⁰unai tano bona unai nadi matuna be Aberahamo ia abia momokani, iena guria gabuna, Hiti taudia dekena amo.