Read Buka Helaga (Hiri Motu) 1993 GENESE 24 Bible Online

GENESE 24 - Buka Helaga (Hiri Motu) 1993 bible

GENESE 24

¹Aberahamo be buruka vadaeni, iena mauri lagani be momo. Bona Lohiabada ese, Aberahamo ena kara ibounai lalonai, ia hanamoa vadaeni.

²Ia ese iena hesiai tauna badana, iena kohu ibounai ia naria tauna, dekenai ia oda, ia gwau, “Oiemu imana lauegu mamuna henunai oi atoa, bona gwauhamata oi henia.

³Lohiabada, guba bona tanobada edia Dirava ena ladana dekenai, lau ura oi gwauhamata, bona lau dekenai oi hamaoroa, oi be lauegu natuna Isako ena adavana do oi davaria lasi Kanana taudia dekena amo, edia gabu lau noho inai.

⁴Oi giroa lou lauegu tano korikori dekenai, bona unuseni, lauegu varavara dekena amo lauegu natuna Isako ena adavana oi abia.”

⁵To hesiai tauna ese ia nanadaia, ia gwau, “To edena bamona do lau karaia, bema inai kekeni ia ura lasi lau danu ia mai inai tano dekenai? Oiemu natuna do lau hakaua lao oiemu mai gabuna dekenai, be ia namo?”

⁶Aberahamo ia haere, ia gwau, “Lasi momokani. Lauegu natuna oi abia lao lasi unai gabu dekenai.

⁷Lohiabada, Guba ena Dirava ese tamagu ena ruma dekena amo, bona egu varavara edia tano dekena amo, lau ia mailaia iniseni, bona lau dekenai ia gwauhamata, inai tano be lauegu tubudia dekenai do ia henia. Ia ese iena aneru oiemu vairana dekenai do ia siaia, vadaeni unuseni adavana ta do oi davaria egu natuna dekenai.

⁸To bema inai kekeni ia ura lasi oi danu ia mai, vadaeni oiemu gwauhamata lau dekenai be ia ore. To gau tamona, lauegu natuna oi abia lao lasi unai gabu dekenai.”

⁹Vadaeni hesiai tauna ese iena biaguna Aberahamo ena mamuna henunai iena imana ia atoa, ia gwauhamata, iena biaguna ena ura hegeregere.

¹⁰Hesiai tauna ese iena biaguna ena kamelo ibounai 10 ia abia, davana bada harihari gaudia momo danu. Vadaeni, ia toreisi, ia lao Mesopotamia kahanai, hanua ta ladana Nahoro dekenai.

¹¹Ia ginidae neganai, ia ese hanua ena murimuri kahana dekenai kamelo ia hatuidia diho ranu guri badinai. Unai be adorahi kahana dekenai, bona hahine be ranu utua totona idia mai.

¹²Bona ia guriguri, ia gwau, “Lohiabada e, lauegu biaguna Aberahamo ena Dirava e, oi dekenai lau noinoi, hari dina lauegu gaukara mani oi hanamoa, bona oiemu gwauhamata lauegu biaguna Aberahamo dekenai mani oi hamomokania.

¹³Lau be iniseni, ranu guri dekenai lau noho, bona hanua kekeni be do idia mai, ranu utua totona.

¹⁴Lau be kekeni ta dekenai do lau hereva, do lau gwau, ‘Mani emu kara oiemu hodu oi atoa diho lao, bona ranu sisina lau dekenai do oi henia, do lau inua.’ Bema ia gwau, ‘Namo, oi inua, bona oiemu kamelo dekenai danu ranu do lau henia.’ Lau ura unai kekeni be oiemu abia hidi kekeni oiemu hesiai tauna Isako dekenai. Bema inai bamona ia vara neganai, do lau diba oiemu gwauhamata lauegu biaguna dekenai be oi hamomokania vadaeni.”

¹⁵Iena guriguri be ia ore lasi neganai, Rebeka ia ginidae. Iena pagana dekenai hodu ia huaia noho. Ia be Betuela ena natuna. Betuela be Milika ena natuna. Milika be Aberahamo ena tadina Nahoro ena adavana.

¹⁶Ia be tau ta ia do sihari lasi kekeni, bona hairai dikadika. Ranu guri dekenai ia diho lao, iena hodu ia hahonua, bona ma ia giroa mai noho.

¹⁷Vadaeni inai hesiai tauna ese ia dekenai ia heau lao, ia gwau, “Mani emu kara, oiemu hodu dekena amo ranu sisina lau dekenai oi henia, do lau inua.”

¹⁸Kekeni ia gwau, “Tau badana e, oi inua.” Iena hodu be iena pagana dekena amo ia atoa diho, ranu ia bubua, vadaeni ia inua.

¹⁹Ia inua, vadaeni kekeni ia gwau, “Ranu ma haida do lau utua, oiemu kamelo dekenai do lau henia, edia ura hegeregerena.”

²⁰Vadaeni karaharaga iena hodu ena ranu orena daramu lalonai ia bubua, bona ranu guri dekenai ia giroa lou, giroa lou, ia lao bona hesiai tauna ena kamelo ibounai idia inua vadaeni.

²¹Inai hesiai tauna ese ia itaia noho, ia hereva lasi. Ia ura diba Lohiabada ese iena laolao ena anina ia henia vadaeni o lasi.

²²Kekeni ese kamelo dekenai ranu ia henia vadaeni murinai, hesiai tauna ese davana bada golo rini ta ia abia, kekeni ena udu baubauna dekenai ia atoa. Bona golo gana badadia rua, imana gaudia, be kekeni ena imana dekenai ia atoa.

²³Ia nanadaia, ia gwau, “Oiemu tamana be daika, mani lau do oi hamaoroa? Oiemu tamana ena ruma lalonai be mai ena gabu, hari hanuaboi lau bona egu tatau do ai noho diba o lasi?”

²⁴Ia haere, ia gwau, “Lau be Betuela ena natuna, lauegu tubuna hahine ena ladana be Milika, Nahoro ena adavana.

²⁵Rei kakoro bona aniani momo aiemai ruma dekenai ia noho, bona oiemu mahuta gabuna ta danu ia noho.”

²⁶Vadaeni, inai tau ese ia tui diho, bona Lohiabada dekenai ia tomadiho henia.

²⁷Ia gwau, “Lohiabada, lauegu biaguna Aberahamo ena Dirava e, oi lau hanamoa, badina be oiemu gwauhamata lauegu biaguna dekenai oi hamomokania vadaeni. Oi Lohiabada ese maoromaoro lau oi hakaua, lauegu biaguna ena tadina ena ruma dekenai.”

²⁸Kekeni ese iena sinana ena ruma dekenai ia heau lao, sivarai ibounai ia hadibaia.

²⁹Rebeka ena taihuna ladana Labana ese ruma ena murimuri dekenai ia heau lao, ranu guri dekenai ia lao, unai tau ia davaria totona.

³⁰Ia ese golo rini bona gana iena taihuna imana dekenai ia itaia, bona unai tau ena hereva kekeni dekenai ia kamonai. Vadaeni, ia raka lao, unai ranu guri dekenai iena kamelo ia naria noho tauna dekenai, Aberahamo ena hesiai tauna be unai.

³¹Bona ia gwau, “Oi be Lohiabada ese ia hanamoa tauna ta, mani egu ruma dekenai oi raka vareai. Badina dahaka murimuri dekenai oi naria noho? Badina be lauegu ruma lalonai gabu ta lau karaia vadaeni oi dekenai, bona oiemu kamelo edia gabu ia noho danu.”

³²Vadaeni inai tau ese ruma lalonai ia raka vareai, bona Labana ese kamelo edia maduna ia kokia, rei kakoro bona aniani idia dekenai ia henia. Bona Aberahamo ena hesiai tauna bona iena memero dekenai ranu ia henia, idia edia aena idia huria totona.

³³Aniani idia atoa iena vairanai, to Aberahamo ena hesiai tauna ia gwau, “Lau be do lau ania lasi, ia lao bona lauegu laolao ena badina lau gwauraia guna.” Labana ia gwau, “Oi hereva.”

³⁴Vadaeni, ia gwau, “Lau be Aberahamo ena hesiai tauna.

³⁵Lohiabada ese lauegu biaguna ia hanamoa bada vadaeni, lohia badana ta ia halaoa vadaeni. Mamoe bona nanigosi momo, boromakau, siliva, golo, hesiai taudia, hesiai hahine, kamelo bona doniki ia dekenai ia henia vadaeni.

³⁶Lauegu biaguna ena adavana Sara ia buruka neganai, ia ese natuna mero ta ia havaraia. Lauegu biaguna ese inai mero dekenai iena kohu ibounai ia henia vadaeni.

³⁷Bona lauegu biaguna ese ia hamaoroa lau dekenai do lau gwauhamata, ia gwau, ‘Lauegu natuna ena adavana oi abia hidi lasi inai hari lau noho gabuna Kanana taudia edia tano dekena amo. Edia kekeni ta do oi abia hidi lasi,

³⁸to lauegu badu oiemu latanai do ia noho bema oi lao lasi lauegu tamana ena taudia, lauegu varavara edia huanai lauegu natuna ena adavana oi abia lasi neganai.’

³⁹“Vadaeni lauegu biaguna dekenai lau gwau, ‘To sedira bema kekeni ia mai lasi lau danu, edena bamona do lau karaia?’

⁴⁰“Ia haere, ‘Lohiabada, hanaihanai lau kamonai henia Dirava ese iena aneru do ia siaia oi danu, bona oiemu dala do ia kehoa, vadaeni lauegu varavara bona lauegu tamana ena ruma taudia edia huanai lauegu natuna ena adavana do oi davaria.

⁴¹Unai bamona oi karaia neganai, lauegu badu ia noho lasi oi dekenai. Bema lauegu varavara dekenai oi lao, to kekeni ta idia ura lasi henia oi dekenai, unai neganai danu lauegu badu do lau kokia oi dekena amo.’

⁴²“Bona hari dina, ranu guri dekenai lau mai neganai, lau guriguri, lau gwau, ‘Lohiabada e, lauegu biaguna Aberahamo ena Dirava, mani emu kara oi durua lau, lauegu laolao ena anina do oi havaraia.

⁴³Hari lau be ranu guri dekenai, bema kekeni ta ranu utua totona ia mai neganai, do lau hereva henia, lau gwau, “Mani emu kara ranu sisina oi henia oiemu hodu dekena amo, do lau inua.”

⁴⁴Bema ia haere, ia gwau, “Oi inua, bona oiemu kamelo edia ranu danu do lau henia.” Vadaeni, unai dekena amo do lau diba inai kekeni be Lohiabada ese ia abia hidi vadaeni, lauegu biaguna ena natuna ena adavana.’

⁴⁵“Unai bamona lau guriguri noho lalonai, Rebeka ia mai, hodu danu ia huaia ena pagana dekenai. Ia diho lao, ranu guri dekenai ranu utua totona. Ia dekenai lau gwau, ‘Mani emu kara, ranu sisina oi henia, lau inua.’

⁴⁶“Vadaeni, iena hodu ia atoa diho haraga, ia gwau, ‘Oi inua, bona oiemu kamelo edia ranu danu do lau utua.’ Vadaeni, lau inua, bona lauegu kamelo dekenai ranu ia henia.

⁴⁷Lau henanadaia, lau gwau, ‘Oiemu tamana be daika?’ Ia haere, ia gwau, ‘Lau be Betuela ena natuna, lauegu tubuna be Nahoro bona Milika.’ Vadaeni, rini be iena udu baubauna dekenai lau atoa, bona gana iena imana dekenai.

⁴⁸Vadaeni, lau tui diho, Lohiabada, lauegu biaguna Aberahamo ena Dirava dekenai lau hanamoa, badina ia ese lau ia hakaua namonamo. Vadaeni lauegu biaguna ena tadina dekenai lau mai, iena natuna lau davaria, lauegu biaguna ena natuna do ia adavaia totona.

⁴⁹Unai dainai mani oi hereva, lauegu biaguna dekenai do oi bogahisihisi, bona hanamoa kara ia dekenai do oi karaia. Bema lasi, mani oi hamaoroa lau, vadaeni do lau diba edena bamona do lau karaia.”

⁵⁰Vadaeni, Labana bona Betuela idia haere, idia gwau, “Inai kara be Lohiabada dekena amo ia mai. Ai be do ai haere diba lasi, ‘Oibe’ o ‘Lasi’.

⁵¹Rebeka be inai, oi abia, oi hakaua lao, oiemu biaguna ena natuna do ia adavaia, Lohiabada ena hereva hegeregere.”

⁵²Aberahamo ena hesiai tauna ese unai hereva ia kamonai, vadaeni tano dekenai iena kwarana ia atoa diho, Lohiabada ia hanamoa.

⁵³Bona ia ese siliva gaudia, golo gaudia, bona dabua Rebeka dekenai ia henia, iena taihuna bona iena sinana dekenai danu davana bada harihari gaudia ia henia.

⁵⁴Gabeai, Aberahamo ena hesiai tauna mai ena bamona taudia be idia aniani bona idia inuinu, vadaeni idia mahuta unuseni. Dabai idia toreisi, vadaeni hesiai tauna ia gwau, “Mani lau oi siaia, lau giroa lou lauegu biaguna dekenai.”

⁵⁵To kekeni ena taihuna bona ena sinana idia gwau, “Mani emu kara kekeni be ai dekenai do ia noho pura ta o dina 10, vadaeni, gabeai ia lao.”

⁵⁶To ia gwau, “Umui dogoatao lasi lau, Lohiabada ese lauegu laolao ena anina ia havaraia vadaeni, mani lau oi siaia, lau giroa lou lauegu biaguna dekenai.”

⁵⁷Vadaeni, idia gwau, “Namo ita boiboi kekeni dekenai, iena hereva do ita kamonai.”

⁵⁸Unai dainai, Rebeka dekenai idia boiboi, idia nanadaia, idia gwau, “Oi ura inai tau danu umui lao?” Ia haere, ia gwau, “Lau ura lau lao.”

⁵⁹Unai dainai, edia taihuna Rebeka, mai ena hesiai kekeni danu idia siaia lao, Aberahamo ena hesiai tauna mai ena bamona taudia danu.

⁶⁰Idia ese Rebeka idia hanamoa, idia gwau: “Aiemai taihuna e, oi be dohore taunimanima momo herea edia sinana. Oiemu natudia ese do idia kwalimu, tuari taudia ese edia hanua idia tuari henia neganai.”

⁶¹Rebeka mai iena hesiai kekenidia idia toreisi, bona kamelo idia guia, hesiai tauna danu idia lao. Inai bamona dala dekenai hesiai tauna ese Rebeka ia hakaua lao.

⁶²Unai neganai Isako be diho kahana ladana Negebe dekenai ia noho. Ia be taunimanima noho lasi gabuna dekenai ia laolao, bona ranu guri ta ladana “Lau ia itaia noho Mauri Tauna ena ranu guri” dekenai ia lao.

⁶³Adorahi ta, dina ia diho kahirakahira neganai, Isako be tano palaka dekenai ia loaloa, bona ia itaia be kamelo idia mai.

⁶⁴Rebeka ese danu Isako ia itaia, bona iena kamelo dekena amo ia diho,

⁶⁵hesiai tauna dekenai ia nanadaia, ia gwau, “Unai hari tano palaka dekena amo ia mai tauna be daika?” Hesiai tauna ia gwau, “Ia be lauegu biaguna.” Vadaeni Rebeka ese dabua ta ia abia, iena vairana ia koua.

⁶⁶Hesiai tauna ese ena kara ibounai Isako dekenai ia hamaoroa.

⁶⁷Vadaeni Isako ese Rebeka ia hakaua lao, iena sinana Sara ena palai ruma dekenai ia hakaua vareai, bona ia adavaia. Isako ese Rebeka ia ura henia bada. Unai dainai inai lalokau ese iena lalona ia hanamoa, sinana ena mase dekenai ia taitai neganai.