Read Buka Helaga (Hiri Motu) 1993 GENESE 26 Bible Online

GENESE 26 - Buka Helaga (Hiri Motu) 1993 bible

GENESE 26

¹Hitolo bada ia vara unai tano dekenai, Aberahamo ia noho neganai bamona. Vadaeni, Isako ia toreisi, Gerara dekenai ia lao, Abimeleka, Pilistia ena king dekenai.

²Vadaeni Lohiabada ese Iakobo dekenai ia hedinarai, ia gwau, “Aigupito dekenai oi lao lasi, dohore lau hadibaia oi tanona dekenai oi noho.

³Inai tano dekenai oi noho, vadaeni dohore lau durua oi, bona do lau hanamoa oi, badina be inai tano ibounai do lau henia oi, bona oiemu natuna bona oiemu tubuna dekenai do lau henidia, oiemu tamana Aberahamo dekenai gwauhamata lau henia hegeregerena.

⁴Oiemu natuna bona oiemu tubuna danu dohore idia momo herea, guba ena hisiu bamona dohore idia momo herea, bona oiemu natuna bona oiemu tubuna dainai tanobada ena bese ibounai namo bada dohore idia davaria.

⁵Badina be Aberahamo ese lauegu gadona ia kamonai, bona lauegu hereva, lauegu sisiba, lauegu taravatu, ibounai ia badinaia.”

⁶Unai dainai Isako be Gerara dekenai ia noho.

⁷Unai gabu taudia ese iena adavana totona idia nanadaia ia dekenai, vadaeni ia gwau, “Ia be lauegu taihuna.” “Ia be lauegu adavana,” dohore ia gwau be ia gari, badina be ia gwau: “Inai gabu taudia ese do idia alaia mase lau, Rebeka totona, badina ia be hahine namo herea.”

⁸Nega daudau unai bamona idia noho, vadaeni dina ta Abimeleka, Pilistia ena king, uindo dekena amo iena matana ia negea lao, Isako ena adavana Rebeka danu ia itadia, idia ruaosi gadara dekenai idia rosia.

⁹Vadaeni ia ese Isako dekenai ia gwau henia, ia gwau, “Lauegu lalona ia kehoa vadaeni, hahine be oiemu adavana. Dahaka totona oi gwau, ‘Inai be lauegu taihuna.’ ” Isako ia haere ia dekenai, ia gwau, “Badina be lau gari, haida ese ia totona lau do idia alaia mase garina.”

¹⁰Vadaeni Abimeleka ia gwau, “Oi be edena bamona oi karaia vadaeni ai dekenai? Bema tau ta oiemu adavana danu idia mahuta gabu tamona dekenai, ai ibounai be do ai kerere oi totona.”

¹¹Vadaeni Abimeleka ese iena hanua taudia dekenai taravatu ia atoa, ia gwau, “Isako o iena adavana ia hadikaia tauna be, dohore ia mase.”

¹²Isako ese aniani ia hadoa unai tano dekenai, vadaeni unai lagani tamona lalonai ia hadoa gaudia edia anina be momo herea ia abia, badina be Lohiabada ese ia hanamoa.

¹³Ia be kohu momo tauna, bona aniani momo tauna Dirava ese ia halaoa, badina iena kohu bona iena aniani be idia momo herea noho.

¹⁴Iena mamoe bona iena boromakau be momo herea, iena hesiai taudia danu idia momo. Vadaeni Pilistia taudia idia badu ia dekenai.

¹⁵Vadaeni ranu guri, iena tamana Aberahamo ena nega dekenai iena hesiai taudia idia geia gaudia be, Pilistia taudia ese tano dekenai idia koua.

¹⁶Vadaeni Abimeleka ese Isako dekenai ia hamaoroa, ia gwau, “Ai dekena amo oi raka siri, badina be oiemu goada ese aiemai goada ia hanaia vadaeni.”

¹⁷Vadaeni Isako ia raka siri, Gerara ena koura dekenai ia kamepa, unuseni ia noho.

¹⁸Vadaeni ranu guri ibounai, iena tamana Aberahamo ena nega dekenai idia geia, bona Pilistia taudia ese tano dekenai idia koua, be ia ese ma ia geia lou, bona edia ladana iena tamana ese ia atoa hegeregerena, ia ese ma ia atoa lou.

¹⁹Isako ena hesiai taudia danu ese koura dekenai guri idia geia, bona ranu ia lohilohi gabuna ta idia davaria.

²⁰Gerara bese taudia edia mamoe bona boromakau naria taudia be Isako ena mamoe bona boromakau naria taudia danu idia heatu, idia gwau, “Inai be aiemai ranu.” Unai dainai Isako ese unai ranu guri ena ladana ia atoa Eseka, ena anina be, Heai, badina be idia heai inai ranu totona.

²¹Vadaeni guri ta ma idia geia, to unai totona danu idia heatu, unai dainai iena ladana ia atoa Sitina, ena anina be, Heatu.

²²Unai gabu dekena amo idia be ma idia raka siri, vadaeni guri ta ma idia geia. Unai totona be idia heatu lasi, unai dainai iena ladana ia atoa Rehoboto, anina be, Gabu, badina be ia gwau, “Lohiabada ese gabu ta ia kehoa vadaeni ita dekenai, iniseni do ita noho namonamo.”

²³Unai gabu dekena amo Isako be Bere Sieba dekenai ia lao.

²⁴Vadaeni unai hanuaboi Lohiabada be ia dekenai ia hedinaraia, ia gwau, “Lau be oiemu tamana Aberahamo ena Dirava, vadaeni oi gari lasi, badina be lau ese lau durua noho oi, do lau hanamoa oi dekenai bona oiemu natuna bona oiemu tubuna dohore idia momo herea, lauegu hesiai tauna Aberahamo dainai.”

²⁵Vadaeni Isako ese boubou patana unuseni ia karaia, bona Lohiabada ena ladana ia hanamoa. Unuseni danu ia kamepa, bona iena hesiai taudia ese ranu guri idia geia.

²⁶Abimeleka be Gerara dekena amo ia mai, ia bona iena turana ta Ahusata, bona iena tuari oreana ena biaguna, Pikola idia toiosi Isako dekenai idia mai.

²⁷Vadaeni Isako ia hereva idia dekenai, ia gwau, “Umui badu henia lau dekenai, bona umui lulua lau, harihari lau dekenai umui mai vadaeni, badina be dahaka?”

²⁸Idia gwau, “Aiemai lalona ia kehoa vadaeni, Lohiabada ese ia durua vadaeni oi dekenai, unai dainai ai gwau be, maino ita karaia, bona gwauhamata ita karaia, oi dekenai bona ai dekenai.

²⁹Ai dekenai oi hadikaia lasi, oi dekenai ai hadikaia lasi bamona. Kara namodia sibona ai karaia vadaeni oi dekenai, mai maino danu ai siaia oi, bona harihari Lohiabada ia hanamoa oi dekenai.”

³⁰Vadaeni Isako ese aria ia karaia, ibounai idia aniani hebou, bona idia inuinu hebou.

³¹Dabai idia toreisi, idia ta ta dekenai idia gwauhamata, vadaeni Isako ese ia siaidia lao, mai maino danu idia lao.

³²Unai dina dekenai Isako ena hesiai taudia be ia dekenai idia lao, guri idia geia herevana idia hamaoroa ia dekenai, idia gwau, “Ranu ai davaria vadaeni.”

³³Vadaeni unai ranu guri ena ladana ia atoa Sieba, unai dainai unai hanua ena ladana be Bere Sieba ia mai bona harihari.

³⁴Esau ena mauri lagani be 40, vadaeni ia headava, hahine rua ia abia. Iuditi, Beri, Hiti tauna ena natuna, bona Basemata, Elona, Hiti tauna ena natuna.

³⁵To Isako bona Rebeka edia lalona idia hekwarahi momo unai hahine ruaosi dainai.