Read Buka Helaga (Hiri Motu) 1993 GENESE 27 Bible Online

GENESE 27 - Buka Helaga (Hiri Motu) 1993 bible

GENESE 27

¹Isako be ia buruka vadaeni, iena matana danu ia diburadibura, gau ta ia itaia namonamo lasi. Vadaeni iena vara guna natuna Esau ia boiria, ia gwau, “Natugu e.” Esau ia gwau, “Lau inai.”

²Isako ma ia gwau, “Oi mai itaia lau. Lau buruka vadaeni, lauegu mase dinana be lau diba lasi.

³Unai dainai lau noinoi oi dekenai, oiemu diba bona oiemu peva oi abia, oi lao labana, dia ta oi alaia lauegu.

⁴Vadaeni vamu namona, lauegu lalona ese ia ura henia hegeregerena do oi nadua, lau dekenai oi mailaia, lau ania, vadaeni do lau mase lasi neganai, lau ese oi do lau hanamoa guna.”

⁵Inai hereva Isako ese iena natuna Esau dekenai ia hamaoroa, be Rebeka danu ia kamonai. Vadaeni Esau be ia lao labana, dia ta do ia alaia, ia mailaia gwauraia.

⁶Vadaeni Rebeka ese iena natuna Iakobo dekenai ia hereva henia, ia gwau, “Oiemu tamana ese oiemu kakana Esau dekenai ia hamaoroa herevana lau kamonai,

⁷ia gwau, ‘Dia ta oi mailaia, vamu namona oi nadua lauegu, lau ania, vadaeni do lau mase lasi neganai, Lohiabada ena vairana dekenai oi do lau hanamoa guna.’

⁸Unai dainai, natugu e, lauegu hereva oi kamonai, oi dekenai lau hamaoroa hegeregerena sibona do oi karaia.

⁹Oi lao, nani edia natuna namodia rua oi abia, lau dekenai oi mailaia, vadaeni, lau ese vamu namona do lau halaoa oiemu tamana ena, ia ura henia gauna hegeregerena.

¹⁰Vadaeni oi abia lao oiemu tamana dekenai, ia ania, vadaeni do ia mase lasi neganai do ia hanamoa oi.”

¹¹Vadaeni Iakobo ese iena sinana Rebeka dekenai ia haere, ia gwau, “Lauegu kakana Esau ena kopina be mai huihui danu, to lauegu kopina be manadamanada.

¹²Sedira lauegu tamana ese lauegu kopina do ia dogoatao, do ia diba lau be koikoi tauna, vadaeni hadikaia herevana do ia gwauraia lau dekenai, do ia hanamoa lasi lau dekenai.”

¹³Iena sinana ia gwau, “Hadikaia herevana be lauegu latanai do ia noho, lauegu hereva oi kamonai, oi lao, nani natuna rua oi abia, lau dekenai oi mailaia.”

¹⁴Vadaeni ia lao, ia abia, iena sinana dekenai ia mailaia. Vadaeni iena sinana ese vamu namona ia nadua, iena tamana ese ia ura henia gauna hegeregerena.

¹⁵Vadaeni Rebeka ese iena vara guna natuna Esau ena dabua namona ta ruma dekenai ia abia, iena natuna Iakobo dekenai ia atoa.

¹⁶Nani edia natuna kopidia danu iena imana ruaosi bona aiona dekenai ia atoa.

¹⁷Vadaeni inai vamu namona bona paraoa ia karaia hegaegae, iena natuna Iakobo dekenai ia henia.

¹⁸Iakobo be iena tamana dekenai ia lao, ia gwau, “Tamagu e.” Isako ia haere, ia gwau, “Lau inai. Natugu e, oi be daika?”

¹⁹Iakobo ese iena tamana dekenai ia haere henia, ia gwau, “Lau inai, Esau, oiemu vara guna natuna, oiemu hereva lau badinaia vadaeni, oi toreisi, dia ta lau alaia vadaeni do oi ania, vadaeni oi hanamoa lau dekenai.”

²⁰Vadaeni Isako ese iena natuna dekenai ia nanadaia, ia gwau, “Natugu e, edena bamona oi davaria haragaharaga?” Ia haere, ia gwau, “Badina be Lohiabada, oiemu Dirava ese ia durua lau dekenai.”

²¹Vadaeni Isako ese Iakobo dekenai ia hamaoroa, ia gwau, “Natugu e, mani oi mai kahirakahira, oiemu kopina do lau dogoatao, oi be momokani lauegu natuna Esau o lasi.”

²²Vadaeni Iakobo be iena tamana Isako dekenai ia lao kahirakahira, iena kopina ia dogoatao, vadaeni ia gwau, “Gadona be Iakobo ena gadona, to imana be Esau ena imana.”

²³Ia diba lasi unai be Iakobo, badina iena imana be mai huihui danu, iena kakana Esau ena imana bamona, unai dainai Isako ese ia hanamoa hamatamaia.

²⁴Vadaeni Isako ia gwau, “Momokani, oi be lauegu natuna korikori Esau, ani?” Ia gwau, “Oibe.”

²⁵Vadaeni Isako ia gwau, “Oiemu vamu mani oi mailaia, do lau ania. Unai murinai lauegu hanamoa do lau henia oi dekenai.” Unai dainai, Iakobo ese ia mailaia, vadaeni ia ania, uaina danu ia mailaia, vadaeni ia inua.

²⁶Vadaeni, iena tamana Isako ese ia hamaoroa, ia gwau, “Natugu e, oi mai kahirakahira, oi kisi henia lau dekenai.”

²⁷Vadaeni ia lao kahirakahira, ia kisi henia. Isako ese iena dabua ena bonana ia kamonai, vadaeni ia hanamoa, ia gwau, “Namo, egu natuna ena bonana be, Lohiabada ese uma namona ia hanamoa ena bonana bamona.

²⁸Unai dainai guba ena medu Dirava ese oi do ia henia, bona oiemu uma tano do ia hanamoa. Uiti momo bona uaina momo danu do ia henia oi dekenai.

²⁹Idau bese taudia ese, oiemu hesiai gaukara do idia karaia. Bese idauidau ese, oiemu vairana dekenai do idia tui diho. Oiemu tadikakana edia biaguna, be do idia halaoa oi. Oiemu sinana ena natuna be oiemu vairana dekenai, edia kwarana do idia atoa diho. Oi dekenai idia hadikaia taudia, be do idia hadikaia. Oi dekenai idia hanamoa taudia, be do idia hanamoa.”

³⁰Isako ese Iakobo dekenai hana-moa ia haorea, bona Iakobo danu Isako ena vairana dekena amo ia raka siri. Vadaeni nega sisina sibona murinai, iena kakana Esau be labana dekena amo ia ginidae.

³¹Ia danu vamu namona ia nadua, iena tamana dekenai ia abia lao, iena tamana ia hamaoroa, ia gwau, “Tamagu e, oi toreisi, oiemu natuna lauegu vamu oi ania, vadaeni oi hanamoa lau dekenai.”

³²Iena tamana Isako ese ia nanadaia, ia gwau, “Oi be daika?” Esau ia haere, ia gwau, “Lau inai, oiemu vara guna natuna Esau.”

³³Vadaeni Isako be iena kudouna dekenai ia hoa mai gari danu, ia gwau, “Inai tau be daika, vamu ia alaia, ia mailaia lau dekenai, oi do mai lasi neganai lau ania ore, vadaeni lau hanamoa ia dekenai? Momokani, ia ese hanamoa ena anina dohore ia abia.”

³⁴Esau ese iena tamana ena hereva ia kamonai neganai ia tai, ia tai mai boiboi danu, iena tamana dekenai ia taitai, ia gwau, “Lau danu, tamagu e, oi hanamoa lau dekenai.”

³⁵Iena tamana ia gwau, “Oiemu tadina ia mai vadaeni, mai ena koikoi danu, oi dekenai hanamoa totona gauna be ia dadia vadaeni.”

³⁶Esau ia gwau, “Iena ladana be Iakobo, mai ena anina, ani? Badina be nega rua ia ese lau dekenai ia koikoi vadaeni. Lauegu vara guna ena hanamoa ia abia guna, harihari danu, lau dekenai hanamoa gauna ia abia vadaeni. Lau dekenai hanamoa ta ia noho lasi, a?”

³⁷Isako ese Esau dekenai ia haere henia, ia gwau, “Inai, Iakobo be oiemu biaguna lau halaoa vadaeni, bona iena varavara taudia ibounai lau henia vadaeni, iena hesiai taudia do idia lao, uiti bona uaina danu lau gwauraia vadaeni iena. Natugu e, dahaka do lau karaia oi dekenai?”

³⁸Vadaeni Esau ese iena tamana dekenai ia hamaoroa, ia gwau, “Tamagu e, oiemu hanamoa be tamona sibona, a? Tamagu e, lau danu oi hanamoa.” Vadaeni Esau ia tai dikadika.

³⁹Vadaeni iena tamana Isako ia haere henia, ia gwau, “Tano namona gabuna dekenai do oi noho lasi, guba ena medu ese, oiemu uma tano do ia hanamoa lasi.

⁴⁰To oiemu kaia ena goada dekenai dohore oi mauri. Oiemu tadina ena hesiai gaukara do oi karaia, to negana be do ia ginidae, oiemu siahu dohore ia bada. Unai neganai iena siahu, oiemu mauri dogoatao siahuna do oi negea.”

⁴¹Esau ese Iakobo ia badu henia, iena tamana ena hanamoa dainai, vadaeni iena lalona dekenai ia gwau, “Lauegu tamana ena mase dinana ia kahirakahira, unai murinai lauegu tadina Iakobo do lau alaia mase.”

⁴²Haida ese Esau ena hereva Rebeka dekenai idia hamaoroa, vadaeni Rebeka ese iena natuna Iakobo ia boiria, ia hamaoroa, ia gwau, “Oi kamonai, oiemu kakana Esau ena laloa be, oi do ia alaia mase gwauraia.

⁴³Unai dainai, natugu e, lauegu hereva oi kamonai, oi toreisi haraga, Harana hanua dekenai oi lao, lauegu taihuna Labana dekenai.

⁴⁴Nega sisina ia dekenai do oi noho, ia lao bona oiemu kakana ena lalona do ia keruma.

⁴⁵Ia be do ia laloaboio edena bamona oi karaia ia dekenai, vadaeni iena badu do ia ore, unai neganai hereva do lau siaia, vadaeni do oi giroa mai. Umui ruaosi dina tamona lau dekena amo dohore umui boio ena anina be dahaka?”

⁴⁶Vadaeni Rebeka ese Isako dekenai ia hereva henia, ia gwau, “Lau hesiku vadaeni inai Hiti hahine taudia totona. Bema Iakobo ese inai Hiti taudia edia natuna, inai tano dekenai idia noho ta do ia adavaia, lauegu noho be dohore edena bamona?”