Read Buka Helaga (Hiri Motu) 1993 GENESE 34 Bible Online

GENESE 34 - Buka Helaga (Hiri Motu) 1993 bible

GENESE 34

¹Iakobo bona Lea edia natuna hahine ladana Daina be ia loaloa, unai tano dekenai noho hahine haida ia vadivadi henidia totona.

²Vadaeni, unai tano ena lohia tauna ena ladana Hamoro, Hivi tauna, ena natuna Sekema ese Daina ia itaia, ia rosia, vadaeni ia kara dika henia.

³To Sekema ese unai kekeni ia ura henia dikadika, bona ia lalokau henia dainai, Daina ena lalona hanamoa totona bogahisihisi hereva ia henia.

⁴Unai murinai iena tamana Hamoro dekenai ia noinoi, ia gwau, “Unai kekeni mani oi abia, lau ura lau adavaia.”

⁵Iakobo be hereva ia kamonai, iena natuna kekeni, tau ta ese ia hadikaia vadaeni. To iena natuna be gabu ta dekenai boromakau idia naria dainai, kara ta ia karaia lasi ela bona idia giroa mai.

⁶Vadaeni Hamoro, Sekema ena tamana be Iakobo dekenai ia lao, do idia herevahereva totona.

⁷Unai neganai Iakobo ena natuna be boromakau naria gaukara dekena amo idia giroa mai vadaeni. Unai hereva idia kamonai neganai, idia hoa, bona idia badu dikadika, badina be unai tau ese Israela taudia dekenai kara dikana ia karaia, Iakobo ena natuna kekeni ia hadikaia dainai. Badina be kara unai bamona be taravatu bada herea.

⁸To Hamoro ese ia hereva idia dekenai, ia gwau, “Lauegu natuna Sekema be oiemu natuna kekeni ia ura henia dikadika, mani emu kara do oi henia, do ia adavaia.

⁹Iseda bese ruaosi ita hakapua be namo, umui ese emui kekeni umui henia ai dekenai, idia headava, ai danu aiemai kekeni do ai henia umui dekenai, idia headava.

¹⁰Unai neganai aiemai huana dekenai do umui noho, aiemai tano be umui emui tano do umui halaoa, iniseni uma gabudia do umui karaia, do umui hoihoi, bona hanua do umui karaia.”

¹¹Sekema ese danu Daina ena tamana bona taihuna dekenai ia hereva, ia gwau, “Bema lauegu noinoi umui abia dae neganai, dahaka umui gwauraia lau dekenai be do lau henia umui dekenai.

¹²Bema umui ura davana umui habadaia momokani, be do lau henia umui dekenai, to gau tamona unai kekeni umui henia lau dekenai, lau adavaia totona.”

¹³Iakobo ena natuna ese Sekema bona iena tamana Hamoro dekenai koikoi dala dekenai idia haere henia, badina edia taihuna Sekema ese ia hadikaia dainai.

¹⁴Idia gwau, “Aiemai taihuna be usina ena kopina ia utua lasi tauna do ia adavaia diba lasi, unai be aiemai taravatu.

¹⁵Unai bamona kara ita karaia ena dala be tamona mo, umui emui tatau ibounai ese usina ena kopina utua taravatu do umui abia.

¹⁶Unai murinai aiemai kekeni do ai henia umui dekenai, idia headava, bona umui emui kekeni do umui henia ai dekenai, idia headava. Umui emui huanai do ai noho, bona bese tamona do ita halaoa.

¹⁷To bema aiemai hereva umui abia dae lasi, kopina utua taravatu umui abia lasi neganai, kekeni do ai abia, bona do ai rakatania umui.”

¹⁸Hamoro bona Sekema ese inai hereva idia kamonai neganai idia moale.

¹⁹Sekema ese edia hereva gauna ia ura karaia haraga, badina be ia ese Iakobo ena natuna kekeni ia ura henia dikadika dainai. Iena tamana ena bese edia huanai ia be tau badana momokani.

²⁰Vadaeni Hamoro bona iena natuna Sekema idia lao hanua ena magu iduara dekenai, hanua taudia idia haboua, bona idia hereva henidia, idia gwau,

²¹“Inai taunimanima be turana karaia idia ura, inai dainai iseda tano dekenai idia noho ita danu be ia namo. Uma gabudia idia karaia, bona idia hoihoi be ia namo, badina be tano ia bada. Edia natuna kekeni do ita adavaia, bona iseda natuna kekeni do ita henia, idia adavaia.

²²To dala tamona mo dekena amo edia laloa be do ia tamona ita danu. Ita ese kopina utua kara do ita abia, idia edia kara hegeregerena. Unai murinai ita huana dekenai do idia noho, bona bese tamona do ita halaoa.

²³Idia edia boromakau, edia kohu, bona edia ubua gaudia be do ita abia, ani? Unai dainai ita huanai idia noho ena laloa do ita abia dae.”

²⁴Hanua taudia ibounai ese Hamoro bona Sekema edia hereva idia abia dae, bona tatau ibounai ese kopina utua kara idia abia.

²⁵Dina toi murinai, tatau be idia hisihisi noho, kopina utua kara dainai. Unai neganai Iakobo ena natuna rua, Simeona bona Levi, Daina ena taihuna ese edia kaia idia abia, hanua dekenai idia vareai lao hunia dala dekenai, bona tatau ibounai idia alaia mase.

²⁶Hamoro bona iena natuna Sekema danu kaia dekena amo idia alaia mase. Daina danu Sekema ena ruma dekena amo idia hakaua diho, vadaeni idia lao.

²⁷Vadaeni Iakobo ena natuna tatau ma haida be idia lao, Sekema taudia idia davaria, idia mase vadaeni. Vadaeni idia ese mai bero taudia idia alaia, bona hanua ena kohu idia henaoa ore, badina be edia taihuna dekenai hemarai kara idia karaia dainai.

²⁸Edia mamoe bona edia boromakau bona edia doniki bona edia ruma kohu bona edia aniani, uma gabudia dekenai noho gaudia bona hanua dekenai noho gaudia danu idia abia lao.

²⁹Edia hahine mai natudia mai mauri danu idia abia. Edia kohu ibounai, bona ruma lalonai noho gau ibounai idia abia lao.

³⁰Vadaeni Iakobo ese Simeona bona Levi dekenai ia gwau henia, ia gwau, “Lau dekenai kerere umui havaraia vadaeni, bona lauegu ladana umui hadikaia vadaeni inai tano noho taudia edia huanai. Kanana taudia bona Perisi taudia be hari lau dekenai do idia badu henia. Ita be momo lasi dainai idia be do idia haboua, do idia tuari ita dekenai, vadaeni, lau bona lauegu bese ibounai be do ita mase ore.”

³¹To idia haere, idia gwau, “Be! Aiemai taihuna be sihari henia kava hahine idia halaoa be ia namo o lasi?”