Read Buka Helaga (Hiri Motu) 1993 GENESE 35 Bible Online

GENESE 35 - Buka Helaga (Hiri Motu) 1993 bible

GENESE 35

¹Dirava ese Iakobo dekenai ia hereva, ia gwau, “Oi toreisi, Betele dekenai oi lao, unuseni oi noho. Unuseni boubou patana ta oi karaia lau Dirava egu. Badina be oiemu kakana Esau dekena amo oi heau neganai, lau Dirava be oi dekenai lau hedinarai.”

²Unai dainai, Iakobo ese iena orea taudia ibounai dekenai ia hereva, ia gwau, “Idau dirava umui dekenai idia noho gaudia umui negea, umui sibona umui hagoevaia, dabua miro lasi umui karaia.

³Ita lao Betele, unuseni lauegu kerere lalonai lau ia durua bona egu dala ibounai lau ia bamoa Diravana ena boubou patana do lau karaia.”

⁴Vadaeni idia ese edia idau dirava bona edia taiana rini be Iakobo dekenai idia henia. Iakobo ia abidia, vadaeni Sekema kahirakahira dekenai ouki auna ta henunai ibounai ia guria.

⁵Iakobo mai ena natuna ese unai gabu idia rakatania neganai, unuseni noho hanua ta ta taudia ibounai idia gari bada Dirava dekenai, vadaeni idia ese Iakobo dekenai idia tuari henia lasi.

⁶Vadaeni Iakobo mai ena orea taudia ibounai be Lusu hanua, Kanana tano dekenai idia ginidae. Lusu be Betele ena ladana ta.

⁷Unuseni Iakobo ese boubou patana ta ia karaia, bona gabu ena ladana ia atoa El Betele, ena anina be “Betele ena Dirava.” Badina be unai gabu dekenai Dirava ese Iakobo dekenai ia hedinarai, iena kakana dekena amo ia heau neganai.

⁸Unai neganai Rebeka ena hesiai hahine, ena ladana Debora, ia mase. Vadaeni Betele ena henuna kahana dekenai idia guria, ouki auna ta henunai. Unai gabu ena ladana idia atoa Alono Bakutu, ena anina be “taitai ena auna.”

⁹Iakobo ese Mesopotamia dekena amo ia giroa mai neganai, Dirava ese ia dekenai ia hedinarai, ia hanamoa.

¹⁰Ia hamaoroa, ia gwau, “Oiemu ladana be Iakobo, to oiemu ladana do idia gwauraia lou lasi Iakobo. Harihari ia lao hanaihanai, oiemu ladana do idia gwauraia, Israela.” Unai dainai Dirava ese Iakobo ena ladana ia gwauraia Israela, ena anina be “Dirava danu ia goada helulu.”

¹¹Vadaeni Dirava ese ia hamaoroa, ia gwau, “Lau be Siahu Ibounai Dirava. Natuna momo do oi havaraia, oiemu natuna bona tubuna be do idia momo herea. Bese momo be oi dekena amo do idia vara. Bona haida danu king dagi do idia abia.

¹²Aberahamo bona Isako dekenai lau henia tanona be oi danu dekenai do lau henia, bona oiemu bese oiemu murinai idia vara danu, be inai tano do lau henidia.”

¹³Vadaeni Dirava ese ia rakatania, bona ia hereva henia gabuna danu ia rakatania.

¹⁴Vadaeni Iakobo ese laloatao nadi ta ia haginia unai gabu dekenai. Uaina be nadi ena latanai ia bubua, iena harihari gauna Dirava dekenai, bona dehoro danu unai nadi latanai ia bubua.

¹⁵Dirava ese ia hereva henia unai gabu dekenai, vadaeni Iakobo ese gabu ena ladana ia gwauraia Betele, ena anina be “Dirava ena ruma.”

¹⁶Iakobo mai ena famili, bona iena orea taudia be Betele dekena amo idia raka lao lou, ela bona Eparata hanua ia kahirakahira. Unai neganai, Rahela be mara ena hisihisi mamina ia abia, bona iena mara be ia auka.

¹⁷Iena mara ena hisihisi ia bada herea neganai, durua henia hahine ese ia hamaoroa, ia gwau, “Oi gari lasi, mero ta do oi abia.”

¹⁸To unai neganai ia mase, ia mase noho neganai, iena hereva dokona dekenai mero ena ladana ia atoa Benoni, anina be “Egu lalohisihisi merona.” To gabeai tamana ese mero ena ladana ia atoa Beniamina, ena anina be “Lauegu imana idibana merona.”

¹⁹Unai bamona Rahela ia mase, vadaeni Eparata ena dala badinai idia guria. Unai Eparata ena ladana ta be Betelehema.

²⁰Iakobo ese laloatao nadi ia haginia Rahela ena guria gabu dekenai. Inai nadi, ladana be “Rahela ena laloatao nadi” be do ia noho unuseni, ia mai bona harihari danu.

²¹Israela ma ia raka lao, kohoro ena ladana Mamoe edia Kohoro unai kahana dekenai ia kamepa.

²²Israela ese unai tano dekenai ia noho neganai, Rubena ese iena tamana ena adavana ta Bileha danu idia mahuta hebou. Israela ese inai sivarai ia kamonai neganai ia badu momokani. Iakobo ena natuna tatau be 12.

²³Lea ena natuna tatau be inai: Rubena, Iakobo ena vara guna natuna, bona Simeona, Levi, Iuda, Isakara bona Sebuluno.

²⁴Rahela ena natuna tatau be inai: Iosepa bona Beniamina.

²⁵Rahela ena hesiai hahine Bileha ena natuna tatau be inai: Dano bona Napatali.

²⁶Lea ena hesiai hahine Silipa ena natuna tatau be inai: Gado bona Asere. Inai natuna tatau be Iakobo ese ia abia Mesopotamia dekenai.

²⁷Iakobo be iena tamana Isako dekenai ia lao, Mamare dekenai. Unai gabu ena ladana ta be Kiriata Araba, ma ena ladana ta be Heberona, Aberahamo bona Isako edia noho gabuna be unai.

²⁸Isako ena mauri lagani be 180.

²⁹Vadaeni ia mase, iena tubuna bona tamana dekenai ia haboua lao. Ia be tau buruka, iena mauri be ia daudau herea vadaeni. Iena natuna Esau bona Iakobo ese idia guria.