Read Buka Helaga (Hiri Motu) 1993 GENESE 38 Bible Online

GENESE 38 - Buka Helaga (Hiri Motu) 1993 bible

GENESE 38

¹Unai neganai Iuda ese iena tadikaka taudia ia rakatania, ia lao, Adulama tauna ta ena ladana Hira danu ia noho.

²Unuseni Iuda ese Kanana tauna ta ladana Sua ena natuna kekeni ia itaia, ia adavaia, vadaeni idia mahuta hebou.

³Unai hahine ia rogorogo, ia mara, mero ta ia abia, iena ladana ia atoa Ere.

⁴Ma ia rogorogo lou, natuna ta ia abia, iena ladana ia atoa Onana.

⁵Ma mero ta ia abia, iena ladana ia atoa Sela. Unai mero ia vara neganai, Iuda be Kesiba dekenai ia noho.

⁶Iuda ese iena vara guna natuna Ere dekenai adavana ta ia henia, iena ladana be Tamara.

⁷To inai Ere be Lohiabada ena vairana dekenai kara dika momokani ia karaia, vadaeni Lohiabada ese ia alaia mase.

⁸Vadaeni Iuda ese Onana dekenai ia hamaoroa, ia gwau, “Oi be iena nakimi dainai, iseda kara hegeregerena, vabu dekenai oi sihari henia, natuna ta oi havaraia, oiemu kakana mase tauna ena.”

⁹To Onana be ia diba mero do ia havaraia neganai, be iena natuna momokani lasi. Unai dainai ia sihari henia neganai, iena vesina be tano dekenai ia habubua kava, kakana ena natuna do ia havaraia lasi totona.

¹⁰Unai kara dikana dainai Lohiabada ia badu, vadaeni Onana danu ia alaia mase.

¹¹Vadaeni Iuda ese iena ravana Tamara dekenai ia hamaoroa, ia gwau, “Do oi giroa lou oiemu tamana ena ruma dekenai, do oi noho kava, adavana lasi, ia lao bona lauegu natuna Sela ia bada.” To iena laloa korikori be Sela danu do ia mase garina, iena kakana ruaosi hegeregere. Unai dainai Tamara be ia giroa lou, iena tamana ena ruma dekenai ia noho.

¹²Nega sisina murinai Iuda ena adavana, Sua ena natuna, ia mase. Vadaeni Iuda ena lalohisihisi ia ore murinai ia toreisi, ia lao Timuna dekenai, iena mamoe edia huina ia utua gabuna unai. Iena turana ena ladana Hira, Adulama tauna, be ia danu idia lao.

¹³Tamara ia kamonai iena ravana be Timuna dekenai ia lao, iena mamoe edia huina utua totona.

¹⁴Vadaeni ia ese iena vabu dabua ia kokia, ma dabua ta dekena amo iena vairana ia koua, Timuna dala badibadinai ia helai, Enaimi hanua ena ranu guri rua ena vareai gabuna dekenai. Badina be ia diba Sela be ia bada vadaeni, to iena ravana ese iena headava dalana ia kehoa lasi.

¹⁵Vadaeni Iuda ese ia itaia neganai, ia laloa inai hahine be ariara hahine, badina iena vairana ia koua dainai.

¹⁶Vadaeni ia ese hahine dekenai ia hereva, ia gwau, “Mani ita mahuta gabu tamona dekenai.” Ia diba lasi hahine be iena ravana. Hahine ia gwau, “Davana be dahaka do oi henia lau dekenai?”

¹⁷Ia gwau, “Nani ena natuna ta oi do lau henia.” Hahine ia gwau, “Ia namo, to ena toana be dahaka harihari do oi henia ia lao bona nani do oi siaia mai?”

¹⁸Ma Iuda ese ia nanadaia, ia gwau, “Toana be dahaka gau oi dekenai do lau henia?” Ia haere, “Oiemu ageva, ladana torea gauna, mai varo danu, bona oiemu itotohi.” Ia henia, vadaeni ruaosi idia mahuta gabu tamona dekenai, vadaeni hahine ia rogorogo.

¹⁹Vadaeni Tamara ia toreisi, ia lao. Iena vairana koua dabua ia kokia, iena vabu dabua ma ia karaia lou.

²⁰Iuda ese iena turana Adulama tauna ia siaia, nani natuna be unai hahine dekenai do ia henia, bona toa gaudia do ia abia lou totona. To hahine be ia davaria lasi.

²¹Vadaeni ia ese unai gabu taudia dekenai ia nanadaia, ia gwau, “Inai ariara hahine, Enaimi hanua vareai gabuna ena dala badibadina dekenai ia helai be edeseni?” Idia gwau, “Ariara hahine ta be lasi iniseni.”

²²Unai dainai Adulama tauna be Iuda dekenai ia giroa lou, ia gwau, “Lau davaria lasi, bona unai gabu taudia idia gwau ariara hahine ta be lasi unai gabu dekenai.”

²³Vadaeni Iuda ia gwau, “Lauegu gau ia dekenai do idia noho, do ita hemarai garina. Lau be nani natuna lau siaia, to hahine be oi davaria lasi.”

²⁴Hua toi ia ore murinai, vadaeni Iuda ese hereva ia kamonai iena ravana be mai bogana. Vadaeni ia gwau, “Murimuri dekenai umui hakaua, vadaeni umui alaia mase.”

²⁵Idia hakaua murimuri dekenai, vadaeni Tamara ese hereva ia siaia Iuda dekenai, ia gwau, “Inai gau edia biaguna dekena amo lau rogorogo, mani oi hereva, inai ageva, ladana torea gauna, mai varo danu, bona inai itotohi be daika ena?”

²⁶Vadaeni Iuda ena lalona ia kehoa, ia gwau, “Ia be maoro, lau be kerere lau karaia vadaeni, badina be lauegu natuna Sela lau henia lasi, ia adavaia totona.” Vadaeni Iuda bona Tamara idia mahuta hebou lou lasi.

²⁷Tamara ena mara negana be kahirakahira neganai, ia diba vadaeni iena bogana lalonai be natuna rua idia noho.

²⁸Vadaeni ia mara neganai, mero ta ese iena imana ia atoa murimuri dekenai, vadaeni durua henia hahine ese varo kakakaka ta mero ena imana dekenai ia kwatua, ia gwau, “Vara guna be inai.”

²⁹To mero be iena imana ia veria vareai, vadaeni iena tadina ia vara guna. Durua henia hahine be ia gwau, “Oi be inai bamona oiemu dala oi kehoa?” Vadaeni iena ladana ia atoa Perese, anina be “dala kehoa.”

³⁰Gabeai iena kakana ia vara, mai varo kakakaka danu iena imana dekenai, iena ladana idia atoa Sera, ena anina be “daekau.”