Read Buka Helaga (Hiri Motu) 1993 GENESE 4 Bible Online

GENESE 4 - Buka Helaga (Hiri Motu) 1993 bible

GENESE 4

¹Adamu bona Heva idia mahuta hebou, bona Heva ia rogorogo. Ia mara, mero ia abia. Ia gwau, “Lohiabada ena durua dekenai mero ta lau abia vadaeni.” Iena ladana ia atoa Kaino.

²Inai murinai ia mara lou, Kaino ena tadina Abela ia abia. Abela be mamoe naria tauna, to Kaino be uma naria tauna.

³Dina ta Kaino ese uma ena anina haida ia mailaia, Lohiabada dekenai ia henia, boubou gauna totona.

⁴Inai murinai Abela danu ese iena mamoe, vara guna gaudia, digara gaudia ia mailaidia. Ia aladia, bona vamu namona gaudia ia henia, boubou gauna totona. Lohiabada ese Abela ena harihari gauna dekenai ia moale,

⁵to Kaino, mai ena boubou gauna ia abia dae lasi. Kaino be ia badu maragi lasi, bona badu dainai iena vairana ia metau.

⁶Lohiabada ese Kaino dekenai ia gwau, “Badina be dahaka oi badu noho? Badina dahaka oiemu vairana ia metau noho?

⁷Bema kara namo oi karaia vadaeni, be oiemu boubou do lau abia dae. To dika oi karaia vadaeni dainai, kara dika be oiemu iduara dekenai ia naria noho, oi do ia hadikaia totona. Kara dika be ia ura biagua oi, to oi ese do oi halusia be namo.”

⁸Bona Kaino ese iena tadina Abela dekenai ia hereva, ia gwau, “Uma gabu dekenai ita raka namo.” Ruaosi idia noho uma gabu neganai, Kaino ese iena tadina Abela dekenai ia heatu, ia alaia mase.

⁹Lohiabada ese Kaino ia nanadaia, ia gwau, “Oiemu tadina Abela be edeseni?” Ia haere, “Lau diba lasi. Be, lau be egu tadina ena naria tauna, a?”

¹⁰Vadaeni Lohiabada ia gwau, “Dahaka kara dika oi karaia vadaeni? Oiemu tadina ena rarana be tano dekena amo ia boiboi noho lau dekenai, iena mase davana do lau karaia totona.

¹¹Harihari dika ia mai oi dekenai, bona inai tano do oi rakatania momokani. Badina inai tano ese oiemu tadina ena rarana ia ania, oi ese oiemu tadina oi alaia neganai.

¹²Bema uma gabu lalonai hadoa gaukara oi karaia, tano ese iena anina do ia henia lasi oi dekenai, bona dohore oi be ruma lasi, bona loa kava tauna tanobada dekenai do oi lao.”

¹³Bona Kaino ese Lohiabada dekenai ia hereva, ia gwau, “Lauegu dika davana be metau herea.

¹⁴Inai tano bona oiemu vairana dekena amo lau oi lulua noho. Lau be ruma lasi bona loa kava tauna do lau lao tanobada dekenai, bona sedira lau idia davaria taudia ese lau do idia alaia mase.”

¹⁵To Lohiabada ese Kaino dekenai ia haere, ia gwau, “Lasi momokani. Kaino ia alaia tauna dekenai be davana do lau henia nega tamona lasi, to nega 7.” Vadaeni, Lohiabada ese Kaino dekenai maka ta ia atoa, tau ta ese ia davaria neganai, do ia alaia lasi totona.

¹⁶Bona Kaino ese Lohiabada dekena amo ia raka siri, bona tano ta ladana Loa Kava, Eden ena dina ia daekau kahana dekenai ia noho.

¹⁷Kaino bona iena adavana idia mahuta hebou, bona hahine ia rogorogo. Ia mara, mero ia abia, ena ladana be Enoka. Kaino ese hanua ta ia haginia, inai hanua ena ladana ia atoa Enoka, iena natuna ena ladana hegeregere.

¹⁸Enoka ese natuna ta ia abia, iena ladana be Irada. Irada be Mehuiaela ena tamana, bona Mehuiaela be Metusaela ena tamana, bona Metusaela be Lameka ena tamana.

¹⁹Lameka ese hahine rua dekenai ia headava. Ta ena ladana be Ada, ma ta ena ladana be Sila.

²⁰Ada ia mara, Iabala ia abia. Iabala be palai ruma dekenai idia noho, bona boromakau idia naria taudia edia tubuna.

²¹Iena tadina ena ladana be Iubala. Ia be gita bona ivilikou idia gadaralaia taudia edia tubuna.

²²Bona Sila ia mara, Tubala Kaino ia abia. Ia be kapa bona auri dekenai gaukara taudia ibounai edia tubuna. Inai Tubala Kaino ena taihuna ena ladana be Namaha.

²³Lameka ese iena adavana ruaosi dekenai ia hereva, ia gwau, “Ada bona Sila, adavagu ruaosi e, lau dekenai umui kamonai! Tau ta ese lau ia haberoa, lau alaia vadaeni. Mero ta ese lau ia botaia, lau alaia mase vadaeni.

²⁴Kaino ia botaia tauna be davana do ia abia nega 7. To lau ia botaia tauna be davana do ia abia nega 77.”

²⁵Adamu bona iena adavana idia mahuta hebou lou, bona hahine ia rogorogo. Ia mara, mero ta ia abia, bona ia gwau, “Dirava ese natuna ta lau dekenai ia henia vadaeni, Abela, Kaino ese ia alaia tauna ena gabu do ia abia totona.” Unai dainai iena ladana ia atoa, Seta.

²⁶Seta ese natuna ta ia havaraia, iena ladana ia atoa Enosi. Unai nega dekenai taunimanima ese Lohiabada ena ladana helagana dekenai guriguri idia hamatamaia.