Read Buka Helaga (Hiri Motu) 1993 GENESE 43 Bible Online

GENESE 43 - Buka Helaga (Hiri Motu) 1993 bible

GENESE 43

¹Kanana tano dekenai hitolo be ia bada herea.

²Aigupito dekena amo idia mailaia uiti be idia ania ore, vadaeni edia tamana ia hamaoroa idia dekenai, ia gwau, “Ma umui giroa lao aniani sisina umui hoia, ita totona.”

³Vadaeni Iuda ia haere henia ia dekenai, ia gwau, “Unai tau ena hereva be ia auka, ia gwau, ‘Bema umui emui tadina umui hakaua mai lasi neganai, lauegu vairana dohore umui itaia lasi.’

⁴Bema aiemai tadina oi siaia ai danu, ai be dohore ai lao oiemu aniani do ai hoia.

⁵To bema oi siaia lasi, dohore ai lao lasi. Badina unai tau ia gwau, ‘Bema umui emui tadina umui hakaua mai lasi, dohore lauegu vairana umui itaia lasi.’ ”

⁶Vadaeni Israela ia gwau, “Badina dahaka unai tau dekenai umui emui tadina ena sivarai umui hedinaraia? Unai dekena amo lau umui hadikaia.”

⁷Idia gwau, “Unai tau ese ai dekenai ia henanadaia goadagoada, iseda iduhu dekenai ia henanadaia, ia gwau, ‘Umui emui tamana do ia mauri noho? Bona umui emui tadina ta ia noho?’ Unai dainai ai haere henia ia dekenai. Edena bamona do ai diba dohore ia gwau, ‘Umui emui tadina umui hakaua mai, a?’ ”

⁸Vadaeni Iuda ese iena tamana Israela dekenai ia noinoi, ia gwau, “Lau danu mero oi siaia, ai toreisi, ai lao. Unai dekena amo do ita mauri, ita mase lasi. Oi bona aiemai natuna maragidia danu.

⁹Lauegu mauri do lau atoa diho inai, ia totona, lau ese dohore lau naria. Lau dekenai do oi tahua, bema lau mailaia lasi oi dekenai. Oiemu vairana dekenai bema lau hakaua lasi, kerere be lauegu latanai do ia noho hanaihanai.

¹⁰Bema oi ese ai oi koua lasi neganai, inai laolao iharuana be momokani idaunegai ia ore vadaeni.”

¹¹Vadaeni edia tamana Israela ese ia haere henidia, ia gwau, “Bema dala idauna ta lasi, inai bamona umui karaia. Iseda tano ena anina namo herea gaudia umui abia lao, umui emui maduna dekenai. Muramura mai ena bonana namo, hani, aniani dekenai hanamoa muramura, niuniu bona okari umui abia lao, unai tau ena.

¹²Umui ta ta dekenai moni pusepuse rua rua umui abia lao. Umui emui puse dekenai idia udaia lou moni danu umui loulaia, badina idia udaia taudia be sedira idia kerere.

¹³Emui tadina danu umui hakaua lao, vadaeni unai tau dekenai umui giroa lou.

¹⁴Siahu Ibounai Dirava do ia bogahisihisi henia umui dekenai, vadaeni ia ese unai tau ena vairana dekenai umui do ia durua, vadaeni umui emui tadikakana ta do ia henia lou umui dekenai, bona Beniamina danu do ia siaia lou, to lauegu natuna lau dekena amo bema idia boio, vadaeni do idia boio.”

¹⁵Unai dainai idia ese harihari gaudia idia abia lao, edia tamana ia hereva hegeregerena, bona moni pusepuse rua rua, ta ta idia abia, bona Beniamina danu idia hakaua, vadaeni idia toreisi, Aigupito tano dekenai idia lao, Iosepa ena vairanai idia gini.

¹⁶Iosepa ese Beniamina ia itaia, vadaeni iena hesiai tauna badana dekenai ia hereva, ia gwau, “Inai taudia oi hakaua lao lauegu ruma dekenai, ubua gauna ta oi alaia, bona nadua hegaegae, badina be dina tubua neganai, inai taudia be lau danu do ai aniani gabu tamona dekenai.”

¹⁷Vadaeni hesiai tauna be Iosepa ena hereva hegeregere ia hakaudia lao, Iosepa ena ruma dekenai ia hakaudia.

¹⁸Vadaeni inai taudia idia gari dikadika, badina Iosepa ena ruma dekenai idia hakaudia vareai dainai, idia sibona idia herevahereva, idia gwau, “Nega ginigunana dekenai moni idia udaia lou iseda puse dekenai. Unai dainai ia be kerere davaria totona dala ia tahua ita dekenai, dohore ia guia ita, iena hesiai taudia ita do ia halaoa, iseda doniki do ia abidia ia sibona ena.”

¹⁹Vadaeni idia be Iosepa ena hesiai tauna badana dekenai idia lao, ruma ena iduara dekenai.

²⁰Idia hamaoroa ia dekenai, idia gwau, “Tau badana e, nega ginigunana ai mai be aniani sibona mo hoia totona ai mai.

²¹To aiemai kamepa gabuna dekenai ai ginidae, aiemai puse ai kehoa, vadaeni aiemai moni ai itaia. Ai ta ta aiemai puse dekenai guna ai henia moni ibounai ai davaria. Moni ena metau be idau lasi. Harihari aiemai moni ibounai ai mailaia lou vadaeni, ai henia lou totona.

²²Bona moni haida ma ai mailaia vadaeni, aniani ma do ai hoia totona. To ai diba lasi daika ese aiemai moni idia udaia lou aiemai puse dekenai.”

²³Vadaeni inai hesiai tauna badana ia gwau, “Umui laloa lasi, umui gari lasi. Lau laloa, umui emui Dirava, bona umui emui tamana danu ena Dirava, ese unai moni be emui puse ta ta lalonai ia udaia. Badina be, umui emui uiti hoia moni be lau ese lau abia vadaeni.” Vadaeni ia ese Simeona ia hakaua mai idia dekenai.

²⁴Vadaeni unai hesiai tauna badana ese Iosepa ena ruma lalona dekenai ia hakaudia vareai, edia aena huria totona ranu ia henidia, edia doniki dekenai danu aniani ia henia.

²⁵Vadaeni edia harihari gaudia idia abia hegaegae noho, dina tubua ia mai neganai, Iosepa dekenai dohore idia henia totona, badina be idia kamonai vadaeni unuseni dekenai do idia aniani.

²⁶Iosepa ia raka vareai neganai, harihari gaudia idia henia ia dekenai. Vadaeni edia kwarana idia atoa diho tano dekenai, Iosepa ena vairanai.

²⁷Vadaeni Iosepa ese ia nanadaia idia dekenai, ia gwau, “Umui be edena bamona? Umui emui tamana danu ia namo? Inai tau buruka, vanegai ena sivarai umui gwauraia, do ia mauri noho, a?”

²⁸Idia haere, idia gwau, “Oiemu hesiai tauna, aiemai tamana be ia namo, do ia mauri noho.” Vadaeni idia edia kwarana idia atoa diho, idia hanamoa ia dekenai.

²⁹Vadaeni Iosepa ese iena matana ia negea, iena tadina Beniamina ia itaia, iena tadina korikori. Vadaeni ia gwau, “Umui emui tadina, gabeai ia vara tauna be unai, a, vanegai ena sivarai umui gwauraia tauna?” Ma Beniamina dekenai ia gwau, “Natugu e, Dirava do ia bogahisihisi henia oi dekenai.”

³⁰To Iosepa ena lalona ia manoka, iena tadina dekenai ia bogahisihisi bada dainai, vadaeni karaharaga ia rakatanidia, iena daiutu ta dekenai ia lao, unuseni ia tai.

³¹Vadaeni iena vairana ia huria, ia giroa idia dekenai, iena lalona ia ha-aukaia, hesiai taudia dekenai ia gwau, “Aniani umui atoa hegaegae.”

³²Vadaeni aniani idia atoa, pata ta dekenai be Iosepa ena, pata ta dekenai be idia edia, ma pata ta dekenai be Aigupito taudia edia, badina Aigupito taudia edia kara be Heberu taudia danu idia aniani lasi gabu tamona dekenai, Aigupito taudia dekenai unai be hemarai gauna.

³³Vadaeni hesiai taudia ese tadikaka edia helai gabuna idia henidia, Iosepa ena vairanai, edia vara hegeregerena. Guna ia vara tauna ia lao bona gabeai ia vara tauna. Unai dainai idia sibona ta ta edia matana dekenai idia itaia, bona idia hoa bada danu.

³⁴Vadaeni aniani idia henidia Iosepa ena pata dekena amo, to Beniamina ena, be nega 5 idia henia. Bona Iosepa danu uaina idia inua, vadaeni idia moale hebou.