Read Buka Helaga (Hiri Motu) 1993 GENESE 50 Bible Online

GENESE 50 - Buka Helaga (Hiri Motu) 1993 bible

GENESE 50

¹Iosepa ese iena tamana ena vairana dekenai iena kwarana ia atoa diho, ia tai, bona ia kisi henia.

²Vadaeni Iosepa ese iena hesiai taudia haida, muramura gaukara idia diba taudia ia hamaorodia, iena tamana ena tauanina do idia hagoevaia. Muramura mai bonana namo dekena amo do idia dahua, ia bodaga haraga lasi totona, bona dabua aukana dekenai do idia kumia, vadaeni unai bamona idia karaia.

³Dina 40 ia ore, muramura taudia edia gaukara edia nega be unai, vadaeni Aigupito taudia ese dina 70 idia taitai Iakobo dekenai.

⁴Taitai dinana idia ore, vadaeni Iosepa ese Farao ena ruma taudia dekenai ia noinoi, ia gwau, “Bema umui ura henia lau dekenai, vadaeni Farao dekenai do umui hereva, umui gwau,

⁵‘Lauegu tamana be kahirakahira ia mase neganai, ia hereva henia lau dekenai dainai, lau gwauhamata henia ia dekenai. Ia gwau: “Dohore lau mase neganai, guria gabuna, lau hegaegae guna vadaeni gauna, unuseni dohore umui guria lau, Kanana tano dekenai.” Unai dainai, mani emu kara, lau ura lau lao, lauegu tamana do lau guria, vadaeni dohore lau giroa mai.’ ”

⁶Vadaeni Farao ia gwau, “Oi lao. Oiemu tamana do oi guria, oiemu gwauhamata bamona.”

⁷Vadaeni Iosepa ia toreisi, iena tamana guria totona ia lao, Farao ena hesiai taudia, bona iena ruma badana ena tau badadia, bona Aigupito ena lohia taudia ibounai ia danu idia lao.

⁸Bona Iosepa ena varavara taudia ibounai, bona iena tadikaka taudia, bona iena tamana ena bese taudia danu idia lao. Edia natuna marigidia, bona edia mamoe ibounai bona edia boromakau ibounai, unai sibona idia rakatania Gosena tano dekenai.

⁹Haida be kariota dekenai idia guia, haida be hosi dekenai, taunimanima momo herea be Iosepa danu idia lao.

¹⁰Gabu ta, ena ladana Atada dekenai idia ginidae, Ioridane Sinavai ena dina ia daekau kahanai. Unai Atada be uiti dekena amo momoru kokia gabuna. Unuseni Iakobo totona taitai gaukara ibounai idia karaia, mai lalohisihisi bada. Iosepa ese dina 7 ia taitai iena tamana totona.

¹¹Unai tano taudia, Kanana taudia, ese idia edia lalohisihisi idia itaia Atada dekenai. Vadaeni idia gwau, “Aigupito taudia edia taitai be ia bada herea.” Unai dainai unai gabu ena ladana idia atoa, Abela Miseraimi, ena anina be, “Aigupito taudia edia taitai gabuna.” Inai gabu be Ioridane Sinavai ena dina ia daekau kahanai.

¹²Vadaeni Iakobo ena natuna ese guna ia ese idia ia hamaoroa hegeregerena idia karaia.

¹³Kanana tano dekenai idia huaia lao, nadi matuna lalonai idia guria, Makapela ena tano dekenai. Unai nadi matuna bona tano be Aberahamo ese Eparona, Hiti tauna dekena amo guna ia hoia vadaeni, iena guria gabuna totona, Mamare ena dina ia daekau ena kahana dekenai.

¹⁴Vadaeni iena tamana ia guria murinai, Iosepa mai ena tadikakana taudia bona ia danu idia lao taudia idia giroa lou Aigupito dekenai.

¹⁵Edia tamana ia mase murinai, Iosepa ena kakana be idia sibona idia herevahereva, idia gwau, “Sedira Iosepa be ia badu noho ita dekenai. Vadaeni ia dekenai kara dika ita karaia ena davana sedira do ia henia ita dekenai.”

¹⁶Unai dainai idia ese hereva ta idia siaia lao Iosepa dekenai, idia gwau, “Oiemu tamana do ia mase lasi neganai, ia hamoroa ai dekenai, ia gwau,

¹⁷‘Iosepa dohore umui hamaoroa, umui gwau: Oiemu kakana taudia edia kerere bona kara dika oi dekenai do oi laloaboio.’ Unai dainai ai noinoi oi dekenai, mani emu kara, oiemu tamana ena Dirava ena hesiai taudia aiemai dika do oi laloa noho lasi.” Inai hereva ia kamonai neganai Iosepa ia tai.

¹⁸Vadaeni iena kakana taudia idia lao Iosepa ena vairana dekenai, edia vairana idia atoa diho tano kahirakahira dekenai, idia gwau, “Ai be oiemu hesiai taudia, davana lasi, be namo.”

¹⁹To Iosepa ia gwau, “Umui gari lasi. Lau be Dirava, emui kerere davana do lau henia, a?

²⁰Momokani, guna umui laloa karaia, lau do umui hadikaia gwauraia, to Dirava ese emui kara ena anina be, mai namo danu ia havaraia. Unai kara ena anina be hari dina umui itaia inai, taunimanima momo herea edia mauri dekenai durua lau henia vadaeni.

²¹Unai dainai, umui gari lasi. Dohore lau naria umui, bona umui emui natuna danu dohore lau naridia.” Vadaeni hereva namo dekenai edia gari ia kokia, bona edia lalodia be maino idia abia.

²²Iosepa bona ena tamana ena iduhu taudia ibounai be Aigupito dekenai idia noho, bona Iosepa ia mase neganai iena mauri lagani ibounai be 110.

²³Iosepa ese Eparaima ena tubuna ena natuna ia itadia, bona Makiri Manase ena natuna idia vara neganai, be Iosepa ese iena bese lalonai ia haboudia.

²⁴Vadaeni Iosepa ese iena kakana taudia ia hamaorodia, ia gwau, “Lauegu mase neganai ia ginidae vadaeni. To Dirava ese do ia laloa umui, bona inai tano dekena amo do ia hakaua umui, ia lao bona iena gwauhamata tano dekenai do umui ginidae. Unai tano be Dirava ese ia gwauhamata Aberahamo, bona Isako bona Iakobo dekenai do ia henia.”

²⁵Vadaeni Iosepa ese Israela ena natuna ia hamaorodia, ia gwau, “Lau dekenai do umui gwauhamata, Dirava ese umui do ia durua neganai, lauegu turiana be inai gabu dekena amo do umui kokia, bona umui danu, lauegu turiana be unai gwauhamata tano dekenai do umui abia lao.”

²⁶Vadaeni Iosepa be ia mase, iena mauri lagani ibounai be 110, vadaeni idia ese iena tauanina idia hagoevaia, muramura dekena amo idia dahua, ia bodaga haraga lasi totona, vadaeni maua dekenai idia udaia Aigupito dekenai.