Read Buka Helaga (Hiri Motu) 1993 GENESE 6 Bible Online

GENESE 6 - Buka Helaga (Hiri Motu) 1993 bible

GENESE 6

¹Nega ia mai vadaeni, taunimanima be momo tanobada dekenai, bona natuna kekeni idia vara noho.

²Bona Dirava ena natuna haida ese idia itaia, inai kekeni be mai edia hairai. Vadaeni, idia ura henia kekenidia idia abia, idia adavaia.

³Bona Lohiabada ia gwau, “Egu lauma be nega ibounai taunimanima edia lalonai do ia noho lasi, badina idia be hidio sibona. Hari ia lao, edia mauri lagani be dohore lagani 120 sibona.”

⁴Unai Dirava ena natuna taudia ese taunimanima edia natuna kekeni idia adavaia bona natuna idia havaraia neganai, tatau badadia badadia idia noho tanobada dekenai. Idia be gunaguna, bona gabeai danu, goada taudia mai ladana, edia sivarai danu be bada.

⁵Lohiabada ese taunimanima ia itaia, edia kara dika be bada herea gabu ibounai dekenai, bona edia laloa be nega ibounai ia dika sibona mo.

⁶Lohiabada ena lalona be ia hisihisi, taunimanima tanobada dekenai ia havaraia dainai, bona iena lalohisihisi be ia bada momokani.

⁷Vadaeni ia gwau, “Lau karaia gaudia, taunimanima ibounai do lau hamasea haorea, tanobada gabu ibounai dekena amo. Lau ese boroma ibounai bona ataiai manudia ibounai danu do lau hamasea, badina idia lau havaraia dainai, egu lalona ia hisihisi noho.”

⁸To Noa dekenai Lohiabada ia moale. Noa ena natuna be inai:

⁹Iena natuna memero be toi, Sema bona Hamo bona Iapeta.

¹⁰Noa be kara namo tauna, ia tamona sibona dekenai Dirava ia moale. Ia be Dirava danu ia noho, turana hegeregere.

¹¹To taunimanima ibounai be dika momokani Dirava ena vairana dekenai, bona edia dika be gabu ibounai dekenai.

¹²Dirava ese tanobada ia itaia, ia dika rohoroho vadaeni, badina taunimanima ibounai edia kara be dika momokani.

¹³Dirava ese Noa dekenai ia hereva, ia gwau, “Mauri gaudia ibounai do lau haorea. Ibounai do lau hamasea haorea, badina tanobada be edia kara dika dekenai ia honu momokani.

¹⁴Lagatoi namona ta, au namodia dekenai do oi haginia. Ia lalonai daiutu do oi karaia, bona lalonai bona murimurinai pisi dekenai oi koua.

¹⁵Inai bamona do oi karaia: Iena lata be 133 mita, iena lababana be 22 mita, bona iena ataiai be 13 mita.

¹⁶Lagatoi ena guhi do oi karaia, bona uindo, ena dobu 44 sentamita do oi karaia, guhi bona haba edia huanai. Sitori toi danu do oi karaia, bona iduara do oi karaia haba dekenai.

¹⁷Lau be abata bada herea tanobada dekenai do lau siaia, mauri gaudia ibounai do lau haorea. Gau ibounai tanobada dekenai do idia mase ore,

¹⁸to gwauhamata oi dekenai do lau karaia, bona do lau hamomokania. Lagatoi lalonai do oi guia, oi bona oiemu adavana, oiemu natuna memero, bona edia adavadia.

¹⁹Mauri gaudia ibounai idauidau rua rua dekenai do oi udaia lao, idia be do idia mauri noho totona, tau ta, hahine ta, inai bamona do oi udaia lao.

²⁰Manu idauidau ibounai, bona boroma gaudia idauidau ibounai, badadia bona maragidia, rua rua dekenai lagatoi dekenai do idia vareai lao, do idia mauri noho totona.

²¹Aniani gaudia idauidau ibounai danu do oi haboua, bona do oi abia lao, oiemu aniani, bona mauri gaudia edia aniani.”

²²Bona Noa ese unai bamona ia karaia, Dirava ena hereva ibounai hegeregere.