Read Buka Helaga (Hiri Motu) 1993 GENESE 9 Bible Online

GENESE 9 - Buka Helaga (Hiri Motu) 1993 bible

GENESE 9

¹Dirava ese Noa mai ena natuna danu ia hanamoa, ia gwau, “Natuna momo do umui havaraia, vadaeni emui bese be tanobada gabu ibounai dekenai do idia noho.

²Tanobada ena boroma gaudia idauidau ibounai, bona ataiai manu ibounai, bona tano dekenai idia rau gaudia ibounai, bona gwarume be umui dekenai do idia gari. Umui emui imana dekenai ibounai do lau atoa.

³Hari inai mauri gaudia ibounai umui ania diba, ava aniani umui ania vadaeni hegeregerena. Lau ese lau henia umui dekenai, aniani totona.

⁴To aniani tamona umui ania diba lasi. Vamu mai rarana danu be mai taravatu, badina be rara be mauri ena badina.

⁵Bema tau ta ese emui mauri rarana ia habubua, lau be davana do lau henia, do ia mase. Bema boroma ta ese umui ia alaia, lau ese do lau hamasea. Bona bema tau ta ese taunimanima ta ia alaia neganai, lau ese davana do lau henia.

⁶“Daika ese taunimanima ta ia alaia, be taunimanima ese do idia alaia. Badina be Dirava ese taunimanima ia karaia, iena toana bamona.

⁷“Hari ia lao, natuna momo do umui havaraia, vadaeni emui bese be bada herea tanobada dekenai, bona tanobada gabu ibounai dekenai do idia noho.”

⁸Bona Dirava ese Noa bona iena natuna dekenai ia hereva, ia gwau,

⁹“Lau ese hari lauegu gwauhamata taravatuna lau henia umui dekenai, bona emui bese dekenai.

¹⁰Umui danu idia noho mauri gaudia ibounai dekenai danu inai gwauhamata lau henia, manu bona boromakau bona tanobada ena boroma ibounai dekenai lau henia, lagatoi dekena amo idia diho gaudia ibounai.

¹¹Lau ese lauegu gwauhamata taravatuna lau hamomokania inai: Lau ese abata dekena amo mauri gaudia ibounai do lau alaia lou lasi. Abata ese tanobada do ia hadikaia ore lou lasi.”

¹²Dirava ma ia gwau, “Inai noho hanaihanai gwauhamata taravatuna lau henia umui dekenai bona mauri gaudia ibounai dekenai, ena toana be inai:

¹³Lauegu kevau be ori lalonai lau atoa inai. Ia be egu gwauhamata taravatuna tanobada dekenai ena toana.

¹⁴Ori lau havaraia tanobada ena ataiai, guba dekenai neganai, bona kevau ia hedinarai ori lalonai neganai,

¹⁵lau ese egu gwauhamata umui dekenai bona mauri gaudia ibounai dekenai do lau laloa noho, abata ese mauri gaudia do ia hadikaia ore lou lasi.

¹⁶Kevau be ori lalonai ia hedinarai neganai, lau be do lau itaia, bona noho hanaihanai gwauhamata taravatuna, lau bona tanobada ena mauri gaudia ibounai iseda huanai, do lau laloa noho.”

¹⁷Dirava ese Noa dekenai ia hereva, ia gwau, “Inai kevau be egu gwauhamata mauri gaudia ibounai dekenai ena toana momokani.”

¹⁸Noa ena natuna memero, lagatoi dekena amo idia diho taudia, edia ladana be Sema, bona Hamo bona Iapeta. Hamo be Kanana ena tamana.

¹⁹Noa ena natuna toi be inai, idia be tanobada ibounai edia tubudia.

²⁰Noa be biru tauna. Ia ese uaina havaraia uma gabu ginigunana ia hadoa.

²¹Dina ta uaina haida ia inua murinai, iena kwarana ia giroagiroa, bona iena dabua ibounai ia kokia, bona kopina kavakava ia hekure iena palai ruma lalonai.

²²Hamo, Kanana ena tamana ese iena tamana ia itaia, ia be kopina kavakava. Vadaeni, ia lao, iena tadikakana ruaosi dekenai ia hamaoroa.

²³Vadaeni Sema bona Iapeta ese dabua badana ta idia abia, edia pagana dekenai idia huaia. Palai ruma dekenai idia raka vareai, to edia murina kahana dekena amo idia raka lao. Edia tamana idia koua dabua dekenai, to edia vairana idia giroa lasi, edia tamana ena kopina kavakava idia itaia garina.

²⁴Noa ena inua kekero dekena amo ia noga neganai, ia kamonai dahaka kara dikana iena natuna Hamo ese ia karaia.

²⁵Vadaeni ia gwau, “Dika do ia mai Kanana ena latana dekenai! Iena tadikakana dekenai hesiai gaukara momokani do ia karaia.”

²⁶Ma ia gwau, “Lohiabada, Sema ena Dirava, ita hanamoa, Kanana ese hesiai gaukara do ia karaia Sema dekenai,

²⁷Dirava ese Iapeta ena bese do ia habadaia be namo. Iena bese be dohore Sema ena bese taudia danu do idia noho. Kanana be dohore Iapeta ena hesiai gaukara do ia karaia.”

²⁸Abata murinai Noa ese lagani 350 ia mauri noho.

²⁹Iena mauri lagani ibounai be 950, vadaeni ia mase.