Read Buka Helaga (Hiri Motu) 1993 2 SAMUELA 22 Bible Online

2 SAMUELA 22 - Buka Helaga (Hiri Motu) 1993 bible

2 SAMUELA 22

¹Lohiabada ese nega momo Davida ia hamauria, ia dekenai idia tuari taudia dekena amo, bona Saulo dekena amo danu. Unai dinadia dekenai, Davida ese inai ane Lohiabada dekena ia abia,

²Ia gwau: “Lohiabada be lauegu nadi badana, lauegu kohoro, lauegu Hamauria Tauna.

³Lauegu Dirava ese lau ia naria. Ia danu lau noho neganai, lau mauri. Kesi bamona Dirava ese lau ia gimaia. Ia be lauegu kohoro, bona lauegu heau mauri gabuna. Ia be lauegu Hamauria Tauna. Dagedage karadia dekena amo lau ia hamauria noho.

⁴Lohiabada, idia hanamoa Diravana, dekenai lau taitai, bona lau dekenai idia tuari taudia dekena amo, ia ese lau ia hamauria.

⁵“Mase ena hurehure ese lau idia hagegea momokani. Dika ena abata ese lau idia hagaria dikadika.

⁶Mase gabuna ena varo dikadia ese lau idia guia. Bona guria gabuna ese, tarapu bamona lauegu vairanai ia noho.

⁷Lauegu hisihisi lalonai, Lohiabada dekenai lau boiboi, lauegu Dirava dekenai lau taitai. Iena dubu dekenai lauegu gadona ia kamonai. Lauegu taitai be iena taiana dekenai ia ginidae.

⁸“Unai neganai tanobada ia marere, ia heudeheude. Guba, bona ororo danu idia mareremarere, idia heudeheude, badina Dirava be ia badu noho.

⁹Kwalahu be iena udubaubauna dekena amo ia daekau. Lahi ena siahu bona hururu, be iena uduna dekena amo ia mai.

¹⁰Ia ese guba ia hapararaia, bona ia diho mai neganai, ori koremana be iena aena henunai.

¹¹Lohiabada ese kerubi aneru guba dekenai ia guia, ma ia roho lao noho. Lai ena hanina edia latanai ia roho haraga.

¹²Dibura dekenai ia sibona ia koua. Medu ena ori ese ia idia hagegea.

¹³Iena vairana ena diaridiari bada dekena amo, kevaru, mai lahi ena hururu ia hedinaraia.

¹⁴Lohiabada ese guba ena boiboi dekena amo ia hereva, Siahu Ibounai Dirava ena gadona be idia kamonai.

¹⁵Iena diba ia pidia, vadaeni ia dekenai idia tuari taudia ia lulua. Unai be, iena kevaru ia siaia diho, vadaeni idia heau boio.

¹⁶Lohiabada ese ia dekenai idia tuari taudia, dekenai ia gwau henia. Bona iena badu dekena amo, ia boiboi dagedage neganai, davara ena dobu gabudia be idia hedinarai, bona tanobada ena badina nadidia, be ita itaia diba.

¹⁷“Lohiabada ese ataiai dekena amo, iena imana ia atoa diho, lau ia hamauria. Abata dobu herea dekena amo, ia ese lau ia veria mauri.

¹⁸Lau dekenai idia tuari henia taudia goada herea, dekena amo Lohiabada ese lau ia hamauria. Lau idia badu henia taudia edia goada ese, lauegu goada idia hereaia, to Lohiabada ese idia dekena amo lau ia hamauria.

¹⁹Lau be mai hisihisi bada neganai, dagedage taudia ese lau idia heatu henia, to Lohiabada ese lau ia durua momokani.

²⁰Ia ese gari gabuna dekena amo, lau ia hakaua mai. Lohiabada ese lau ia hamauria, badina ia ese lau dekenai ia laloa namo.

²¹Lohiabada ese ahuna namona, be lau dekenai ia henia vadaeni, badina be kara maoromaoro lau karaia dainai. Ia ese lau ia hanamoa, lauegu laloa goevagoeva hegeregerena,

²²badina be Lohiabada ena dala lau badinaia vadaeni. Iena kara maoromaoro dekena amo lau raka siri lasi.

²³Iena taravatu ibounai be lauegu vairanai idia noho, bona iena oda lau utua lasi.

²⁴Ia diba lau be kerere ta lasi. Kara dika dekena amo lau raka siri.

²⁵Unai dainai Lohiabada ese lau ia hanamoa vadaeni, lauegu kara maoromaoro dainai. Lauegu kara be goevagoeva dainai, lau ia hanamoa noho.

²⁶“Lohiabada e, oi dekenai idia abidadama henia taudia, be oi ese unai taudia oi durua noho. Bona kara maoromaoro taudia dekenai, oiemu kara maoromaoro oi hedinaraia.

²⁷Laloa goevagoeva taudia dekenai, oiemu kara goevagoeva oi hedinaraia. To dagedage taudia dekenai, oiemu dagedage oi hedinaraia.

²⁸Badina be manau taudia be oi ese oi hamauria, to hekokoroku taudia be oi ese oi itaia noho, do oi hamorua totona.

²⁹Lohiabada e, oi be lauegu lamepa, oi ese lauegu dibura oi hadiaria noho.

³⁰Oi ese goada lau dekenai oi henia neganai, lau ese lau idia tuari henia taudia, dekenai lau heatu henia. Edia magu lau roho hanaia diba, Dirava ena durua dainai.

³¹“Dirava ena dala be maoromaoro. Iena hereva be momokani. Ia be ia dekenai idia abidadama henia taudia edia kesi.

³²Dirava korikori be daika? Lohiabada sibona. Mauri davaria nadina be daika? Iseda Dirava sibona mo.

³³Inai Dirava ese lau dekenai goada ia henia. Ia ese lauegu dala be mauri dalana ia halaoa.

³⁴Ia ese lauegu aena, be dia edia aena hegeregere ia halaoa. Ia ese ataiai gabudia dekenai lau ia haginia.

³⁵Ia ese tuari dalana be lau dekenai ia hadibaia. Vadaeni lauegu imana ia goada, bona lau ese peva, auri labora gauna, lau veria diba.

³⁶Lohiabada e, oi ese lau oi gimaia, bona lau oi hamauria, bona oi ese lau oi durua dainai, lau be tau badana lau lao.

³⁷Oi ese lau oi durua, vadaeni tuari taudia ese lau idia abia mauri lasi. Oi ese lauegu aena oi hagoadaia, idia dedi lasi.

³⁸“Lau dekenai idia tuari taudia, be lau ese lau lulua bona lau halusia momokani. Lau giroa mai lasi, ela bona lau ese idia lau alaia ore.

³⁹Lau ese idia lau hadikaia ore, lau gwadaia, vadaeni idia toreisi lou diba lasi. Lauegu aena henunai idia moru.

⁴⁰Lohiabada e, oi ese lau dekenai goada oi henia, do lau tuari totona. Lau dekenai idia tuari taudia dekena amo, oi ese kwalimu lau dekenai oi henia.

⁴¹Oi ese lau dekenai idia tuari taudia oi hadikaia, vadaeni lau dekena amo idia heau. Lau dekenai idia badu taudia, be lau ese lau hadikaia ore.

⁴²Durua totona idia noinoi, to tau ta ese idia hamauria totona ia mai lasi. Lohiabada dekenai idia boiboi, to ia haere lasi.

⁴³Lau ese idia lau botaia neganai, kahu bamona idia lao. Idia lau moia diho, dala ena kopukopu bamona.

⁴⁴“Lauegu taunimanima ese, lau idia tuari henia neganai, oi ese lau oi hamauria. Oi ese lau oi durua dainai, bese idauidau, be lau ese lau gunalaia noho. Lau diba lasi taudia ese, lauegu hesiai gaukara idia karaia noho.

⁴⁵Idau bese taudia be, lauegu vairana dekenai idia tui diho. Lauegu hereva idia kamonai neganai, idia ese lau dekenai idia kamonai henia.

⁴⁶Idau bese taudia ese lau dekenai idia gari, bona edia hunia gabudia dekena amo idia raka, mai heudeheude danu.

⁴⁷“Lohiabada be ia mauri noho. Lauegu durua Tauna badana lau hanamoa noho! Umui ibounai e, lauegu Dirava goadana do umui hanamoa, badina ia ese lau ia hamauria noho!

⁴⁸Dirava ese lau dekenai idia tuari henia taudia, edia davana ia henia noho. Ia ese taunimanima lauegu henunai ia atoa noho.

⁴⁹Lau dekenai idia tuari henia taudia dekena amo, Lohiabada ese lau ia hamauria noho. Lohiabada e, idia dekena amo, lau dekenai kwalimu oi henia. Dagedage taudia dekena amo oi ese lau oi hamauria.

⁵⁰Inai dainai Lohiabada e, lau ese oi do lau hanamoa, bese ibounai edia huanai. Lauegu ane dekenai oiemu ladana do lau hanamoa.

⁵¹Kwalimu badana be, ia ese iena king dekenai ia henia noho. Lohiabada ese ia abia hidi tauna, be ia bogahisihisi henia noho. Bona Lohiabada ese Davida bona iena tubuna taudia, do ia bogahisihisi henia, ela bona hanaihanai.”