Read Buka Helaga (Hiri Motu) 1993 2 SAMUELA 9 Bible Online

2 SAMUELA 9 - Buka Helaga (Hiri Motu) 1993 bible

2 SAMUELA 9

¹Davida ese ia henanadai, ia gwau, “Saulo ena famili tauna ta ia do noho, o lasi? Lau ura kara namona ia dekenai do lau karaia, Ionatana dainai.”

²Hesiai tauna ta ia noho, Saulo ena famili dekena amo, iena ladana be Siba. Idia boiria, Davida dekenai do ia hedinarai.

³Vadaeni Davida ese Siba ia nanadaia, ia gwau, “Saulo ena famili tauna ta ia noho, o? Lau ura be Dirava ena bogahisihisi ia dekenai do lau henia.” Siba ese king dekenai ia haere, ia gwau, “Ionatana ena natuna ta be do noho, ia be madi iena aena ruaosi idia dika.”

⁴King Davida ia nanadaia, ia gwau, “Ia be edeseni?” Siba ia haere, ia gwau, “Ia be Makiri Amiele ena ruma dekenai ia noho, Lo Debara hanua dekenai.”

⁵Vadaeni King Davida ese hereva ia siaia, vadaeni Lo Debara dekenai Makiri Amiele ena ruma dekena amo Mepiboseta idia hakaua mai.

⁶Mepiboseta, Ionatana Saulo ena natuna, be Davida dekenai ia ginidae. Vadaeni ia tui diho, iena kwarana ia atoa diho, Davida ia matauraia. Davida ia gwau, “Mepiboseta.” Mepiboseta ia haere, ia gwau, “Lohia e, lau be oiemu hesiai tauna.”

⁷Davida ese ia hamaoroa, ia gwau, “Oi gari lasi, oiemu tamana Ionatana dainai, kara namona oi dekenai do lau karaia. Oiemu tubuna Saulo ena tano ibounai be oi dekenai do lau henia, bona lauegu aniani patana dekenai do oi aniani nega ibounai.”

⁸Mepiboseta be ma ia tui diho lou, ia gwau, “Lau, oiemu hesiai tauna, egu namo be dahaka? Lau be sisia ia mase bamona, lau dekenai oi laloa ena anina be dahaka?”

⁹Vadaeni king ese Saulo ena hesiai tauna Siba ia boiria, ia hamaoroa, ia gwau, “Saulo mai ena famili taudia edia kohu ibounai be oiemu biaguna ena tubuna dekenai lau henia vadaeni.

¹⁰Oi, bona oiemu natuna, bona oiemu hesiai taudia ese Saulo ena tano do umui birulaia, bona tano ena anina do umui haboua, Saulo iena famili edia aniani do oi henia totona. To oiemu biaguna ena tubuna Mepiboseta be lauegu aniani patana dekenai do ia aniani, nega ibounai.” Siba ena natuna tau be 15, bona iena hesiai taudia be 20.

¹¹Siba ese king dekenai ia hereva, ia gwau, “Lauegu king badana e, lau ese oiemu oda ibounai do lau karaia.” Unai dainai Mepiboseta be Davida ena pata dekenai ia aniani, king ena natuna ta bamona.

¹²Mepiboseta be mai ena natuna maragina ta, iena ladana be Mika. Siba ena famili taudia ibounai be Mepiboseta ena hesiai taudia idia lao.

¹³Unai dainai Mepiboseta be Ierusalema dekenai ia noho, badina be king ena pata dekenai ia aniani, nega ibounai. Ia be iena aena ruaosi idia dika.