Read Buka Helaga (Hiri Motu) 1993 1 KING TAUDIA 12 Bible Online

1 KING TAUDIA 12 - Buka Helaga (Hiri Motu) 1993 bible

1 KING TAUDIA 12

¹Rehoboama be Sekema hanua dekenai ia lao, badina be Israela taudia ibounai be Sekema dekenai idia lao, king do idia halaoa totona.

²Ieroboama Nebata be Aigupito dekenai ia noho, Solomona dekena amo ia heau neganai ia lao gabuna. Ieroboama ese Rehoboama ia lao Sekema ena hereva ia kamonai, vadaeni Ieroboama be Aigupito dekena amo ia giroa mai.

³Israela ena iduhu taudia ese Ieroboama idia boiria, vadaeni Ieroboama bona Israela hebou taudia ibounai idia mai, Rehoboama dekenai idia hereva, idia gwau,

⁴“Oiemu tamana ese aiemai gaukara ia hametaua auka herea. Unai dainai harihari oiemu tamana ena hesiai gaukara auka bona metauna ai dekena amo do oi kokia sisina, vadaeni unai neganai ai ese oiemu hesiai gaukara do ai karaia.”

⁵Rehoboama ia haere, ia gwau, “Do umui raka lao, dina toi hegeregere, ma do umui giroa mai lau dekenai.” Vadaeni, Israela iduhu taudia idia raka lao.

⁶King Rehoboama be tau badadia, iena tamana Solomona ena sisiba taudia dekenai ia lao, idia ia nanadaia, ia gwau, “Umui emui laloa lau dekenai do umui gwauraia, vadaeni inai Israela iduhu taudia dekenai do lau haere.”

⁷Tau badadia ese idia haere henia, idia gwau, “Bema hari dina inai taunimanima edia hesiai tauna bamona do oi lao, edia hesiai do oi karaia, bona mai manau danu idia dekenai do oi haere neganai, idia ese oiemu hesiai taudia do idia lao hanaihanai.”

⁸To Rehoboama ese inai tau badadia edia sisiba ia kamonai henia lasi. Ia be eregabe taudia, iena mero dinadia ia mai bona ia bada, ia danu idia noho taudia, bona hari idia be iena sisiba taudia, dekenai ia lao.

⁹Ia ese idia ia nanadaia, ia gwau, “Umui emui laloa be dahaka? Israela iduhu taudia idia ura edia gaukara ena metau do lau hamaragia. Edena bamona idia dekenai do lau haere?”

¹⁰Eregabe taudia ese Rehoboama dekenai idia haere, idia gwau, “Inai bamona idia dekenai do oi haere, oi gwau, ‘Lauegu ima kwakikwakina maragina ena udunana ese tamagu ena mamuna ena udunana do ia hanaia.

¹¹Lauegu tamana ese gaukara metau umui dekenai ia atoa, to lau ese emui gaukara be ma do lau habadaia. Tamagu ese varo maragina dekenai umui ia kwadia, to lau ese hosi idia kwadia varo badana dekenai umui do lau kwadia!’ ”

¹²Vadaeni dina toi idia ore, Ieroboama bona Israela iduhu taudia ibounai be Rehoboama dekenai idia mai, king ena hereva hegeregerena.

¹³Vadaeni king ese tau badadia edia sisiba ia kamonai henia lasi. Ia ese Israela iduhu taudia dekenai ia hereva dagedage.

¹⁴Oibe, king Rehoboama ese eregabe taudia edia sisiba hegeregerena ia hereva, ia gwau, “Lauegu tamana ese gaukara metau umui dekenai ia atoa, to lau ese iena metau do lau habadaia, bona tamagu ese kwadia varo dekena amo umui ia kwadia, to lau ese hosi idia kwadia gauna dekenai umui do lau kwadia.”

¹⁵Unai dala dekenai king Rehoboama ese Israela iduhu taudia edia ura ia abia dae lasi. To inai bamona kara be Lohiabada ese ia havaraia. Badina inai be Lohiabada ese Ieroboama Nebata ia herevalaia gauna hegeregere. Lohiabada ena hereva be peroveta tauna ladana Ahaisa, Silono tauna ena uduna dekena amo Ieroboama dekenai ia mai.

¹⁶Israela iduhu taudia ibounai idia itaia, king Rehoboama ese edia hereva ia kamonai lasi, vadaeni idia ese king dekenai idia haere, idia gwau, “Davida bona iena famili be ai ura lasi! Dahaka namo ai dekenai idia havaraia? Israela taudia e, iseda ruma dekenai ita giroa lou namo! Rehoboama be do ia lao, bona ia ese sibona ia naria be namo!” Vadaeni unai bamona dala dekenai Israela taudia ese Rehoboama dekena amo idia raka siri.

¹⁷Bona unai dainai Rehoboama ese Iuda tano idia noho taudia sibona edia king ia lao.

¹⁸Vadaeni king Rehoboama ese gaukara taudia edia biaguna Adonirama be Israela taudia dekenai ia siaia, to idia ese Adonirama nadi dekena amo idia hodoa mase. Unai dainai Rehoboama be karaharaga iena kariota dekenai ia guia, ia heau mauri lao Ierusalema dekenai.

¹⁹Bona unai negana ia mai bona hari, Israela taudia ese Davida ena tubuna taudia dekena amo idia parara.

²⁰To Israela taudia idia kamonai Ieroboama be ia giroa mai, vadaeni idia ese idia boiria, hebou lalonai. Vadaeni hebou lalonai, Israela taudia ibounai ese Ieroboama edia king idia halaoa. Israela iduhuna ta be Davida ena tubuna taudia edia murinai ia raka lasi. To Iuda iduhu taudia sibona ese Davida ena tubuna taudia edia murinai idia raka.

²¹Rehoboama be Ierusalema dekenai ia ginidae neganai, ia ese Iuda iduhu bona Beniamina iduhu taudia ibounai ia haboua, tuari taudia ibounai 180,000. Ia ura tuari dekena amo Israela iduhu taudia do ia halusia, bona do ia gunalaidia lou.

²²To Dirava ese peroveta tauna ladana Semaia dekenai ia hereva, ia gwau,

²³“Rehoboama, Solomona ena natuna do oi hamaoroa, Iuda taudia ibounai bona Beniamina taudia ibounai danu do oi hamaoroa, oi gwau,

²⁴‘Lohiabada be inai bamona ia gwau: Do umui lao lasi tuari totona, umui emui varavara, Israela taudia do umui tuari henia lasi. Umui ta ta emui ruma dekenai do umui giroa lou, badina be idia vara gaudia be lauegu ura dekena amo.’ ” Vadaeni idia ese Lohiabada ena hereva idia kamonai henia, edia ruma ta ta dekenai idia lou lao.

²⁵Israela ena king, Ieroboama, ese Sekema hanua ia hagoadaia. Sekema be Eparaima ena ororo tano dekenai ia noho. Ieroboama be unuseni ia noho nega sisina. Unai murinai ia ese Penuela hanua ia hagoadaia.

²⁶Ieroboama be inai bamona ia laloa, ia gwau, “Inai Israela basileia be Davida ena iduhu taudia dekenai sedira do ia giroa lou.

²⁷Bema lauegu taunimanima be Ierusalema dekenai idia lao, Dubu Helaga dekenai boubou gaudia idia henia neganai, idia ese edia lohia, king Rehoboama dekenai do idia giroa lou, bona lau do idia alaia.”

²⁸Unai dainai, ia ese iena sisiba henia taudia edia sisiba ia kamonai murinai, Ieroboama ese boromakau rua golo dekena amo ia karaia, bona iena taunimanima ia hamaoroa, ia gwau, “Ierusalema dekenai tomadiho totona umui lao be daudau herea. Israela taudia e, Aigupito dekena amo umui ia hakaua mai dirava be inai!”

²⁹Golo boromakau ta be Betele dekenai ia atoa, ma ta be Dano dekenai ia atoa.

³⁰Bona inai kara ese kerere bada Israela dekenai ia havaraia. Tomadiho totona idia be Betele bona Dano dekenai idia lao.

³¹Ieroboama ese danu dubu haida be ataiai gabudia dekenai ia haginia, bona unai dubu edia hahelagaia taudia, taunimanima edia huanai dekena amo ia abia hidi, to Levi taudia lasi.

³²Ieroboama ese danu aria ta ia gwauraia. Hua namba 8 ena dina namba 15 be aria do idia karaia, Iuda dekenai idia karaia hegeregerena. Betele dekenai ia atoa boubou patana ena latanai, boubou gaudia ia gabua, golo boromakau tomadiho henia totona. Bona Betele dekenai, iena hahelagaia taudia, ia haginia vadaeni ataiai gabudia idia naria taudia, ia atoa, hesiai gaukara do idia karaia totona.

³³Hua namba 8 ena dina namba 15, ia sibona ese ia gwauraia dinana, Ieroboama be Betele dekenai ia lao, boubou patana dekenai boubou ia karaia. Unai bamona be Ieroboama ese Israela taudia totona aria ta ia gwauraia, bona ia sibona ese boubou gauna ia gabua.