Read Buka Helaga (Hiri Motu) 1993 1 KING TAUDIA 16 Bible Online

1 KING TAUDIA 16 - Buka Helaga (Hiri Motu) 1993 bible

1 KING TAUDIA 16

¹Lohiabada ese peroveta tauna Iehu Hanani dekenai ia hereva, Basa totona.

²Lohiabada ia gwau, “Basa e, lau ese tano ena kahu dekena amo oi lau abia isi, bona Israela ena lohia oi lau halaoa. To oi be Ieroboama ena dala dekenai oi raka, bona egu bese, Israela taudia, oi hakaua kerere dainai, kara dika idia karaia. Bona unai dainai egu badu ia toreisi.

³Vadaeni lau ese oi, Basa, mai oiemu bese danu do lau hadikaia ore, Ieroboama Nebata ena bese lau haorea hegeregerena.

⁴Basa ena bese tauna ta bema ia mase neganai, sisia ese do idia ania, o hanua ena murimurinai bema ia mase, be ataiai manudia ese do idia ania.”

⁵Basa ena kara oredia, bona iena tuari kwalimu karadia ibounai edia sivarai, be Israela Ena King Edia Sivarai Buka ena lalonai idia torea vadaeni.

⁶Basa be ia mase, bona Tirisa dekenai idia guria. Iena natuna tau, Elaha, ese king dagi ia abia, Basa ena gabu dekenai.

⁷Unai sisiba hereva, Lohiabada ese Basa, mai ena bese danu dekenai ia siaia hereva, peroveta tauna Iehu Hanani dekena amo, be Basa ena kara dika Lohiabada ena vairanai dainai. Basa ese iena dika bada dekena amo Lohiabada ia habadua, guna Ieroboama ese ia karaia bamona. To Lohiabada ena badu danu Basa ena latanai ia ginidae, badina Basa ese Ieroboama ena bese ibounai ia alaia mase.

⁸Asa, ia Iuda ena king lagani namba 26 lalonai, Elaha Basa ese Israela ena king dagi ia karaia hamatamaia, Tirisa dekenai. Ia be king lagani rua sibona.

⁹Elaha ena opesa ta, ena ladana be Simiri, Elaha ena kariota orea kahana ena biaguna, ese Elaha do ia hadikaia dalana ia tahua. Elaha be Tirisa dekenai, Arasa ena ruma dekenai muramura ia inua ela bona ia kekero. Inai Arasa be king ena ruma gimaia tauna, Tirisa dekenai.

¹⁰Unai neganai Simiri be ia raka vareai, ia ese Elaha ia alaia mase. Inai kara be Iuda ena king Asa ia king lagani namba 27 lalonai ia vara. Simiri be Elaha ena gabu dekenai ia lohia.

¹¹Simiri ese king dagi ia karaia hamatamaia dinana dekenai, ia ese Basa ena bese taudia ibounai ia alaia mase, edia varavara tau ibounai, bona edia turana tau ibounai be ta ia heau mauri lasi.

¹²Unai dainai Simiri ese Basa ena bese taudia ibounai ia alaia ore, Lohiabada ese iena peroveta tauna Iehu ena uduna dekena amo Basa totona ia gwauraia hereva hegeregerena.

¹³Basa bona iena natuna Elaha edia kara dika dainai, bona edia kaivakuku dekena amo, bona unai edia dika dekena amo idia ese Israela taudia be kara dika lalonai idia hakaua dainai, Lohiabada, Israela ena Dirava ia badu.

¹⁴Elaha ena kara oredia edia sivarai be Israela Ena King Edia Sivarai Buka ena lalonai idia torea vadaeni.

¹⁵Asa, ia Iuda ena king lagani namba 27 lalonai, Simiri be dina 7 Tirisa dekenai ia lohia. Unai neganai Israela tuari taudia ese Gibetona, Pilistia taudia edia hanua ta idia tuari henia, bona idia koua hagegea noho.

¹⁶Inai tuari taudia edia kamepa dekenai sivarai idia kamonai, Simiri ese king Elaha hadikaia totona ia laloa, bona ia alaia mase vadaeni. Unai dainai unai tuari taudia ese maoromaoro edia tuari biaguna, Omeri idia abia hidi, Israela ena king idia halaoa, edia kamepa dekenai.

¹⁷Unai dainai, Omeri, mai ena tuari taudia danu ese Gibetona idia rakatania, bona idia lao, Tirisa hanua idia koua hagegea.

¹⁸Simiri ese ia itaia, idia ese hanua idia abia vadaeni, vadaeni ia ese king ena ruma lalonai ia noho daiutu, idia hagoadaia gauna ta, lalonai ia raka vareai. Unai daiutu lalonai Simiri ese lahi ia gabua hamatamaia, bona ia sibona be lahi lalonai ia mase.

¹⁹Simiri ena mase be sibona ena kara dika dainai, Lohiabada ena vairanai ia kara dika, bona Ieroboama ena dala hegeregerena ia raka. Badina be kara dika ia karaia, bona unai dika dekena amo ia ese Israela taudia be kara dika lalonai ia hakaudia.

²⁰Simiri ena kara orena, bona ia ese Elaha hadikaia totona ia laloa karaia, edia sivarai be Israela Ena King Edia Sivarai Buka ena lalonai idia torea vadaeni.

²¹Vadaeni Israela taudia idia laloa tamona lasi, idia kahana idia ura Tibini Ginata be edia king, ma idia kahana idia ura Omeri be edia king.

²²To Omeri idia ura henia taudia be idia goada lao, bona idia ese Tibini idia ura henia taudia idia halusia. Tibini ia mase, bona Omeri be king dagi ia abia.

²³Asa, Iuda ena king, ena lohia lagani namba 31 lalonai, Omeri ese Israela ia lohia karaia hamatamaia, bona iena king lagani be 12. Lagani 6 lalonai ia be Tirisa dekenai ia noho.

²⁴Vadaeni ia ese Samaria ena ororo be tau ta ladana Siema dekena amo ia hoia, ena davana be siliva moni ibounai 6000. Omeri ese unai ororo ena latanai hanua ta ia haginia, bona magu goadana ia haginia hagegea. Hanua ena ladana ia atoa Samaria, ororo ena biaguna gunana Siema ena ladana hegeregerena.

²⁵To Omeri be Lohiabada ena vairanai ia kara dika, bona iena dika ese king gunadia ibounai edia dika idia hanaia.

²⁶Ia ese Ieroboama ena kara bamona ia karaia. Bona iena kara dika dekena amo Omeri ese Israela taudia kara dika lalonai, bona kaivakuku tomadiho henia kara dekenai ia hakaudia. Unai kara dainai Lohiabada, Israela ena Dirava ena badu ia toreisi idia dekenai.

²⁷Omeri ena kara orena, bona iena goada karadia edia sivarai be Israela Ena King Edia Sivarai Buka ena lalonai idia torea vadaeni.

²⁸Vadaeni Omeri ia mase, bona Samaria dekenai idia guria. Iena natuna tau Ahaba ese king dagi ia abia, Omeri ena gabu dekenai.

²⁹Asa, Iuda taudia ese king dagi ia dogoatao lagani 38 ena lalonai Ahaba, Omeri ena natuna ese Israela ia gunalaia hamatamaia. Ahaba Omeri ese lagani 22 Israela ia gunalaia, Samaria dekenai.

³⁰Ahaba Omeri be Lohiabada ena vairana dekenai kara dika ia karaia, king gunadia edia dika be ia ese ia hanaia momokani.

³¹Ia be ia laloa Ieroboama Nebata ena kara dika daladia do ia raka be gau maragimaragi sibona. Unai dainai ia ese Iesebele, Etebala, Sidono ena king ena natuna hahine ia adavaia. Bona Ahaba danu ia lao, ia ese Bala dirava ia tomadiho henia.

³²Ahaba ese Bala ena dubu ta Samaria dekenai ia haginia, dubu lalonai danu be boubou patana ta ia haginia.

³³Ahaba ese danu hahine dirava Asera ena laulau ta ia haginia. Ahaba ese Lohiabada, Israela ena Dirava ia habadua momokani, Israela edia king edia dika ibounai ia ese ia hanaia.

³⁴Ahaba ena nega lalonai Hiele, Betele tauna ese Ieriko hanua ia haginia lou. Ieriko ena badina nadidia ia haginia neganai, Hiele ena natuna vara guna Abirama be ia mase. Ieriko ena ikoukou ia haginia neganai, Segubu, Hiele ena natuna, dokona ia vara merona, ia mase. Abirama bona Segubu edia mase be Lohiabada ese ia gwauraia guna, Iosua Nunu ena uduna dekena amo.