Read Buka Helaga (Hiri Motu) 1993 1 KING TAUDIA 18 Bible Online

1 KING TAUDIA 18 - Buka Helaga (Hiri Motu) 1993 bible

1 KING TAUDIA 18

¹Dina momo idia lao murinai, unai medu ia diho lasi negana ena lagani ihatoina lalonai, Lohiabada ese Elia ia hamaoroa, ia gwau, “Oi lao, king Ahaba dekenai do oi hedinaraia, vadaeni medu be tano dekenai do lau hadihoa.”

²Unai dainai Elia ia toreisi, ia lao, Ahaba dekenai do ia hedinarai totona. Unai neganai medu lasi ena dika be bada herea Samaria dekenai.

³Unai dainai Ahaba ese Obadaia ia boiria. Obadaia ese king ena ruma hesiai taudia ia gunalaia. Obadaia danu be Lohiabada ia tomadiho henia tauna ta.

⁴Bona Iesebele ese Lohiabada ena peroveta taudia ia alaia murinai, Obadaia ese peroveta taudia 100 ia abia, nadi matuna lalonai idia ia hunia. Orea rua dekenai ia hunidia, orea ta 50, bona orea ta 50. Bona Obadaia ese aniani bona ranu ia henia idia dekenai.

⁵Ahaba ese Obadaia dekenai ia hereva, ia gwau, “Tano do oi raka hanaia, ranu gabudia ibounai, bona koura ibounai do oi itaia, sedira rei sisina do ita davaria, vadaeni hosi bona doniki do ita ubua, do idia mauri noho. Unai neganai, iseda ubua gaudia ibounai do ita hamasea lasi.”

⁶Unai dainai idia ruaosi idia laloa tamona edena tano do idia tahua, vadaeni idia raka lao, ta kahana ta, ta kahana ta.

⁷Obadaia be dala dekenai ia raka neganai, Elia ese ia davaria. Vadaeni Obadaia be ia diba Elia, bona ia tui diho tano dekenai, ia gwau, “Elia e, unai be oi, a?”

⁸Elia ese ia haere, ia gwau, “Lau inai. Oi lao, oiemu biaguna do oi hamaoroa, oi gwau, ‘Elia be iniseni ia ginidae vadaeni.’ ”

⁹Obadaia ia gwau, “Lauegu dika be dahaka, vadaeni oi ura king Ahaba ese lau do ia alaia mase?

¹⁰Lohiabada, mauri ena Dirava ena ladana dekenai lau hereva momokani inai, Ahaba ese tanobada bona basileia ibounai dekenai oi ia tahua noho. Bona bema idia gwau, ‘Elia be iniseni ia noho lasi,’ neganai Ahaba ese idia dekena amo gwauhamata metaudia ia abia, idia gwau, ‘Elia be ai davaria lasi momokani.’

¹¹To harihari, oi be oi gwau, ‘Oi lao, oiemu biaguna oi hamaoroa, oi gwau: Elia be iniseni ia noho.’

¹²To lau diba lasi edena gabu dekenai Lohiabada ena Lauma ese oi do ia abia lao. Vadaeni bema lau ese Ahaba lau hamaoroa, ‘Elia be iniseni,’ to bema oi ia davaria lasi neganai, ia ese lau do ia alaia mase. Oi diba lau be Lohiabada lau tomadiho henia noho, lauegu mero neganai ia mai bona harihari.

¹³Sedira oi kamonai lasi, a, Iesebele ese Lohiabada ena peroveta taudia ia alaia neganai, lau ese peroveta taudia 100 be nadi matuna dekenai lau hunidia. Orea rua dekenai idia lau hunia, aniani bona ranu danu idia dekenai lau henia.

¹⁴To harihari oi ese lau oi oda, king do lau hamaoroa, oi be iniseni oi noho? Ahaba ese lau do ia alaia mase!”

¹⁵Elia ia haere, ia gwau, “Siahu ibounai Lohiabada ena ladana dekenai, lau gwauhamata inai, hari dina lau be king Ahaba dekenai do lau hedinaraia.”

¹⁶Unai dainai Obadaia ese king Ahaba dekenai ia lao, ia hamaoroa. Vadaeni Ahaba be ia lao, Elia do ia davaria totona.

¹⁷Ahaba ese Elia ia itaia neganai, ia gwau, “Elia e, oi mai inai, a? Oi ese Israela oi hadikaia noho, oi be dika herea!”

¹⁸Elia ese ia haere, ia gwau, “Lau ese Israela lau hadikaia lasi, to oi ese oi hadikaia noho, oi bona oiemu tamana. Oi ese Lohiabada ena oda oi kamonai henia lasi, bona Bala dirava koikoi dekenai oi tomadiho noho.

¹⁹Unai dainai harihari oi ese hereva do oi siaia, Israela taudia ibounai lau dekenai do oi haboua, Karamele Ororo dekenai. Bona Bala ena peroveta taudia 450, bona Asera ena peroveta taudia 400, Iesebele ese edia aniani ia henidia taudia danu do oi mailaia.”

²⁰Unai dainai, king Ahaba ese Israela taudia ibounai ia haboua, peroveta taudia danu ia haboua, Karamele Ororo dekenai.

²¹Vadaeni Elia ese taunimanima ibounai edia vairanai ia gini, ia gwau, “Laloa rua ena dala dekenai do umui noho, ela bona edena negai? Bema Lohiabada be Dirava, ia dekenai do umui tomadiho, to bema Bala be Dirava, ia dekenai do umui tomadiho.” To taunimanima ese hereva ta idia haere henia lasi.

²²Vadaeni Elia ese Bala ena peroveta taudia ia hamaoroa, ia gwau, “Lau be Lohiabada ena peroveta tauna, lau sibona lau noho, to Bala ena peroveta taudia be 450.

²³Boromakau tau rua do umui mailaia. Idia ta do umui abia, alaia, utua maragimaragi, bona au rakuraku latanai do umui atoa, to lahi do umui karaia lasi. Vadaeni lau ese boromakau iharuana do lau abia hegaegae, au rakuraku latanai do lau atoa, bona lahi do lau karaia lasi.

²⁴Unai neganai Bala ena peroveta taudia ese edia dirava do idia noia, bona lau ese Lohiabada do lau noia, bona edena dirava ese lahi dekena amo do ia haere, ia be Dirava.” Taunimanima ibounai be mai boiboi danu idia haere, idia gwau, “Oiemu hereva be namo.”

²⁵Vadaeni Elia ese Bala ena peroveta taudia ia hamaoroa, ia gwau, “Umui be momo herea dainai boubou umui karaia guna, boromakau ta do umui abia, bona do umui abia hegaegae. Umui emui dirava dekenai do umui guriguri, to au rakuraku do umui gabua lasi.”

²⁶Vadaeni taunimanima ese boromakau tau ta Bala peroveta taudia dekenai idia henia. Idia abia hegaegae, bona Bala dirava dekenai idia guriguri mai boiboi danu ela bona dina tubua. Idia gwau, “Bala e, ai dekenai do oi haere.” Idia be edia boubou patana dekenai idia mavaru hagegea noho.

²⁷Dina tubua dekenai Elia ese idia dekenai ia hevaseha, ia gwau, “Do umui boiboi bada, badina ia be dirava ta. To sedira ia be ia nihi noho, o sedira ia mei noho, o sedira ia loaloa noho. O sedira ia mahuta noho, do umui hanogaia.”

²⁸Vadaeni idia ese edia boiboi idia habadaia, bona edia kara hegeregerena, sibodia edia kopina idia gwadaia bona utua, ela bona edia rarana ia diho lao bada.

²⁹Dina tubua murinai edia dirava dekenai idia noinoi, mai boiboi bada herea, ela bona adorahi boubou negana, to haere ta be lasi, bona regerege ta idia kamonaia lasi.

³⁰Vadaeni Elia ese taunimanima ibounai dekenai ia hereva, ia gwau, “Lau dekenai do umui raka kahirakahira.” Ia dekenai idia raka lao. Ia ese Lohiabada ena boubou patana, idia hadikaia vadaeni gauna, ia hanamoa.

³¹Elia ese nadi 12 ia abia, Iakobo ena natuna edia iduhu hegeregere. Unai iduhu dekenai Lohiabada ia herevalaia guna, Iakobo ia hamaoroa, ia gwau, “Oiemu ladana be Israela.”

³²Unai nadi 12 dekena amo Elia ese boubou patana ia haginia lou, Lohiabada ena ladana dekenai. Vadaeni dadaira be ia geia, inai dadaira ese boubou patana ia hagegea. Dadaira ena dobu be hegeregere ranu ena bada 14 lita ese do ia hahonua diba.

³³Au rakuraku be boubou patana ena latanai, bona boromakau ia utua maragimaragi, au latanai ia atoa. Vadaeni idia dekenai ia hereva, ia gwau, “Daramu 4 be ranu dekenai do umui hahonua, boubou ena latanai do umui bubua, bona au rakuraku ena latanai danu.” Unai bamona idia karaia.

³⁴Elia ma ia hereva, ia gwau, “Daramu do umui hahonua, bona bubua lou.” Vadaeni idia karaia lou. Elia ma ia oda lou, ia gwau, “Nega ihatoina do umui karaia lou.” Vadaeni daramu idia hahonua lou, bona nega ihatoina boubou ena latanai ranu idia bubua.

³⁵Ranu ese boubou patana ia heau hagegea, bona dadaira be ranu dekenai ia honu momokani.

³⁶Adorahi boubou henia negana ia ginidae neganai, peroveta tauna Elia be boubou patana badinai ia gini, ia guriguri, ia gwau, “Lohiabada e, Aberahamo bona Isako bona Iakobo edia Dirava e, hari dina do oi hedinaraia momokani oi be Israela ena Dirava, bona lau, oiemu hesiai tauna, ese inai kara oiemu oda dekenai lau karaia noho.

³⁷Lohiabada e, lau dekenai do oi haere, mani oi haere, vadaeni inai bese taudia do idia diba, oi Lohiabada sibona be Dirava momokani. Bona oi ese idia edia lalona do oi hagiroa lou oi dekenai.”

³⁸Vadaeni Lohiabada ese lahi ia siaia diho, unai boubou gauna ia gabua ore, bona au, bona nadi, bona dadaira ena tano danu, ranu ibounai danu be ia kaukau momokani.

³⁹Taunimanima ibounai ese idia itaia, vadaeni tano dekenai idia moru diho, idia gwau, “Lohiabada, ia be Dirava, Lohiabada, ia be Dirava.”

⁴⁰Vadaeni Elia ia oda henidia, ia gwau, “Bala peroveta taudia do umui dogoatao, ta do ia heau mauri lasi.” Idia ibounai idia dogoatao, vadaeni Elia ese idia ia hakaua lao, sinavai maragi ladana Kisona dekenai. Unuseni Elia ese ia aladia mase.

⁴¹Vadaeni Elia ese Ahaba ia hamaoroa, ia gwau, “Oi lao, oi aniani, oi inua danu, badina lau kamonai, medu ia mai noho.”

⁴²Unai dainai Ahaba ia lao, do ia aniani totona. Unai neganai Elia be Karamele Ororo ena ataiai ia daekau lao. Unuseni ia tui diho tano dekenai, bona iena kwarana be iena tuina edia huanai ia atoa.

⁴³Elia ese iena hesiai tauna ia hamaoroa, ia gwau, “Oi lao, davara kahanai do oi itaia noho.” Ia lao, iena matana ia negea, vadaeni ia giroa, ia gwau, “Gau ta lau itaia lasi.” Elia ese nega 7 iena hesiai tauna ia hamaoroa do ia giroa lou, davara kahana do ia itaia totona.

⁴⁴Nega namba 7 hesiai tauna ia giroa mai, ia gwau, “Ori maragina ta lau itaia, iena bada be tau ta ena imana bamona, davara dekena amo ia daekau noho.” Vadaeni Elia ese ia hamaoroa, ia gwau, “Oi lao, Ahaba do oi hamaoroa, iena kariota dekenai do ia guia, iena ruma dekenai do ia lao, medu ese do ia koua garina.”

⁴⁵Nega sisina ia lao, vadaeni guba be ori koremakorema ese ia koua, lai danu ia toa matamaia, bona medu bada ia diho hamatamaia. Ahaba be kariota dekenai ia guia, Ieserele dekenai ia heau gwauraia.

⁴⁶Vadaeni Lohiabada ena siahu be Elia dekenai ia vareai. Iena rami ia kwatua, bona aena dekenai Ahaba ena vairana dekenai ia heau, ela bona Ieserele hanua ena raka vareai gabuna.