Read Buka Helaga (Hiri Motu) 1993 1 KING TAUDIA 9 Bible Online

1 KING TAUDIA 9 - Buka Helaga (Hiri Motu) 1993 bible

1 KING TAUDIA 9

¹King Solomona ese Lohiabada ena Dubu Helaga, bona king ena ruma, bona ia ura ruma ibounai ia haginia vadaeni murinai,

²Lohiabada ese Solomona dekenai ia hedinarai lou, Gibeona dekenai ia hedinarai hegeregerena.

³Lohiabada ese Solomona dekenai ia hereva, ia gwau, “Oiemu guriguri bona oiemu noinoi lau kamonai vadaeni. Inai oi ese oi haginia vadaeni Dubu Helaga, be lau ese lau hahelagaia vadaeni, bona inai Dubu be lau do idia tomadiho henia gabuna ela bona hanaihanai. Lau ese do lau naria namonamo, bona lauegu Ladana bona lauegu kudouna be nega ibounai unuseni do ia noho.

⁴“Oi danu, bema lauegu vairanai do oi noho mai maoromaoro bona momokani, oiemu tamana Davida hegeregere, bona lauegu Taravatu bona oda ibounai oi badinaia neganai,

⁵lau ese oiemu tamana Davida dekenai lau henia gwauhamata do lau badinaia. Gwauhamata be inai: Israela be nega ibounai Davida ena tubuna taudia ese do idia gunalaia.

⁶“To bema oi, o oiemu natuna o tubuna taudia ese lau dekena amo idia raka siri neganai, o bema lauegu Taravatu bona oda umui kamonai henia lasi, bona dirava idaudia do umui tomadiho henia neganai,

⁷lau ese lauegu bese taudia be inai lau henidia tano dekena amo do lau luludia. Inai Dubu Helaga, lau do idia tomadiho gabuna, lau hahelagaia vadaeni gauna danu do lau rakatania. Idau bese taudia ibounai ese unai neganai Israela do idia kirikirilaia, bona do idia hahemaraia.

⁸Bona inai Dubu Helaga be do idia hadikaia ore, vadaeni raka hanaia taudia be do idia hoa bada, do idia gwau, ‘Badina dahaka Lohiabada ese inai tano bona inai Dubu Helaga dekenai inai bamona ia karaia?’

⁹Taunimanima haida do idia haere, do idia gwau, ‘Badina be inai: Israela taudia ese edia Dirava, Lohiabada, idia rakatania. Ia ese Aigupito dekena amo edia sene taudia ia hakaua mai, to idia ese Lohiabada idia rakatania. Bona danu, idia ese dirava idaudia idia badinaia, bona idia dekenai idia tomadiho. Unai bamona Israela taudia idia karaia dainai, Lohiabada ese inai dika ibounai idia dekenai ia karaia vadaeni.’ ”

¹⁰Solomona bona iena gaukara taudia ese Lohiabada ena Dubu Helaga bona Solomona ena ruma idia haginia haorea. Inai gaukara ibounai be lagani 20 lalonai idia karaia haorea.

¹¹Hirama, Turo taudia edia king, ese sida bona kasuarina audia, bona golo be Solomona ena ura hegeregerena ia henia. Vadaeni Solomona ese hanua badadia 20 Galilea tano dekenai, be Hirama dekenai ia henia.

¹²To Hirama be Turo dekena amo ia mai, Solomona ese ia henia vadaeni hanua do ia itaia totona, bona idia dekenai ia moale lasi.

¹³Vadaeni Hirama ese Solomona ia hereva henia, ia gwau, “Egu tadina e, inai lau dekenai oi henia hanua be inai bamona, a?” Unai hereva dainai unai kahana tano ena ladana idia atoa Kabulu, anina be, “Moale Lasi.”

¹⁴Hirama ese Solomona dekenai ia henia vadaeni golo ena metau be 4000 kilogaram ia hanaia.

¹⁵King Solomona ese gaukara taudia momo ia abia, ia fosia, iena gaukara idia karaia. Idia ese Dubu Helaga, bona Solomona ena ruma idia haginia. Idia ese danu Ierusalema ena gabu aukana ta, kohoro, ena ladana Milo idia haginia. Ma Solomona ese unai gaukara taudia ia siaia, Ierusalema hanua ena magu idia haginia. Inai gaukara taudia ese danu Hasoro, Megido bona Gesere hanua toiosi idia haginia lou.

¹⁶Guna, Aigupito ena king ese Gesere ia tuari henia, bona ia abia. Gesere hanua taudia, be ia ese ia alaia mase, bona edia hanua ia gabua ore. Gabeai Solomona ese iena natuna kekeni ia adavaia neganai, Aigupito ena king ese Gesere hanua be iena kekeni dekenai ia henia, iena headava ena harihari gauna totona.

¹⁷Vadaeni Solomona ese Gesere hanua ia haginia lou. Solomona ese danu, iena gaukara taudia dekena amo, Bete Horono, henuna hanua,

¹⁸bona Balata, bona Tamara hanuadia ia haginia lou. Inai hanua Tamara be Iuda ena tano kaukau kahana dekenai.

¹⁹Ma idia ese Solomona ena kohu haboua hanuadia, bona iena hosi, bona iena kariota idia noho hanuadia idia haginia. Idia ese danu Solomona ia ura karaia gaukara ibounai, Ierusalema dekenai, Lebanona dekenai, bona Solomona ia biagua gabudia ibounai dekenai idia karaia.

²⁰Israela tano dekenai idau bese taudia haida idia noho. Idia be Amoro taudia, bona Hiti taudia, bona Perisi taudia, bona Hivi taudia, bona Iebusu taudia.

²¹Guna, inai bese edia taudia momo herea be Israela taudia ese idia alaia ore, to haida sibona idia alaia lasi, idia do noho. Vadaeni Solomona ese inai do noho idau bese taudia ia abia, bona ia fosia, hesiai gaukara mai guia danu idia karaia. Inai bamona gaukara idia karaia noho ia mai bona hari.

²²To Solomona ese Israela taudia ta ia guia lasi, idia be iena tuari taudia, iena opesa, iena tuari biagudia, bona tuari gunalaia taudia, iena kariota kapena taudia, bona iena hosi guia taudia.

²³Solomona ena gaukara taudia mai guia danu, edia gaukara idia naria taudia be ibounai 550.

²⁴Solomona ena hahine, Aigupito king ena natuna, be Davida ena Hanua ia rakatania, Solomona ese ia totona ia haginia ruma dekenai ia noho. Unai neganai Solomona ese Ierusalema ena gabu aukana ta, kohoro ena ladana Milo ia haginia.

²⁵Lagani ta ta lalonai, Solomona ese nega toi gabua bouboudia bona maino karaia bouboudia Lohiabada dekenai ia henia, boubou patana, ia ese ia haginia gauna ena latanai. Bona Solomona ese danu muramura mai bonana danu, Lohiabada ena vairana dekenai ia gabua. Vadaeni Solomona ese Dubu Helaga ena gaukara ia karaia haorea momokani.

²⁶King Solomona ese lagatoi momo be Esiono Gebere hanua dekenai ia karaia. Esiono Gebere be Elata ena badibadinai, Davara Kakakaka ena kone dekenai, Edoma tano lalonai.

²⁷Vadaeni Hirama ese iena hesiai taudia haida ia siaia, unai lagatoi do idia guia, Solomona ena hesiai taudia danu do idia gaukara hebou.

²⁸Vadaeni inai lagatoi be Opiri tano dekenai idia lao, golo momo herea idia mailaia lou, Solomona dekenai idia henia. Inai golo ena metau be 14 toni mai kahana.