Read Buka Helaga (Hiri Motu) 1993 2 KING TAUDIA 14 Bible Online

2 KING TAUDIA 14 - Buka Helaga (Hiri Motu) 1993 bible

2 KING TAUDIA 14

¹Iehoasa Iehoahasa, Israela ena king, ena lohia lagani iharuana lalonai, Amasaia Ioasa ese Iuda ena king dagi ia hamatamaia.

²Iuda ia naria hamatamaia neganai, iena mauri lagani be 25, bona iena lohia lagani ibounai Ierusalema dekenai be 29. Amasaia ena sinana be Iehoadini, bona ia be Ierusalema hahine.

³Amasaia ese Lohiabada ena vairanai ia kara maoromaoro, to iena sene tauna Davida hegeregerena lasi. Amasaia ese iena tamana Ioasa ia karaia karadia ibounai ma ia karaia.

⁴To ataiai idia noho tomadiho gabudia be Amasaia ese ia kokia lasi, bona taunimanima ese unai gabudia dekenai boubou karadia idia karaia noho, bona mai bonana muramura idia do gabua noho.

⁵Amasaia ia diba king ena siahu be momokani ia dogoatao neganai, ia ese iena tamana idia alaia taudia ia aladia mase.

⁶To unai taudia edia natudia danu be Amasia ia aladia lasi, badina be Mose ena Taravatu Buka ia matauraia. Mose ena Taravatu lalonai, Lohiabada ese oda ia gwauraia, ia gwau: “Tamana be do umui alaia lasi, edia natudia edia dika dainai, bona memero do umui alaia lasi edia tamadia edia dika dainai, to tau ta ta ena kara dika, ena kara dika, dainai do ia mase.”

⁷Amasaia ese Damena Koura dekenai Edoma tuari taudia 10,000 ia alaia mase, bona tuari dekenai Amasaia ese Sela hanua ia abia, bona unai hanua dekenai ladana matamata ia henia, “Iokotele.” Unai hanua be do Iokotele, ia mai bona hari dina.

⁸Unai murinai Amasaia ese Iehoasa, Israela ena king, dekenai hereva gwauraia taudia ia siaia, ia gwau, “Emui tuari taudia do umui abia hegaegae, bona do ita tuari.”

⁹To Iehoasa, Israela ena king ese Amasaia, Iuda ena king dekenai hereva ia siaia lao, ia gwau, “Lebanona ava ginigini ta ese Lebanona sida auna ta dekenai hereva ia siaia lao, ia gwau, ‘Oiemu natuna kekeni be lauegu natuna tau dekenai do oi henia, do idia headava,’ to Lebanona ena uda boroma ta ese ia raka hanaia, bona ia ese unai ava ginigini ia moia diho momokani.

¹⁰Momokani, oi ese Edoma oi halusia, unai dainai oi hekokoroku noho. Namona be oiemu hanua dekenai oi noho, oiemu kwalimu do oi moalelaia noho. Anina be dahaka tuari do oi havaraia, bona do oi moru, oi bona Iuda besena ibounai danu?”

¹¹To Amasaia be unai hereva ia kamonai lasi. Unai dainai Iehoasa, Israela ena king be iena tuari taudia danu idia raka lao, bona Bete Semese dekenai ia ese Amasaia mai ena tuari taudia ia tuari henia. Bete Semese be Iuda ena tano dekenai.

¹²Vadaeni Amasaia ena tuari taudia be Iehoasa ese ia halusia, bona Iuda taudia idia heau, ta ta edia ruma, edia ruma dekenai idia lao.

¹³Unai neganai Iehoasa, Israela ena king ese Amasaia, Iuda ena king, ia abia mauri Bete Semese dekenai. Vadaeni Iehoasa be Ierusalema dekenai ia lao, Ierusalema ena magu ia hadikaia. Magu be Eparaima Iduara ela bona Daiguni Iduara kahana ibounai Iehoasa ese ia hamakohia, ena lata be 200 mita bamona.

¹⁴Iehoasa ese danu Lohiabada ena Dubu Helaga dekenai, bona king ena ruma dekenai ia noho golo bona siliva bona davana bada gaudia ibounai ia dadia. Iuda abia mauri taudia danu be Iehoasa ese ia guia, bona Samaria dekenai ia abidia lao.

¹⁵Iehoasa ena kara orena, bona iena goada ena sivarai, bona Amasaia, Iuda ena king ia tuari henia ena sivarai, be Israela Ena King Edia Sivarai Buka lalonai idia torea vadaeni.

¹⁶Vadaeni Iehoasa be ia mase, bona Samaria dekenai idia guria, Israela king edia guria gabuna lalonai. Vadaeni Iehoasa ena gabuna dekenai iena natuna Ieroboama ese king dagi ia abia.

¹⁷King Iehoasa, Israela ena king ia mase murinai, Amasaia, Iuda ena king be ma lagani 15 ia mauri noho, vadaeni ia danu ia mase.

¹⁸Amasaia ena kara orena be Iuda Ena King Edia Sivarai Buka lalonai idia torea vadaeni.

¹⁹Ierusalema dekenai tau haida ese Amasaia ena mase dalana idia laloa hebou, vadaeni Amasaia be Lakisi hanua dekenai ia heau. To idia ese tau haida Amasaia ena murinai idia siaia lao, ela bona Lakisi, bona unuseni idia ese Amasaia idia alaia mase.

²⁰Vadaeni hosi ena latanai idia atoa, Ierusalema dekenai idia abia lou, bona unuseni, king ena guria gabunai, Davida Ena Hanua lalonai, idia guria.

²¹Unai neganai Iuda taudia ibounai ese Amasaia ena natuna tau Usaia idia abia, king idia halaoa, iena tamana ena gabuna dekenai.

²²Iena tamana ia mase murinai Usaia ese Elata hanua tuari dekenai ia abia lou, bona ia haginia lou, Iuda ena hanua ta.

²³Amasaia Ioasa, Iuda ena king, ena lohia lagani 15 lalonai, Ieroboama Iehoasa, Israela ena king, be Samaria dekenai ia lohia hamatamaia. Iena lohia lagani be ibounai 41.

²⁴Ieroboama Iehoasa ese Lohiabada ena vairanai ia kara dika, bona ia ese Ieroboama Nebata ena kara dika, unai dekena amo Israela taudia ia hakererea kara dikana, ia rakatania lasi.

²⁵Ieroboama Iehoasa ese Israela ena tano, guna tuari dekenai ia boio tano, be tuari dekenai ia abia lou. Tano be inai: Hamata Raka Vareai Gabuna ela bona Damena Gohu. Inai kara be Lohiabada, Israela ena Dirava ese ia gwauhamata vadaeni, iena hesiai tauna Iona Amitai, ena uduna dekena amo. Iona Amitai be peroveta tauna ta Gata Hepere hanua dekena amo.

²⁶Badina be Lohiabada ese ia itaia, Israela taudia edia hisihisi be bada herea, ta ena noho ia namo lasi, guia taudia o guia lasi taudia, bona Israela be mai ena durua tauna ta lasi.

²⁷To Lohiabada ia ura lasi Israela ena ladana be tanobada dekena amo do idia kokia ore. Unai dainai ia ese Ieroboama Iehoasa dekena amo Israela ia hamauria.

²⁸Ieroboama Iehoasa ena kara orena, iena kara ibounai, bona iena goada tuari dekenai, bona Damaseko bona Hamata edia hanua be Iuda dekena amo ia abia lou, Israela ena, ena sivarai be Israela Ena King Edia Sivarai Buka lalonai idia torea vadaeni.

²⁹Vadaeni Ieroboama be ia mase, bona Israela ena king edia guria gabuna lalonai idia guria. Iena natuna tau, Sekaraia, ese king dagi ia abia, Ieroboama ena gabuna dekenai.