Read Buka Helaga (Hiri Motu) 1993 1 SIVARAI 11 Bible Online

1 SIVARAI 11 - Buka Helaga (Hiri Motu) 1993 bible

1 SIVARAI 11

¹Vadaeni Israela taudia ibou-nai be Davida dekenai idia lao, Heberona dekenai, idia gwau, “Ai be oiemu turiana bona oiemu rarana taudia.

²Guna neganai, Saulo ese ai dekenai ia king neganai, oi ese ai Israela taudia tuari dekenai ai oi gunalaia. Bona Lohiabada ese oi dekenai ia gwauhamata, ia gwau, ‘Oi ese lauegu bese Israela do oi gunalaia, bona edia king do oi lao.’ ”

³Unai dainai, Israela gunalaia taudia ibounai be king Davida dekenai idia lao, Heberona dekenai. Bona king Davida ese idia danu ia gwauhamata, Heberona dekenai, Lohiabada ena vairanai. Vadaeni idia ese Davida ena kwarana dekenai olive dehoro idia bubua, bona Israela ena king idia halaoa. Inai be Lohiabada ena gwauhamata hegeregerena, Samuela ena uduna dekena amo.

⁴King Davida, mai iena Israela tuari taudia danu be Ierusalema dekenai idia lao, unai hanua dekenai noho taudia do idia tuari henia totona.

⁵Iebusu taudia ese Davida idia hamaoroa, idia gwau, “Oi be inai hanua do oi vareai diba lasi.” To Davida ese Siona ena kohoro ia halusia, bona ia abia. Bona unai murinai Siona kohoro ena ladana idia atoa, “Davida Ena Hanua.”

⁶Davida ia gwau, “Edena tauna ese Iebusu tauna ta do ia alaia guna, ia be lohia bona tuari biaguna do lau halaoa.” Vadaeni Ioaba Seruia ese unai kara ia karaia guna. Unai dainai ia be tuari biaguna dagi ia abia.

⁷Vadaeni Davida be unai kohoro dekenai ia noho. Unai dainai Siona Kohoro ena ladana idia atoa, “Davida Ena Hanua.”

⁸Davida ese unai Siona gabu dekena amo hanua ma ia haginia hagegea. Ia haginia hamatamaia gabuna be tano ia daekau gabuna, ladana Milo. To Ioaba ese hanua orena ia haginia lou.

⁹Vadaeni Davida be ia bada herea lao, badina Lohiabada, Siahu Ibounai Dirava, be ia danu ia noho.

¹⁰Davida ena goada taudia edia lohia taudia edia ladana be inai: Idia ese, bona Israela taudia ibounai ese Davida idia durua, king siahu do ia abia totona, Lohiabada ese ia gwauhamata hegeregerena. Davida ena basileia idia hagoadaia noho taudia be inai:

¹¹Iasobeama, Hakamoni iduhu tauna. Ia be orea ta ladana, “Tuari Lohia Taudia Toi” edia gunalaia tauna. Nega ta dekenai, Iasobeama ese ia sibona ena io dekena amo tuari taudia 300 ia alaia mase.

¹²Unai toiosi edia huanai, Iasobeama ena murinai be Eleasara. Ia be Dodo, Ahohi iduhu tauna, ena natuna.

¹³Pilistia taudia be tuari totona Pasadamimi dekenai idia haboua neganai Eleasara be Davida danu ia noho unai gabu dekenai. Bali uma gabuna ta be unuseni, bona Israela taudia be Pilistia taudia edia vairanai idia heau hamatamaia.

¹⁴To Eleasara be uma gabuna lalonai ia gini, ia gimaia, vadaeni ia bona iena tuari taudia ese Pilistia taudia idia alaia mase. Lohiabada ese Eleasara dekenai kwalimu bada ia henia.

¹⁵Davida ena tuari taudia edia orea ta, ena ladana idia gwauraia be “Tuari Taudia Goadadia 30.” Inai tau 30 edia huanai dekena amo tuari taudia toi be nadi badana ta, Adulama Kohua kahirakahira, idia lao, badina unuseni Davida ia noho. Unai neganai danu Pilistia tuari orea ta be Repaima Koura dekenai idia kamepa noho.

¹⁶Unai neganai Davida be unai gabu aukana ena hunia gabunai ia noho, to Pilistia tuari taudia be Betelehema hanua dekenai idia noho.

¹⁷Vadaeni Davida ese Betelehema ena ranu namo herea ia laloa, bona ia gwau, “Lau madi o, bema tau ta ese Betelehema ena magu iduara ena badibadinai ia noho guri dekena amo ranu sisina lau dekenai do ia henia, lau be do lau inua.”

¹⁸Inai goada herea taudia toi ese inai hereva idia kamonai, bona idia ese Pilistia taudia idia tuari henia, bona edia kamepa lalonai idia raka hanaia, unai guri dekena amo ranu idia abia, Davida dekenai idia mailaia. To Davida ia ura lasi unai ranu do ia inua. Ia inua lasi, to ia ese unai ranu ia bubua ore, Lohiabada dekenai ia henia, boubou gauna totona.

¹⁹Bona Davida ia hereva, ia gwau, “Lohiabada e, lau ese inai ranu lau inua diba lasi. Bema lau inua, unai be unai tau goadadia edia rarana do lau inua bamona, badina be unai ranu abia totona, edia mauri idia negea bamona.” Vadaeni Davida ese unai ranu ia inua lasi momokani. Inai kara be goada herea taudia toiosi ese idia karaia.

²⁰Abisai Seruia, Ioaba ena tadina, ese unai “Tuari Taudia Goadadia 30” ia gunalaia noho. Ia ese nega ta tau ibounai 300 be ia sibona ena io dekena amo ia alaia mase. Abisai ena sivarai be ia bada, unai “Tuari Taudia Goadadia 30” edia huanai.

²¹Unai “30” edia huanai, Abisai ena sivarai be hereadae, bona ia be edia gunalaia tauna. To ia be unai “Tuari Lohia Toiosi” danu ia hegeregere lasi.

²²Benaia Iehoiada be boga auka tauna ta. Ia be Kabesela hanua dekena amo. Ia ese kara badadia momo ia karaia. Ia ese Moaba taudia edia tuari taudia goadadia rua, tauanina bada taudia, ia alaia mase. Dina ta, sinou ia diho neganai Benaia ese guri lalonai laiona ta ia alaia mase.

²³Benaia ese danu, Aigupito tauna, tauanina bada tauna, bona iena lata be mita rua ia hanaia, ia alaia mase. Unai Aigupito tauna ena imana dekenai be io ia noho, to Benaia ese au ta sibona ia abia, Aigupito tauna dekenai ia lao, io be iena imana dekena amo ia kokia, bona sibona ena io dekenai ia gwadaia mase.

²⁴Inai karadia be Benaia Iehoiada ese ia karaia, bona ia be unai “Tuari Taudia Goadadia 30” edia orea tauna ta.

²⁵Benaia be unai “30” edia huanai tau badana ta, to iena sivarai be unai “Tuari Lohia Toiosi” edia sivarai hegeregerena lasi. Vadaeni Davida ese iena gimaia orea ena biaguna, Benaia ia halaoa.

²⁶Goada herea taudia ma haida tuari orea edia huanai edia ladana be inai: Asahele, Ioaba ena tadina. Elehanana Dodo, Betelehema tauna.

²⁷Samota, Haroda tauna. Helese, Pelono tauna.

²⁸Ira Ikese, Tekoa tauna. Abiesere, Anatoto tauna.

²⁹Sibekai, Husaka tauna. Ilai, Ahohi tauna.

³⁰Maharai, Netopa tauna. Helede Banaha, Netopa tauna.

³¹Itai Ribai, Gibea tauna, Beniamina iduhu tauna. Benaia, Piratono tauna.

³²Hurai, Gasa Sinavai kahana dekena amo. Abiele, Arabaha tauna.

³³Asamavete, Baharumu tauna. Eliaba, Salabona tauna.

³⁴Haseme, Gisono tauna. Ionatana Sage, Harara tauna.

³⁵Ahiama Sakara, Harara tauna. Elipala Uru.

³⁶Hepere, Mekerata tauna. Ahaisa, Pelono tauna.

³⁷Hesero, Karamele tauna. Narai Esebai.

³⁸Ioela, Natana ena tadina. Mibihara Hagiri.

³⁹Seleke, Amono tauna. Naharai, Beroto tauna, (ia be Ioaba Seruia ena kesi huaia tauna).

⁴⁰Ira, Itiri tauna. Gareba, Itiri tauna.

⁴¹Uria, Hiti tauna. Sabada Ahalai.

⁴²Adina Sisa, Rubena iduhu tauna, Rubena taudia edia lohia ta, bona tau ibounai 30 ia danu.

⁴³Hanana Maka. Iosapata, Mitini tauna.

⁴⁴Usaia, Asataroto tauna. Sama bona Ieiele, Hotama tauna Aroere, ena natuna tau ruaosi.

⁴⁵Iediaele Simiri, bona iena tadina Ioha, Tisi taudia.

⁴⁶Eliele, Mahava tauna. Ieribai bona Iosavaia, Elinama ena natuna tau ruaosi. Itima, Moaba tauna.

⁴⁷Eliele, Obeda, bona Iasiele, Mesoba taudia.