Read Buka Helaga (Hiri Motu) 1993 1 SIVARAI 24 Bible Online

1 SIVARAI 24 - Buka Helaga (Hiri Motu) 1993 bible

1 SIVARAI 24

¹Arona ena bese ena orea be inai: Arona ena natuna be Nadaba, Abihu, Eleasara bona Itamara.

²To edia tamana do mauri neganai, Nadaba bona Abihu idia mase, mai edia natudia tau ta lasi. Unai dainai Eleasara bona Itamara be hahelagaia taudia idia lao.

³Vadaeni Eleasara ena bese tauna ta, ladana Sadoka, bona Itamara ena bese tauna ta, ladana Ahimeleka, ese Davida idia durua, bona Davida ese Arona besena be orea ta ta dekenai ia haridia, bona orea ta ta dekenai edia gaukara ia henia.

⁴Eleasara ena bese lalonai lohia taudia be momo dainai, Eleasara ena orea ibounai be 16. To Itamara ena bese lalonai lohia taudia be momo lasi dainai, Itamara ena orea ibounai be 8 sibona. Orea ta ta be mai edia lohia tauna.

⁵Eleasara besena bona Itamara besena ruaosi be mai edia Helaga Gabuna naria taudia, bona mai edia Dirava ena hereva hadibaia taudia. Unai dainai tau ta ta dekenai dagi henia dalana be laki gadara dekena amo.

⁶Eleasara bese taudia bona Itamara bese taudia ese laki nadi idia gadaralaia hedava, bona laki ese ia gwauraia hegeregerena, unai lohia taudia edia ladadia be Semaia Netanele, Levi tauna ta ese buka dekenai ia torea. Inai kara ibounai idia itaia noho taudia be king, king ena opesa taudia, hahelagaia taudia Sadoka bona Ahimeleka Abiatara, bona hahelagaia taudia bona Levi taudia edia iduhu lohia taudia danu.

⁷Unai orea 24 edia lohia taudia, laki ese ia abia hidi tauna ginigunana ela bona ia abia hidi tauna dokona, edia dagi do idia abia totona, be inai bamona: 1. — Iehoiaribi — 2. — Iedaia 3. — Harimi — 4. — Seorimi 5. — Malekaia — 6. — Miamini 7. — Hakoso — 8. — Abaisa 9. — Iesua — 10. — Sekanaia 11. — Eliasibi — 12. — Iakimi 13. — Hupa — 14. — Iesebeaba 15. — Biliga — 16. — Imere 17. — Hesiri — 18. — Hapisese 19. — Petahaia — 20. — Iehesekele 21. — Iakini — 22. — Gamulu 23. — Delaia — 24. — Masaia.

¹⁹Inai lohia taudia ta ta edia gaukara ena maka be unai bamona, bona Dubu Helaga idia raka vareai neganai, Lohiabada, Israela ena Dirava ese edia sene tauna Arona ia oda henia hegeregerena gaukara idia karaia.

²⁰Levi besena orena edia lohia taudia be inai: Amarama ena natuna tau dekena amo: Subaele. Subaele ena natuna tau dekena amo: Iehedeia.

²¹Rehabaia ena natuna tau dekena amo: Isihaia.

²²Isihara ena natuna tau dekena amo: Selemoto. Selemoto ena natuna tau dekena amo: Iahata.

²³Heberona ena natuna tau be inai: Ieraia, lohia tauna, iharuana be Amaraia, ihatoina be Iahasiele, bona namba 4 be Iekameama.

²⁴Usiele ena natuna tau: Mika. Mika ena natuna tau: Samiri.

²⁵Mika ena tadina be Isihaia, unai dainai Isihaia ena natuna tau dekena amo: Sekaraia.

²⁶Merari ena natuna tau be Mali bona Musi, ma Iasaia danu. Iasaia ena natuna tau be Beno.

²⁷Merari ena natuna tau, Iasaia dekena amo: Beno, Sohama, Sakuru, bona Ibiri.

²⁸Mali dekena amo: Eleasara, bona ia be natuna tau ta lasi.

²⁹Kisa ena natuna tau dekena amo: Ierahamele.

³⁰Musi ena natuna tau be Mali, Edere, Ierimoto. Unai be Levi bese taudia, edia iduhu ta ta dekenai.

³¹Edia dagi do idia davaria totona, inai Levi taudia ese edia varavara Arona bese taudia edia kara hegeregerena idia karaia, laki gadara dekena amo. Idia ese unai laki idia karaia neganai king Davida, Sadoka, Ahimeleka, hahelagaia taudia, bona Levi taudia edia bese lohia taudia ese idia itaia noho. Bese ta ena vara guna tauna bona unai bese ena vara gabeai tauna, be maka tamona dekenai inai dagi abia hidi gaukara idia karaia.