Read Buka Helaga (Hiri Motu) 1993 2 SIVARAI 11 Bible Online

2 SIVARAI 11 - Buka Helaga (Hiri Motu) 1993 bible

2 SIVARAI 11

¹Rehoboama be Ierusalema dekenai ia ginidae neganai, ia ese Iuda iduhu bona Beniamina iduhu taudia ibounai ia haboua, tuari taudia ibounai 180,000. Ia ura tuari dekena amo Israela iduhu taudia do ia halusia, bona do ia gunalaidia lou.

²To Dirava ese peroveta tauna ladana Semaia dekenai ia hereva, ia gwau,

³“Rehoboama, Solomona ena natuna do oi hamaoroa, Iuda taudia ibounai bona Beniamina taudia ibounai danu do oi hamaoroa, oi gwau,

⁴‘Lohiabada be inai bamona ia gwau: Do umui lao lasi tuari totona, umui emui varavara, Israela taudia do umui tuari henia lasi. Umui ta ta emui ruma dekenai do umui giroa lao, badina be idia vara gaudia be lauegu ura dekena amo.’ ” Vadaeni idia ese Lohiabada ena hereva idia kamonai henia, bona Ieroboama tuari henia totona idia lao lasi.

⁵Rehoboama be Ierusalema dekenai ia noho. Ia ese tuari koua totona hanua haida Iuda dekenai ia hagoadaia.

⁶Hanua be inai: Betelehema, Etama, Tekoa,

⁷Betesuru, Soko, Adulama,

⁸Gata, Maresa, Sipi,

⁹Adoraimi, Lakisi, Aseko,

¹⁰Sora, Aialono, Heberona. Idia ibounai be hanua mai edia magudia, Iuda dekenai, bona Beniamina dekenai.

¹¹Edia gabu aukadia ia hagoadaia, bona biagudia ia abia hidi, inai gabu ta ta ibounai dekenai ia atodia. Ma inai gabudia ibounai dekenai aniani bona olive dehoro bona uaina ia haboua.

¹²Hanua ibounai lalonai kesi bona io ia atodia, bona idia ibounai ia hagoadaia momokani. Unai dala dekenai Rehoboama ese Iuda bona Beniamina ia dogoatao, iena basileia.

¹³Hahelagaia taudia bona Levi taudia be edia noho gabudia ibounai Israela dekena amo idia mai, Rehoboama dekenai idia haboua.

¹⁴Levi taudia ese edia rei gabudia bona edia tano idia rakatania, Iuda bona Ierusalema dekenai idia lao, badina be Ieroboama bona iena bese taudia ese Lohiabada ena helaga gaukara dekena amo idia hadokodia vadaeni.

¹⁵Bona Ieroboama ese sibona ena hahelagaia taudia ia abia hidi, ataiai idia noho tomadiho gabudia dekenai do idia gaukara totona. Inai hahelagaia taudia ese danu lauma dikadia bona kaivakuku, boromakau tau edia laulau gaudia, idia tomadiho henia.

¹⁶Vadaeni Israela iduhu ibounai dekena amo, idia ura Lohiabada, Israela ena Dirava do idia tomadiho henia momokani taudia be Levi taudia edia murinai idia raka, Ierusalema dekenai idia lao. Unai bamona idia karaia, edia sene taudia edia Dirava, Lohiabada dekenai bouboudia do idia henia totona.

¹⁷Inai kara ese Iuda basileia ia hagoadaia, bona lagani toi lalonai unai Israela taudia ese Rehoboama, Solomona ena natuna idia durua noho. Badina be unai lagani toi lalonai Rehoboama ese Davida bona Solomona edia kara ia badinaia.

¹⁸Rehoboama ese Mahalata ia adavaia. Unai hahine be Ierimoto, Davida ena natuna bona Abihaili edia natuna. Abihaili be Eliaba Iese ena natuna hahine.

¹⁹Unai hahine Mahalata ese Rehoboama dekenai natuna tau toi ia havaraia, Ieusu, Semaraia bona Sahama.

²⁰Gabeai Rehoboama ese Maka, Abesaloma ena tubuna hahine ia adavaia, bona Maka ese Rehoboama dekenai natuna tau 4 ia havaraia, Abaisa, Atai, Sisa, bona Selomiti.

²¹Rehoboama ese Abesaloma ena tubuna hahine Maka ia lalokau henia bada, iena adavana oredia bona iena adavana maragidia, hesiai hahine, ia lalokau henidia maragi. Inai Rehoboama ena adavana korikoridia be ibounai 18, bona iena adavana maragidia be ibounai 60. Iena natuna tau be 28, bona iena natuna hahine be 60.

²²Rehoboama ese Maka ena natuna tau Abaisa ia abia hidi, Abaisa ese iena tadikakana ibounai edia lohia do ia lao totona. Bona Rehoboama ese danu Abaisa ia abia hidi, iena gabu dekenai king dagi do ia abia totona.

²³Rehoboama ese mai aonega danu iena natuna tau ta ta dekenai gaukara badadia ia henia. Iuda bona Beniamina edia hanua mai magu aukadia dekenai ia siaidia, idia ese unai hanua do idia biagua totona. Kohu momo ia henidia, bona adavana momo ia henidia.