Read Buka Helaga (Hiri Motu) 1993 2 SIVARAI 17 Bible Online

2 SIVARAI 17 - Buka Helaga (Hiri Motu) 1993 bible

2 SIVARAI 17

¹Asa ena gabu dekenai iena natuna tau Iehosapata ese king dagi ia abia. Iehosapata ese iena goada ia habadaia, Israela do ia tuari henia totona.

²Ia ese tuari taudia ia atodia, Iuda ena hanua mai magudia ibounai lalonai idia noho hegaegae totona. Iuda tano dekenai bona Eparaima tano dekenai, iena tamana Asa ese ia abia hanuadia danu dekenai Iehosapata ese gima taudia edia orea ia atoa.

³Lohiabada be Iehosapata dekenai ia noho, badina ia be iena tamana ena dala gunadia dekenai ia raka, bona ia ese Bala dirava ia tahua lasi.

⁴Iehosapata ese iena tamana ena Dirava ia tahua, bona Dirava ena oda hereva ia kamonai henia. Ia ese Israela king taudia edia kara ia karaia lasi.

⁵Lohiabada ese Iehosapata ia durua dainai, iena basileia Iuda be ia ese ia biagua mai goada danu, bona iena taunimanima ibounai ese harihari gaudia ia dekenai idia mailaia. Unai dainai ia be mai ena kohu momo, bona taunimanima ese ia idia matauraia bada.

⁶Iehosapata ese mai ena kudouna ibounai danu Lohiabada ena dala ia badinaia, bona ia ese ataiai idia noho tomadiho gabudia, bona hahine dirava Asera ena kaivakuku ibounai ia kokia Iuda dekena amo.

⁷Ena lohia lagani namba 3 lalonai Iehosapata ese iena lohia taudia haida ia siaia lao, Iuda hanua dekenai taunimanima do idia hadibaia totona. Inai lohia taudia edia ladadia be inai: Benehaili, Obadaia, Sekaraia, Netanele, bona Mikaia.

⁸Idia danu be Levi taudia 9 bona hahelagaia taudia rua. Levi taudia be inai: Semaia, Netanaia, Sebadaia, Asahele, Semiramoto, Iehonatana, Adonaisa, Tobaisa, bona Tobadonaisa. Hahelagaia taudia be inai: Elisama bona Iehorama.

⁹Inai taudia ese Lohiabada ena Taravatu Buka idia abia lao, bona Iuda ena hanua ibounai lalonai taunimanima dekenai inai taravatu ena anina idia hadibaia.

¹⁰Iuda idia hagegea basileia ibounai ese Lohiabada dekenai idia gari bada herea, vadaeni idia ta ese Iehosapata dekenai idia tuari henia lasi.

¹¹Pilistia taudia haida ese harihari gaudia bona siliva momo be Iehosapata dekenai idia mailaia. Arabia taudia ese danu mamoe tau 7700 bona nanigosi 7700 Iehosapata dekenai idia mailaia.

¹²Vadaeni Iehosapata ena siahu ia bada lao. Ia ese Iuda tano dekenai kohoro bona kohu haboua hanuadia ia haginia.

¹³Iuda hanua edia lalonai Iehosapata ena kohu be momo herea, bona Ierusalema dekenai tuari diba momo taudia ia atodia hegaegae.

¹⁴Inai tuari taudia, edia iduhu ta ta dekena amo be inai: Iuda dekena amo: Tuari biaguna badana, Adina. Iena tuari taudia be 300,000.

¹⁵Tuari biaguna iharuana, Iehohanana. Iena tuari taudia be 280,000.

¹⁶Tuari biaguna ihatoina, Amasaia Sikiri. Iena tuari taudia be 200,000. Amasaia ia ura bada Lohiabada ena hesiai gaukara do ia karaia.

¹⁷Beniamina dekena amo: Eliada, goada herea tauna ta. Iena tuari taudia be 200,000, mai edia peva bona edia kesi danu.

¹⁸Ia murinai be Iehosabada. Iena tuari taudia be 180,000, mai edia tuari gaudia danu.

¹⁹Inai be king Iehosapata ena hesiai taudia. Ma haida danu be unai hanua mai edia magu aukadia dekenai idia noho, Iuda tano ena kahana ibounai edia lalonai.