Read Buka Helaga (Hiri Motu) 1993 2 SIVARAI 28 Bible Online

2 SIVARAI 28 - Buka Helaga (Hiri Motu) 1993 bible

2 SIVARAI 28

¹Ahasa ese king dagi ia hamatamaia neganai iena mauri lagani be 20, bona ia be lagani 16 lalonai Ierusalema dekenai ia king. Ia be Lohiabada ena vairanai ia kara maoromaoro lasi, iena sene tauna Davida ena kara hegeregerena ia karaia lasi.

²To Israela ena king edia kara bamona ia karaia. Ia ese ia oda, vadaeni idia ese kaivakuku gaudia, havevea auri dekena amo idia karaia, idia be Bala dirava ena.

³Ahasa ese danu muramura mai bonana namo Hinoma Koura dekenai ia gabua, bona ia ese iena natuna tau be gabua bouboudia totona ia aladia, bona ia gabudia. Inai kara be Lohiabada ese Israela taudia edia vairanai ia lulua lao bese taudia edia kara hegeregerena.

⁴Ahasa ese danu boubou karadia, bona muramura mai bonana ia gabua, ataiai idia noho gabudia dekenai, bona au badadia namodia ibounai edia henunai danu.

⁵Unai dainai Lohiabada, iena Dirava, ese Suria ena king ena siahu henunai Ahasa ia atoa. Suria king ese Ahasa ia halusia, bona Iuda taudia momo herea ia abia mauri, Damaseko dekenai ia abidia lao. Lohiabada ese danu Israela ena king Peka Remalaia ia koua lasi dainai, ia danu ese Ahasa ia halusia, bona Iuda taudia momo herea idia mase.

⁶Dina tamona lalonai Peka Remalaia ese Iuda tuari taudia goadadia 120,000 ia alaia mase. Inai hisihisi idia vara, badina be Iuda taudia ese Lohiabada, edia sene taudia edia Dirava, idia rakatania vadaeni.

⁷Ma Sikiri, goada herea tuari tauna Eparaima dekena amo, ese Maseaia, king Ahasa ena natuna tau, bona Asarikama, king ena ruma biaguna, bona Elikana, king ena sisiba henia tauna badana, ia aladia mase.

⁸Israela tuari taudia ese danu edia varavara Iuda taudia dekena amo hahine, memero, bona kekeni ibounai 200,000 idia abia mauri, bona Samaria dekenai idia abidia lao. Kohu momo danu unuseni idia abia lao.

⁹To Lohiabada ena peroveta tauna ta, ena ladana be Odede be unai gabu, Samaria dekenai ia noho. Vadaeni ia raka lao, Israela tuari taudia, Samaria dekenai idia giroa mai taudia danu do ia hedavari totona. Samaria kahirakahira idia raka vareai neganai, Odede ese idia ia hamaoroa, ia gwau, “Kamonai, Dirava ese Iuda taudia ia badu henia dainai, ia ese emui siahu henunai ia atodia, to umui ese idia momo herea umui alaia mase, bogahisihisi lasi. Inai emui badu be guba dekenai ia daekau lao.

¹⁰Bona hari umui laloa be Iuda bona Ierusalema taudia, tau bona hahine, be do umui guia, bona emui hesiai taudia do umui halaoa, a? To umui danu ese Lohiabada, emui Dirava dekenai umui kara dika lasi, a?

¹¹Harihari lau dekenai do umui kamonai, emui varavara Iuda taudia do umui siaia lou, badina be Lohiabada ena badu mai siahu bada danu be umui emui latanai ia noho.”

¹²Lohia taudia haida danu Eparaima iduhu dekena amo, Asaraia Iohanana, Berekaia Mesilemoto, Iehisikaia Salumu bona Amasa Hadalai, ese tuari dekena amo idia mai taudia edia dala koua totona idia gini.

¹³Idia hamaorodia, idia gwau, “Abia mauri taudia do umui mailaia lasi iniseni! Ita ese kara dika Lohiabada dekenai ita karaia vadaeni, bona Lohiabada ena vairanai ita kerere vadaeni. To unai iseda varavara dekenai unai kara do umui karaia, bona iseda kerere do umui habadaia, a?”

¹⁴Unai dainai Israela tuari taudia ese guia taudia idia ruhaia, bona idia abia kohudia be lohia taudia bona hebou taudia ibounai edia vairanai idia rakatania.

¹⁵Vadaeni unai tau 4, edia ladana gwauraia vadaeni taudia be idia toreisi, bona idia ese unai abia mauri taudia idia naria. Edena abia mauri taudia be mai dabua lasi, be unai hari taudia ese idia abia kohu dekena amo dabua idia abia, idia henidia. Tamaka danu idia henidia, bona aniani bona ranu danu. Bona mai edia bero taudia be muramura dekena amo edia bero idia dahua. Bona edia manoka taudia ibounai be doniki edia latanai idia atodia, idia helai, vadaeni unai abia mauri taudia be edia varavara taudia dekenai idia hakaudia lou, Ieriko, pama audia edia hanua, dekenai. Unai neganai unai Israela taudia be Samaria dekenai idia giroa lou.

¹⁶Unai neganai king Ahasa ese hereva be Asuria king dekenai ia siaia lao, unai king ese do ia durua totona.

¹⁷Badina be Edoma taudia ese Iuda idia tuari henia lou, bona idia ese Iuda taudia idia abia mauri, idia abidia lao, mai guia danu.

¹⁸Ma Pilistia taudia ese Sepela kahana bona Iuda ena Negebe kahana hanuadia idia tuari henia vadaeni, Bete Semese, bona Aialono, bona Gederoto hanuadia idia abia vadaeni. Idia ese danu Soko, bona Timuna, bona Gimiso, mai edia hanua maragidia danu idia abia vadaeni, bona unai hanua lalonai idia noho.

¹⁹Lohiabada ese Iuda ia hamanokaia vadaeni, badina be Ahasa, Iuda ena king ese kara dika ia havaraia Iuda dekenai, bona ia ese Lohiabada ena kara ia negea momokani dainai.

²⁰Vadaeni Asuria ena king, Tigilata Pilesere, ese Ahasa ia durua lasi, to Ahasa tuari henia totona ia mai.

²¹Unai dainai Ahasa ese Dubu Helaga, king ena ruma, bona lohia taudia edia rumadia dekenai ia noho golo ia abia, Asuria ena king dekenai ia henia, to unai kara ese Ahasa ia durua lasi.

²²Ahasa ena hisihisi be idia bada lao neganai, iena kara dika Lohiabada dekenai idia bada lao danu.

²³Badina ia ese Damaseko dirava koikoi dekenai boubou gaudia ia henia. Unai be Suria taudia, idia ese Ahasa idia halusia vadaeni taudia edia dirava. Ahasa ia gwau, “Suria diravadia ese Suria taudia idia durua, vadaeni bema inai dirava dekenai boubou lau henia neganai, idia ese lau do idia durua danu.” Inai bamona kara ese Ahasa sibona, bona iena basileia ibounai danu ia hadikaia momokani.

²⁴Vadaeni Ahasa ese Dubu Helaga ena kohu ibounai ia haboua, bona ia utua maragimaragi, bona Lohiabada ena Dubu Helaga ena iduara ibounai ia koua momokani. Ia ese danu Ierusalema ena kahana ibounai dekenai boubou patadia ia haginia.

²⁵Bona Iuda ena hanua ibounai dekenai ataiai idia noho tomadiho gabudia ia karaia, unuseni muramura mai bonana do idia gabua, dirava idaudia do idia hanamoa totona. Inai kara dekena amo ia ese Lohiabada, iena sene taudia edia Dirava, ia habadua.

²⁶Ahasa ena kara orena, bona iena dala ibounai, edia matamaia ela bona dokona, be Iuda bona Israela King Edia Sivarai Buka lalonai idia torea vadaeni.

²⁷Vadaeni Ahasa be iena tubuna bona tamana danu ia laga-ani, ia mase, bona Ierusalema dekenai idia guria, to king edia guria gabuna lalonai lasi. Iena natuna tau, Hesekaia, ese Ahasa ena gabuna dekenai king dagi ia abia.