Read Buka Helaga (Hiri Motu) 1993 ESERA 1 Bible Online

ESERA 1 - Buka Helaga (Hiri Motu) 1993 bible

ESERA 1

¹Sairasi, Parasa ena king ena gunalaia lagani ginigunana lalonai, Lohiabada ese peroveta tauna Ieremia ena peroveta hereva ta ia hamomokania. Inai hereva ena anina do ia vara totona Lohiabada ese Sairasi, Parasa ena king ena lalona ia veria, vadaeni Sairasi ese oda ta ia gwauraia iena basileia ibounai lalonai, bona ia torea danu, oda be inai bamona:

²“Inai be Sairasi, Parasa ena king ena oda: Lohiabada, guba ena Dirava ese tanobada basileia ibounai lau dekenai ia henia, lau biagua. Bona Lohiabada ese lau ia oda henia, iena Dubu ta Ierusalema, Iuda tano dekenai do lau haginia.

³“Lau ura Dirava ese umui, iena bese taudia ta ta ibounai dekenai do ia noho. Umui be Ierusalema, Iuda tano dekenai do umui lao, unuseni Lohiabada, Israela ena Dirava, ena Dubu Helaga do umui haginia lou. Dirava be Ierusalema dekenai ia noho.

⁴Bona Ierusalema dekenai do idia lao lasi Iuda taudia ese edia varavara do idia durua, Ierusalema do idia lao totona. Do idia lao lasi taudia ese Ierusalema idia lao taudia dekenai inai gaudia do idia henia: Siliva, golo, kohu idauidau, kohu huaia totona hosi bona doniki, bona ubua gaudia, harihari gaudia, Dirava ena Dubu Helaga dekenai henia totona.”

⁵Vadaeni Iuda bona Beniamina iduhu edia gunalaia taudia idia toreisi, bona hahelagaia taudia, bona Levi taudia, bona Dirava ese laloa goada ia henidia taudia ibounai idia toreisi, Lohiabada ena Dubu Ierusalema dekenai do idia haginia lou totona.

⁶Edia badibadinai taudia ibounai ese idia durua. Kohu momo idia henia, hegeregere siliva gaudia, golo, kohu bona aniani, hosi bona doniki, kohu namodia idauidau, bona Dubu Helaga dekenai henia totona ubua gaudia, harihari gaudia.

⁷King Sairasi ese danu Lohiabada ena Dubu Helaga ena kohu, Nebukanesa ese Ierusalema dekena amo ia abia lao, bona iena dirava ena dubu dekenai ia atoa gaudia, be ia henidia lou.

⁸Sairasi ese inai kohu be Miteredata, moni naria tauna dekenai ia henia. Vadaeni unai tau ese unai kohu ibounai ia haboudia, ia duahia namonamo, bona Iuda ena lohia tauna Sesebasara dekenai ia henia.

⁹Kohudia be inai: golo uro, bona mereki — 30 siliva uro, bona mereki — 1000 siliva sosipani — 29 golo uro maragidia — 30 siliva uro maragidia — 410 kohu namodia idauidau — 1000.

¹¹Inai kohu ibounai, golo bona siliva, ma gau haida danu edia momo be 5400. Sesebasara ese inai gaudia ibounai ia mailaia, ia bona Iuda taudia be Babulonia dekena amo Ierusalema dekenai idia lao neganai.