Read Buka Helaga (Hiri Motu) 1993 ESERA 7 Bible Online

ESERA 7 - Buka Helaga (Hiri Motu) 1993 bible

ESERA 7

¹Lagani haida murinai, Aratasaseta be Parasa ena king neganai, tau ta ladana Esera ia noho. Esera ena sene tauna be hahelagaia tauna, Arona. Esera be Seraia ena natuna. Seraia be Asaraia ena natuna, Asaraia be Hilekaia ena natuna.

²Hilekaia be Salumu ena natuna, Salumu be Sadoka ena natuna. Sadoka be Ahitubu ena natuna.

³Ahitubu be Amaraia ena natuna. Amaraia be Asaraia ena natuna. Asaraia be Meraioto ena natuna.

⁴Meraioto be Serahaia ena natuna, Serahaia be Usisi ena natuna, Usisi be Buki ena natuna.

⁵Buki be Abisua ena natuna. Abisua be Pineha ena natuna. Pineha be Eleasara ena natuna, Eleasara be Arona, Hahelagaia Tauna Badana ena natuna.

⁶Inai Esera be Babulonia dekena amo Ierusalema dekenai ia daekau mai. Ia be hadibaia tauna ta, bona ia be Mose dekenai Lohiabada, Israela ena Dirava ese ia henia Taravatu ia diba momokani. King Aratasaseta ese Esera ena ura ibounai ia karaia, badina be Lohiabada, iena Dirava be Esera dekenai ia noho.

⁷Vadaeni king Aratasaseta ena king lagani namba 7 lalonai, Esera bona Israela taudia haida be Babulonia dekena amo Ierusalema dekenai idia mai. Esera danu idia mai taudia be hahelagaia taudia, bona Levi taudia, bona Dubu ena ane abia taudia, Dubu iduara naria taudia, bona gaukara taudia haida.

⁸Esera ese Babulonia ia rakatania dinana be hua ginigunana, bona dina ginigunana. Dirava ese ia durua noho dainai,

⁹Esera be hua namba 5 ena dina ginigunana dekenai Ierusalema dekenai ia ginidae.

¹⁰Esera ese mai ena lalona ibounai, Lohiabada ena Taravatu ia tahua, bona ena kara ia karaia danu. Ia ese danu, unai taravatu bona oda herevadia ibounai be Israela taudia dekenai ia hadibaia.

¹¹King Aratasaseta ese revareva ta Esera dekenai ia henia. Esera be Lohiabada ese Israela dekenai ia henia taravatu bona oda ibounai ia diba namonamo. Revareva be inai:

¹²“Lau inai, Aratasaseta, king taudia edia king ese inai revareva, Esera, hahelagaia tauna, Guba ena Dirava ena Taravatu hadibaia tauna dekenai lau torea inai:

¹³“Lau oda, lauegu basileia lalonai noho Israela taudia, o edia hahelagaia taudia, o Levi taudia, idia ura lao taudia ibounai be Ierusalema dekenai do idia lao diba.

¹⁴Lau, bona lauegu kaunsolo taudia 7 ese umui lau siaia inai, Ierusalema do umui itaia, bona do umui henanadai, unuseni umui emui Dirava ena Taravatu idia kamonai henia namonamo o lasi.

¹⁵Umui ese harihari gaudia, golo bona siliva, lau bona lauegu kaunsolo taudia ese Israela ena Dirava dekenai ai henia gaudia do umui abia lao. Inai Dirava ena Dubu Helaga be Ierusalema dekenai ia noho.

¹⁶Umui ese danu Babulonia dekenai umui gogoa siliva bona golo do umui abia lao Ierusalema dekenai. Unai be Babulonia dekenai noho Israela taudia bona edia hahelagaia taudia ese idia henia, edia Dirava edia Dubu Helaga, Ierusalema dekenai totona.

¹⁷“Inai moni do umui gaukaralaia namonamo. Ia dekena amo boromakau tau, bona mamoe tau, bona mamoe natuna, bona paraoa boubouna, bona uaina boubouna, do umui hoia. Bona Ierusalema dekenai Dubu Helaga ena boubou patana dekenai, Dirava dekenai inai gaudia ibounai do umui henia.

¹⁸“Bona siliva bona golo, umui do gaukaralaia lasi gaudia, be oi bona oiemu tadikaka taudia do umui gaukaralaia diba, emui Dirava ena ura hegeregere.

¹⁹Ai ese umui dekenai ai henia vadaeni gaudia, emui Dubu Helaga lalonai do umui gaukaralaia totona gaudia, be Ierusalema ena Dirava dekenai do umui henia.

²⁰Bona dahaka gaudia, dahaka gaudia umui dekenai idia noho lasi, oiemu Dirava ena Dubu ena, do umui abia diba, vadaeni king ese iena moni dekena amo edia davana do ia karaia.

²¹“Inai danu, lau king Aratasaseta ese moni naria taudia ibounai Euperate Sinavai ena dina diho kahanai lau oda henia inai: Gau ibounai hahelagaia tauna Esera, Guba ena Dirava ena Taravatu hadibaia tauna ese umui dekenai ia gwauraia gaudia, be do umui henia haraga.

²²Umui henia diba ela bona siliva ena metau 3400 kilogaram, uiti ena metau 1000 kilogaram, uaina ena metau 2000 lita, bona olive dehoro ena metau 2000 lita, bona damena momo, iena ura hegeregere do umui henia.

²³Dahaka bona dahaka Guba ena Dirava ese ia ura iena Dubu Helaga lalonai do idia noho, gaudia ibounai do umui henia momokani. Inai bamona do umui karaia namonamo, emui Dirava ena badu be lau, o lauegu natuna dekenai do ia ginidae garina.

²⁴Umui ese takisi moni hahelagaia taudia, Levi taudia, Dubu ena miusiki taudia, Dubu gimaia taudia, Dubu Helaga ena gaukara karaia taudia, ibounai dekena amo do umui gogoa lasi.

²⁵“Oi danu, Esera e, oiemu Dirava ena aonega, oi dekenai ia noho gauna dekena amo, kota biagudia badadia bona maragidia do oi abia hidi, idia ese Euperate Sinavai ena dina diho kahanai taudia, oiemu Dirava ena Taravatu idia diba taudia ibounai, edia kota do idia naria. Bona Dirava ena Taravatu idia diba lasi taudia, be oi, Esera ese idia dekenai do oi hadibaia.

²⁶Bema tau ta ese oiemu Dirava ena Taravatu, o king ena taravatu ia kamonai lasi neganai, iena kerere davana do oi henia haraga. Oi ese iena kerere davana, mase oi gwauraia diba, o iena tano dekena amo do oi siaia lao, idau tanobada ta dekenai do ia noho, o iena kohu do oi kokia lao, o dibura ruma dekenai do oi atoa, ia noho.”

²⁷Esera ia gwau, “Lohiabada, iseda sene taudia edia Dirava do ita hanamoa. Ia ese king Aratasaseta ena lalona ia veria, vadaeni king ia ura Lohiabada ena Dubu Helaga do ia hanamoa.

²⁸Dirava ena durua dainai, king bona iena kaunsolo taudia, bona iena tau badadia ese lau dekenai idia laloa namo. Lohiabada, lauegu Dirava ese lau ia hagoadaia, bona unai dainai, Israela ena tau badadia momo lau dekenai lau haboua vadaeni, Ierusalema dekenai do ai giroa mai totona.”