Read Buka Helaga (Hiri Motu) 1993 NEHEMIA 1 Bible Online

NEHEMIA 1 - Buka Helaga (Hiri Motu) 1993 bible

NEHEMIA 1

¹Nehemia, Hakalaia ena natuna ese ia karaia karadia ena sivarai be inai: Aratasaseta ena king lagani namba 20, hua ladana Kisileve lalonai lau Nehemia, be Susa hanua badana dekenai lau noho.

²Vadaeni lauegu varavara tauna ta, ena ladana Hanani be tau haida danu Iuda dekena amo idia mai. Lau ese idia lau nanadaia, Iuda taudia, Babulonia dekena amo Iuda dekenai idia giroa lou, edia noho be edena bamona.

³Vadaeni idia ese lau idia hamaoroa, idia gwau, “Babulonia ena abia mauri dekena amo Iuda dekenai idia lao lou, bona Iuda tano idia do noho taudia be idia hekwarahi bada noho, bona idau bese taudia edia vairanai idia hemarai noho. Ierusalema ena magu be ia dika noho, bona magu ena iduara bona ikoukou be lahi ese ia araia ore vadaeni.”

⁴Unai bamona lau kamonai neganai, lau helai diho, bona lau tai. Dina haida lau taitai, bona aniani lau ania lasi, bona Guba ena Dirava dekenai lau guriguri.

⁵Inai bamona lau guriguri, lau gwau, “Lohiabada e, Guba ena Dirava, Dirava badana, bona mai garina. Oi ese oi dekenai idia lalokau henia, bona oiemu oda idia karaia taudia dekenai oi bogahisihisi noho.

⁶Mani emu kara lau do oi itaia, bona lauegu guriguri do oi kamonai, lau be dina bona hanuaboi, oiemu hesiai taudia, Israela taudia totona oi dekenai lau noinoi. Lau ese lau gwauraia hedinarai, ai Israela taudia ese ai kara dika vadaeni. Lauegu sene taudia bona lau, ai kara dika vadaeni.

⁷Ai ese oiemu vairana dekenai ai be kerere taudia, oiemu taravatu bona oda ai utua vadaeni. Bona oi ese oiemu hesiai tauna Mose dekenai oi henia Taravatu be ai ese ai badinaia lasi.

⁸“Oiemu hesiai tauna Mose dekenai oi henia oda mani do oi laloa, oi gwau, ‘Bema umui Israela taudia ese lau dekenai umui abidadama lasi, lau ese umui do lau hapararaia, emui bese do ia makohia maragimaragi, bese idauidau edia huanai.

⁹To bema lau dekenai umui giroa, bona lauegu oda do umui kamonai henia neganai, lau ese umui do lau mailaia lou, lau abia hidi, lau do idia tomadiho henia gabuna dekenai umui do lau hanohoa lou. Umui be tanobada ena daudau herea gabudia do umui noho, to lau ese Iuda dekenai umui do lau mailaia lou.’

¹⁰“Lohiabada e, inai taudia be oiemu hesiai taudia bona oiemu bese. Oi ese oiemu siahu badana bona oiemu goada dekena amo idia oi hamauria.

¹¹Lohiabada e, mani emu kara lauegu guriguri do oi kamonai, oiemu hesiai taudia, oi dekenai idia mataurai henia taudia, edia guriguri danu do oi kamonai. Hari dina dekenai lau dekenai kwalimu do oi henia. King Aratasaseta ena lalona do oi veria, vadaeni ia ese lau dekenai bogahisihisi do ia henia.” Madi, unai dinadia neganai, lau be king Aratasaseta ena uaina kapusi naria tauna.