Read Buka Helaga (Hiri Motu) 1993 NEHEMIA 6 Bible Online

NEHEMIA 6 - Buka Helaga (Hiri Motu) 1993 bible

NEHEMIA 6

¹Sanubalata, bona Tobaia, bona Geseme, Arabia tauna, bona ai idia hadikaia gwauraia taudia idia kamonai ai ese magu ai haorea, bona magu ena matu ibounai ai koua vadaeni. (To gau tamona unai neganai iduara lau haginidia haorea lasi.)

²Vadaeni Sanubalata bona Geseme ese hereva be lau dekenai idia siaia mai, idia gwau, “Oi mai, Ono ena tano palaka ena hanua ta dekenai do ita hebou.” To idia ura lau do idia hadikaia.

³Unai neganai lau ese hereva idia dekenai lau siaia, lau gwau, “Lau ese gaukara badana ta lau karaia noho, bona lau rakatania diba lasi. Inai gaukara do lau hadokoa, bona oi dekenai do lau lao, a?”

⁴Nega 4 unai hereva lau dekenai idia siaia, bona nega 4 lau ese unai bamona idia dekenai lau haere.

⁵Vadaeni Sanubalata ese iena hesiai tauna ta lau dekenai ia siaia, iena imana dekenai be revareva ta, koua lasi gauna.

⁶Revareva ena hereva anina be inai: “Bese idauidau edia huanai idia herevalaia noho, bona Geseme ese danu ia gwauraia noho, oi bona Iuda taudia ese do umui dagedage, bona unai dainai magu umui haginia noho, bona oi ura Iuda edia king dagi do oi abia.

⁷Bona idia gwau danu oi ese peroveta taudia haida danu be Ierusalema dekenai oi haginia vadaeni, idia ese oi do idia gwauraia hedinarai, oi be Iuda ena king totona. Harihari inai hereva be king Aratasaseta ese do ia kamonai. Unai dainai inai kara be oi bona lau do ita herevalaia hebou be namo.”

⁸Vadaeni hereva be ia dekenai lau siaia lao, lau gwau, “Oi gwauraia kara ta ai karaia lasi. Oi sibona ese oi laloa kava noho.”

⁹Idia ibounai idia ura ai idia hagaria momokani, ai ese magu gaukara dekenai do ai manoka bona gaukara do ai hadokoa totona. Unai lau diba dainai lau ese lau gaukara goada momokani.

¹⁰Semaia, Delaia Mehetabele ena natuna ese ia gwau iena ruma ia rakatania diba lasi. Vadaeni iena ruma dekenai lau daekau neganai Semaia ia gwau, “Dirava ena Dubu Helaga lalonai do ita raka vareai, unuseni iduara do ita lokaia, bona Dubu ena lalonai do ita hunia, badina be hanuaboi lalonai oi alaia mase totona tau haida do idia mai.”

¹¹To lau gwau, “Lau hegeregerena tauna ta do ia heau bona hunia, a? Oi laloa tau ta, lau hegeregerena, bema Dubu Helaga ena lalonai ia hunia neganai mauri do ia davaria diba, a? Lau be do lau raka vareai lasi momokani.”

¹²Unai neganai egu lalona ia kehoa, lau diba vadaeni, Dirava ese unai peroveta hereva ia siaia lasi, to unai peroveta tauna ese lau hadikaia totona unai hereva ia gwauraia, Tobaia bona Sanubalata ese moni idia henia dainai.

¹³Idia ese moni dekenai Semaia idia hoia, iena hereva dekenai do lau gari, bona unai kara do lau karaia, vadaeni do lau kerere totona. Bona bema unai kerere lau karaia neganai, egu ladana do idia hadikaia, vadaeni hemarai do lau davaria.

¹⁴Lau guriguri, lau gwau, “Egu Dirava e, Tobaia bona Sanubalata edia kara unai bamona mani do oi laloatao, bona peroveta hahine Noadaia bona peroveta taudia haida danu, lau idia hagaria gwauraia taudia edia kara danu do oi laloatao.”

¹⁵Iuda taudia ese magu haginia lou gaukara be dina 52 lalonai idia haorea, unai be hua ladana Elulu ena dina namba 25 dekenai idia haorea.

¹⁶Ai idia ura hadikaia taudia ibounai ese inai sivarai idia kamonai neganai, bona bese idauidau, ai kahirakahira idia noho tano taudia idia itaia neganai, idia gari bona idia hemarai, badina idia diba aiemai Dirava ena durua dainai inai gaukara ai haorea.

¹⁷Inai danu, unai dinadia lalonai Iuda ena lohia taudia ese revareva momo Tobaia dekenai idia siaia lao, bona Tobaia ese ena revareva be idia dekenai ia haloua.

¹⁸Iuda dekenai noho taudia momo ese Tobaia idia durua noho, badina iena ravana be Sekanaia Ara, bona iena natuna tau Iehohanana ese Mesulama Berekaia ena natuna hahine ia adavaia vadaeni.

¹⁹Ma unai dinadia lalonai danu taunimanima ese Tobaia ena kara namodia ena sivarai be lau dekenai idia hamaoroa, bona egu hereva ibounai be ia dekenai idia hadibaia. Bona unai Tobaia ese revareva momo lau dekenai ia siaia noho, lau do ia hagaria totona.