Read Buka Helaga (Hiri Motu) 1993 ESODO 25 Bible Online

ESODO 25 - Buka Helaga (Hiri Motu) 1993 bible

ESODO 25

¹Lohiabada ese Mose ia hamaoroa, ia gwau,

²“Israela taudia do oi hamaoroa, idia ese edia harihari gaudia lau dekenai do idia henia. Mai edia laloa namo lau dekenai taudia ese edia harihari gaudia do oi abia mai, lauegu.

³Idia dekena amo do oi abia gaudia be inai: Golo bona siliva bona auri laboralabora,

⁴dabua namo herea, bulu bona kakakaka sisina, bona mamoe huina dabua, kakakaka momokani gauna, bona nani ena huina,

⁵mamoe edia kopina, idia hakakakaka gaudia, bona nani edia kopina, bona akasia audia,

⁶lamepa ena oela, mai bonana namona muramura, dehoro helaga totona, bona idia gabua muramura ena pauda danu.

⁷Onuku nadi, bona Hahelagaia Tauna Badana ena dabua herahera totona davana bada nadidia danu do umui abia mai, iena kemena dabua dekenai atoa nadi namodia danu.

⁸“Israela taudia danu do oi hamaoroa, lauegu Palai Dubu Helagana do idia karaia, idia edia huana dekenai do lau noho totona.

⁹Inai Palai Dubu, bona ena lalonai noho gaudia, be lau ese do lau hadibaia bamona do umui karaia.

¹⁰“Maua ta danu do umui karaia, akasia au dekena amo. Iena lata be 110 sentamita, iena lababa be 66 sentamita, bona iena ataiai be 66 sentamita.

¹¹Maua ena lalona bona ena murimuri kahana ibounai be golo namo herea dekena amo do umui koua, bona maua ena hetoana be golo dekena amo do umui hagegea, herahera ena toana bamona.

¹²“Rini ibounai 4 be golo dekena amo do umui karaia, maua do umui huaia totona. Inai rini 4 be maua ena aena maragidia 4 dekenai do umui kwatua auka. Rini rua be maua kahana do umui kwatua, ma rini rua be maua kahana do umui kwatua.

¹³Maua huaia audia rua danu akasia au dekena amo do umui karaia, bona au ruaosi be golo dekenai do umui koua.

¹⁴Inai au ruaosi be nega ibounai rini lalonai do idia noho.

¹⁵Rini dekena amo au do umui kokia lasi, lasi momokani.

¹⁶“Gabeai lau ese Nadi Palaka rua umui dekenai do lau henia, inai nadi edia latanai Taravatu do lau torea. Umui ese inai Nadi Palaka ruaosi be Maua ena lalonai do umui udaia.

¹⁷“Maua ena koua gauna danu be golo namo herea momokani dekena amo do umui karaia. Iena lata be 110 sentamita, bona iena lababa be 66 sentamita. Inai koua gauna be taunimanima edia kara dika gwauatao gabuna.

¹⁸Ma golo, hama dekenai umui botaia gauna dekena amo kerubi aneru rua danu do umui karaia. Inai kerubi rua be Maua ena koua gauna ena duduna duduna dekenai do umui koroa kau.

¹⁹Koua gauna ena duduna ta dekenai be kerubi aneru ta do umui atoa, ma duduna ta dekenai kerubi aneru ma ta do umui atoa. Koua gauna bona kerubi ruaosi be golo tamona dekena amo do umui karaia, do idia gau tamona, parara lasi.

²⁰“Inai kerubi aneru ruaosi, kara dika gwauatao gabuna duduna duduna dekenai idia noho, ese idia hanina dekena amo koua gauna idia hunia bamona, bona inai kerubi ruaosi ese ta ta dekenai edia vairana idia itaia noho.

²¹Unai Nadi Palaka rua be Maua lalonai do umui udaia, bona koua gauna be Maua ena latanai do umui atoa, umui koua.

²²Unuseni, Maua ena koua gauna, kara dika gwauatao gabuna ena ataiai, kerubi aneru edia huanai, lau ese unai gabu dekenai oi danu do ita hedavari, bona oi dekenai lauegu Taravatu do lau hadibaia. Bona oi ese inai Taravatu ibounai Israela taudia dekenai do oi henia.

²³“Pata ta danu do umui karaia, akasia au dekena amo do umui karaia. Iena lata be 88 sentamita, bona iena lababa be 44 sentamita, iena ataiai be 66 sentamita.

²⁴Golo namo momokani dekena amo do umui koua, bona pata ena hetoana be golo dekena amo do umui hagegea, herahera bamona.

²⁵“Pata ena isena do umui habadaia 8 sentamita dekenai, bona inai isena be golo dekena amo do umui koua.

²⁶Pata do umui huaia totona rini ibounai 4 do umui karaia, bona pata ena kona 4, aena gabudia dekenai rini do umui kwatua auka.

²⁷Inai rini be pata ena isena kahirakahira do umui kwatua auka, bona inai rini edia lalonai be pata huaia audia do idia toia vareai.

²⁸Inai pata huaia audia be akasia au dekena amo do umui karaia, bona golo dekena amo do umui koudia.

²⁹“Pata dekenai atoa gaudia danu, mereki, kapusi, disi, bona uro, uaina boubou totona gaudia, be golo namo momokani dekena amo do umui karaia.

³⁰Pata be Taravatu Maua ena vairana dekenai do umui atoa. Bona nega ibounai pata ena latanai, paraoa helagana do umui atoa hegaegae, lauegu vairana dekenai.

³¹“Lamepa dogoatao gauna ta danu golo namo herea dekena amo do umui karaia. Iena badina bona iena du be golo, hama dekenai idia botaia gauna, dekena amo do umui karaia. Iena lamepa udaia kapusi, mai edia herahera toana gaudia, ibounai be golo tamona dekena amo do umui karaia.

³²Iena rigi be ibounai 6, kahana toi, kahana toi.

³³Inai rigi ta ta ibounai be mai edia herahera toi, edia toana be alamono au huahua bamona.

³⁴Lamepa ena du danu be mai ena herahera, herahera 4, edia toana be alamono au huahua bamona danu.

³⁵Rigi rua rua dekenai danu be rau maragidia ta ta do umui koroa, rigi rua, rau ta, rigi rua, rau ta, bona rigi rua, rau ta, rigi edia henuna kahadia dekenai.

³⁶Inai rigi ibounai bona herahera raudia ibounai be lamepa dogoatao gauna danu golo tamona dekena amo do umui koroa karaia.

³⁷“Bona lamepa ibounai 7 do umui karaia, du bona rigi edia duduna ta ta dekenai do umui udaia. Edia diari be vairana kahanai do umui poinia, Dubu ena lalona do idia hadiaria.

³⁸Lamepa hagoevaia gaudia bona momoru udaia mereki ibounai danu be golo namo herea dekena amo do umui karaia.

³⁹Inai lamepa dogoatao gauna, mai ena kohu ibounai totona umui gaukaralaia golo ena metau be ibounai 35 kilogaram.

⁴⁰Do umui itaia namonamo, inai gau ibounai be lauegu palani hegeregerena momokani do umui karaia. Inai egu palani be ororo dekenai lau hedinaraia vadaeni oi dekenai.”