Read Buka Helaga (Hiri Motu) 1993 ESODO 29 Bible Online

ESODO 29 - Buka Helaga (Hiri Motu) 1993 bible

ESODO 29

¹Lohiabada ma ia hereva, ia gwau, “Arona bona iena natuna tau do oi hahelagaia egu hahelagaia taudia edia gaukara totona, bona inai bamona do oi karaia: Boromakau tau ta bona mamoe tau rua, edia tauanina namo herea sibona gaudia, do oi abia.

²Bona uiti ena paraoa namo herea momokani do oi abia. Paraoa dekenai hatubua gauna do oi atoa lasi. Inai paraoa haida dekena amo beredi do oi karaia, bona inai paraoa haida be olive dehoro danu do oi mikisi. Inai dekena amo beredi ma do oi karaia. Bona paraoa haida dekena amo bisikesi haida do oi karaia, bona olive dehoro dekena amo bisikesi do oi dahua.

³Inai beredi bona bisikesi be bosea ta dekenai do oi udaia, bona unai boromakau bona mamoe be boubou totona oi henia neganai, beredi bona bisikesi danu be lau dekenai do oi henia.

⁴“Vadaeni Arona bona iena natuna tau be Palai Dubu ena iduara dekenai do oi hakaua mai. Iduara ena badinai oi ese idia do oi hadigua.

⁵Unai murinai dabua helagadia be Arona dekenai do oi atoa. Sioti, epodi, dabua latana, epodi ena henunai atoa gauna, kemena dabua, bona gaba gauna, ibounai be Arona dekenai do oi atoa.

⁶Kwara gauna danu ia dekenai do oi atoa, bona medolo helagana danu be kwara gauna dekenai do oi kwatua kau. ‘Helaga, Lohiabada ena’ be unai medolo dekenai idia torea vadaeni.

⁷“Vadaeni hahelagaia taudia hahelagaia totona ena dehoro, be Arona ena kwarana dekenai do oi bubua, do ia helaga.

⁸“Arona ena natuna tau danu do oi hakaua mai, bona edia sioti dabua idia dekenai do oi atoa.

⁹Edia gabana dekenai gaba gaudia do oi kwatua, bona kwara gaudia edia kwarana dekenai do oi atoa. Inai bamona be Arona bona iena natuna tau do oi hahelagaia. Idia bona edia tubuna taudia ese lauegu hahelagaia taudia edia gaukara do idia karaia ela bona hanaihanai.

¹⁰“Vadaeni, boromakau tau do oi hakaua lao, Palai Dubu ena vairana dekenai. Arona bona iena natuna tau ese edia imadia be boromakau ena kwarana dekenai do idia atoa.

¹¹Unai neganai Lohiabada ena vairanai, boromakau do oi alaia, Palai Dubu ena iduara badibadinai.

¹²Vadaeni boromakau ena rarana sisina oiemu ima kwakikwakina dekenai do oi abia, bona rara be boubou patana ena doadia dekenai do oi dahua. To rara ena orena be pata ena badina dekenai do oi bubua.

¹³Unai neganai oi ese bogarauna ena digara, asena ena kahana badana, bona nadinadina mai ena digara danu, be boubou patana dekenai do oi gabua, lauegu boubou totona.

¹⁴To boromakau ena vamuna, bona ena kopina, bona ena kukuri be kamepa ena murimurinai do oi gabua. Inai be kara dika kokia totona ena boubou.

¹⁵“Unai murinai mamoe tau ta do oi abia, bona Arona, mai iena natuna tau danu ese edia imana be mamoe ena kwarana dekenai do idia atoa.

¹⁶Vadaeni mamoe do oi alaia, iena rarana do oi abia, bona boubou patana ena kahana 4 dekenai inai rara do oi negea lao.

¹⁷Mamoe do oi utua kahana ta ta. Iena bogarau bona iena imana bona aena do oi huria, ma idia danu be iena vamuna bona kwarana danu do oi haboua.

¹⁸Idia ibounai be boubou patana ena latanai do oi gabua. Inai be Lohiabada dekenai boubou ia gabua gauna. Lau Lohiabada ese inai boubou ia gabua ena bonana namona lau kamonai neganai, be lau moale.

¹⁹“Mamoe tau ma ta do oi abia, bona Arona, mai iena natuna tau danu ese edia imana be mamoe ena kwarana dekenai do idia atoa.

²⁰Vadaeni mamoe do oi alaia, iena rarara sisina do oi abia, bona Arona mai ena natuna tau edia taiana idibana edia rini atoa gabuna dekenai inai rara do oi dahua. Ma edia imana kwakikwaki badana, bona aena kwakikwaki badana danu inai rara dekenai do oi dahua. Rara ena orena be boubou patana ena kahana 4 dekenai do oi negea lao.

²¹Vadaeni boubou patana dekenai ia noho rara sisina bona dehoro helagana haida do oi abia, Arona, mai ena dabua danu, bona iena natuna mai edia dabua danu dekenai inai rara bona dehoro do oi negea lao. Inai bamona oi karaia neganai, Arona, mai ena natuna tau, bona edia dabua danu be lau totona do idia helaga momokani.

²²“Inai mamoe tau ena digarana do oi utua bona abia, badina inai be hahelagaia taudia do oi hahelagaia ena boubou. Iuna ena digara, bogarau ena digara, asena ena kahana badana, bona nadinadi mai ena digara danu, bona ena idiba mamuna ena vamu danu.

²³Unai bosea mai ena beredi idauidau, mai hatubua gaudia lasi, lau Lohiabada dekenai idia henia gaudia dekena amo beredi ta ta do oi abia. Mai olive dehoro danu idia gabua gauna ta, bona mai olive dehoro lasi idia gabua gauna ta, bona bisikesi ta.

²⁴Vadaeni inai vamu bona paraoa gaudia be Arona bona iena natuna tau dekenai do oi henia, edia imadia dekenai do idia dogoatao, lau Lohiabada egu vairanai inai boubou gaudia do idia davea.

²⁵“Unai murinai, idia dekena amo inai aniani gaudia do oi abia, bona boubou patana dekenai do oi gabua, unai idia gabua vadaeni vamu boubou gauna danu. Inai ibounai be do umui gabua hebou, bona bonana namo herea lau Lohiabada egu vairana dekenai do ia lao.

²⁶“Vadaeni oi ese Arona ia hahelagaia mamoe ena kemena do oi abia, bona lau Lohiabada egu vairana dekenai do oi davea, lau dekenai oi henia ena toana. Oi ese inai kemena vamuna do oi ania diba.

²⁷“Hahelagaia taudia do oi hahelagaia neganai, oi ese mamoe ena kemena bona mamuna ena vamu do oi abia, boubou do oi halaoa, bona lau Lohiabada egu vairanai do oi davea. Bona inai murinai inai vamu be hahelagaia taudia dekenai do oi henia, do idia ania.

²⁸Vadaeni lau Lohiabada lau gwau, ‘Israela taudia ese edia laloa namona boubou lau dekenai idia henia negadia ibounai, inai kemena bona mamuna ena vamu be hahelagaia taudia ese do idia ania.’

²⁹“Arona be do ia mase neganai, iena dabua helagadia be iena natuna tau dekenai do idia henia. Bona Arona murinai, iena tubuna taudia be hahelagaia taudia edia gaukara totona idia hahelagaia neganai, inai Arona ena dabua do idia atoa.

³⁰Arona ena natuna, Arona ena hahelagaia gaukara ena gabu ia abia tauna ese inai dabua be dina 7 lalonai do ia atodia. Bona inai dina 7 lalonai, ia ese egu Palai Dubu lalonai do ia raka vareai, bona gaukara helaga be Helaga Herea Gabuna dekenai do ia karaia.

³¹“Arona mai ena natuna tau oi hahelagaia neganai, unai mamoe, boubou gauna, be helaga gabuna ta dekenai do oi nadua.

³²Vadaeni Arona, mai ena natuna tau ese unai vamu bona bosea lalonai idia noho paraoa gaudia danu do idia ania, Palai Dubu ena iduara badibadinai.

³³“Inai hahelagaia taudia oi hahelagaia neganai, boubou oi henia aniani gaudia, kara dika kokia totona gaudia, be do idia ania. Hahelagaia taudia sibona ese inai aniani idia ania diba, badina idia helaga. Taunimanima kavakava do idia ania lasi.

³⁴Bema inai vamu bona beredi be idia ania ore lasi ela bona dabai, inai be do idia ania lasi. Inai vamu be ia helaga. Unai dainai lahi dekenai do idia gabua ore momokani.

³⁵“Dina 7 lalonai, inai Arona mai ena natuna tau oi hahelagaia gaukara do oi karaia, lauegu oda hegeregerena momokani.

³⁶Dina ta ta ibounai oi ese boromakau boubouna do oi henia, kara dika kokia totona. Vadaeni inai boubou ese boubou patana do ia hagoevaia lauegu vairana dekenai. Unai murinai boubou patana dekenai olive dehoro do oi bubua, do ia helaga totona.

³⁷Oi ese boubou patana dekenai inai bamona do oi karaia dina 7 lalonai. Vadaeni boubou patana be lauegu momokani, bona taunimanima dekenai do ia helaga momokani, vadaeni bema tau ta o hahine ta, o gau ta be ia dekenai ia kamokau neganai, inai helaga ena siahu ese do ia hadikaia.

³⁸“Dina ibounai umui ese mamoe natuna rua, lagani ta hanaia lasi gaudia, be boubou patana dekenai do umui gabua, boubou totona.

³⁹Ta be dabai do umui gabua, ta be adorahi neganai do umui gabua.

⁴⁰Mamoe ginigunana danu be uiti ena paraoa namona, ena metau kilogaram ta, olive dehoro lita ta danu ia mikisi gauna do umui gabua, boubou totona. Uaina lita ta danu do umui bubua, boubou totona.

⁴¹“Adorahi neganai mamoe iharuana be do umui gabua, bona dabai umui gabua mamoe danu umui henia paraoa, dehoro bona uaina edia bada hegeregerena ma do umui henia unai adorahi boubou totona. Inai aniani boubouna, lau Lohiabada dekenai umui henia gauna ena bonana namona lau kamonai neganai, be do lau moale.

⁴²“Inai lahi dekenai idia gabua boubou be vaira neganai ibounai doko lasi do umui karaia Palai Ruma ena iduara badibadinai, lau Lohiabada egu vairana dekenai. Inai gabu dekenai lau ese umui, lauegu bese danu do lau hedavari, bona umui dekenai do lau hereva.

⁴³Unuseni lau ese Israela taudia dekenai do lau hedinarai, bona lauegu hairaina ese inai gabu do ia hahelagaia.

⁴⁴“Vadaeni lau ese Palai Dubu bona boubou patana do lau hahelagaia, bona Arona mai ena natuna tau danu be do lau hahelagaia, hahelagaia taudia edia gaukara totona,

⁴⁵Lau be Israela taudia edia huanai do lau noho, bona lau be edia Dirava do lau lao.

⁴⁶Idia be do idia diba lau be Lohiabada, edia Dirava. Aigupito dekena amo be lau ese idia lau hakaua, idia edia huanai do lau noho totona. Lau inai Lohiabada, idia edia Dirava.