Read Buka Helaga (Hiri Motu) 1993 ESODO 3 Bible Online

ESODO 3 - Buka Helaga (Hiri Motu) 1993 bible

ESODO 3

¹Mose ese iena ravana Ietero, Midiana ena hahelagaia tauna ena mamoe bona nani ia naria. Ia ese mamoe ia hakaudia lao taunimanima idia noho lasi gabuna, dina ia diho kahana dekenai. Dirava ena ororo ena ladana Sinai dekenai ia lao.

²Vadaeni Lohiabada ena aneru ese Mose dekenai ia hedinaraia, lahi ia araia dekena amo. Lahi be au ginigini dekenai, Mose ese ia itaia. Au dekenai lahi ia noho, to lahi ese au ia gabua ore lasi.

³Vadaeni Mose ia gwau, “Do lau raka siri, inai kara be ia idau, dohore lau itaia, au ginigini be edena bamona lahi ese ia gabua ore lasi.”

⁴Dirava ese Mose ia itaia, ia mai kahirakahira. Vadaeni Dirava ese au ginigini dekena amo ia boiboi Mose dekenai, ia gwau, “Mose e, Mose e.” Ia haere, ia gwau, “Lau inai.”

⁵Dirava ia gwau, “Oi mai kahira-kahira lasi. Oiemu tamaka danu oiemu aena dekena amo oi kokia, badina be oi gini noho gabuna, inai tano be ia helaga.”

⁶Ma ia gwau, “Lau be oiemu tamana ena Dirava, Aberahamo ena Dirava, Isako ena Dirava, Iakobo ena Dirava.” Vadaeni Mose ese iena vairana ia koua, Dirava do ia itaia garina.

⁷Lohiabada ma ia gwau, “Momokani, lauegu bese taudia edia hisihisi Aigupito dekenai lau itaia vadaeni. Edia biagudia ese hekwarahi idia henidia noho dainai idia taitai, be lau kamonai vadaeni, badina be edia hisihisi lau diba vadaeni.

⁸Lau diho mai inai, Aigupito taudia edia imana dekena amo do lau hamauridia totona. Unai tano dekena amo dohore lau hakaudia, ia lao bona tano namo herea dekenai. Tano badana dekenai dohore idia ginidae. Unai tano be aniani namodia gabuna, Kanana taudia edia tano unai, Hiti taudia edia, bona Amoro taudia edia, bona Perisi taudia edia, bona Hivi taudia edia, bona Iebusu taudia edia.

⁹“Momokani, Israela taudia edia taitai be lau dekenai ia mai vadaeni. Bona Aigupito taudia ese hisihisi kara ibounai idia henia, lau itaia vadaeni.

¹⁰Oi mai, dohore lau siaia oi Farao dekenai, lauegu bese taudia Israela be Aigupito dekena amo dohore oi hakaudia siri totona.”

¹¹Vadaeni Mose ia haere Dirava dekenai, ia gwau, “Lau be daika, dohore Farao dekenai lau lao, bona Israela taudia Aigupito dekena amo do lau hakaua siri?”

¹²Dirava ma ia gwau, “Momokani, dohore lau durua oi, bona lau siaia oi ena toana be inai: Oi ese Israela taudia Aigupito tano dekena amo do oi hakaua siri murinai, inai ororo Sinai dekenai Dirava do umui tomadiho henia.”

¹³Vadaeni Mose ma ia hereva lou Dirava dekenai, ia gwau, “Lau be dohore lau lao Israela taudia dekenai. Do lau hamaoroa idia dekenai, lau gwau, ‘Umui emui tamadia ena Dirava ese lau ia siaia umui dekenai,’ vadaeni dohore idia henanadaia lau dekenai, idia gwau, ‘Iena ladana be daika?’ Lau be edena bamona dohore lau haere idia dekenai?”

¹⁴Vadaeni Dirava ese Mose dekenai ia hamaoroa, ia gwau, “LAU INAI LAU NOHO.” Ma ia gwau, “Israela taudia dekenai inai bamona do oi haere henia, oi gwau, ‘LAU NOHO ese ia siaia lau umui dekenai.’ ”

¹⁵Dirava ia hereva lou Mose dekenai, ia gwau, “Israela taudia dekenai dohore oi hamaoroa, oi gwau, ‘Lohiabada, umui emui sene taudia edia Dirava, Aberahamo ena Dirava, Isako ena Dirava, Iakobo ena Dirava ese ia siaia lau umui dekenai.’ Lauegu ladana be inai, ia lao hanaihanai, gabeai ia mai nega ibounai lalonai inai bamona lauegu ladana dohore umui gwauraia.

¹⁶Oi lao, Israela tau badadia dohore oi haboua. Dohore oi hereva idia dekenai, oi gwau, ‘Lohiabada, umui emui sene taudia edia Dirava, Aberahamo ena Dirava, Isako ena Dirava, Iakobo ena Dirava ia hedinarai henia vadaeni lau dekenai, ia gwau: Momokani, lau ese umui lau itaia vadaeni, Aigupito dekenai kara ibounai idia karaia noho umui dekenai, be lau itaia vadaeni.

¹⁷Lau gwauhamata vadaeni, Aigupito ena hisihisi dekena amo umui do lau hakaua siri, Kanana taudia bona Hiti taudia, bona Amoro taudia, bona Perisi taudia, bona Hivi taudia, bona Iebusu taudia edia tano dekenai umui dohore lau hakaua vareai. Inai tano be aniani namodia gabuna.’

¹⁸“Vadaeni Israela taudia be oiemu hereva do idia kamonai. Vadaeni oi bona Israela ena tau badadia danu Aigupito ena king dekenai dohore umui lao, do umui gwau, ‘Lohiabada, Heberu taudia aiemai Dirava ia hedinarai vadaeni ai dekenai. Unai dainai ai ura, dina toi dohore ai laolao taunimanima idia noho lasi tanona dekenai, mani emu kara aiemai dala do oi kehoa. Badina be unuseni, ai ese Lohiabada aiemai Dirava dohore ai hanamoa, boubou gaudia do ai henia ia dekenai.’

¹⁹“To lau diba, Aigupito ena king be umui emui dala do ia kehoa diba lasi, ia lao bona lauegu imana ena metau ena mamina do ia abia.

²⁰Unai dainai, lauegu siahu do lau gaukaralaia, bona lauegu hoa kara dekena amo, Aigupito taudia edia kerere davana do lau henia. Unai murinai, vadaeni umui emui dala do ia kehoa.

²¹“To lauegu bese taudia dohore lau hanamodia Aigupito taudia edia vairana dekenai, vadaeni umui raka siri neganai ima kavakava danu do umui lao lasi.

²²Badina be hahine taudia ta ta ese edia badibadina dekenai Aigupito hahine taudia bona edia ruma dekenai noho Aigupito hahine dekenai do idia noinoi karaia. Siliva herahera bona golo herahera bona dabua dohore idia noinoi. Vadaeni unai gaudia be umui emui natudia hahine bona tatau dekenai do umui atoa. Inai dala dekenai Aigupito taudia edia kohu namodia momo dohore umui kokia idia dekena amo.”