Read Buka Helaga (Hiri Motu) 1993 ESODO 33 Bible Online

ESODO 33 - Buka Helaga (Hiri Motu) 1993 bible

ESODO 33

¹Lohiabada ese Mose ia hamaoroa, ia gwau, “Inai gabu dekena amo do oi raka lao, oi bona Aigupito dekena amo oi hakaudia taudia. Bona umui dekenai lau gwauhamata henia tano dekenai do umui lao. Aberahamo bona Isako bona Iakobo dekenai lau gwauhamata henidia tanona be unai. Lau hamaorodia, lau gwau, ‘Unai tano be emui tubudia dekenai do lau henia.’

²Aneru ta umui emui vairana dekenai do lau siaia, bona Kanana taudia, bona Amoro taudia, bona Hiti taudia bona Perisi taudia bona Hivi taudia bona Iebusu taudia do lau lulua, bona kokia.

³Umui be tano namo herea ta dekenai do umui lao, unai tano ese kohu bona aniani namodia momo do ia havaraia. To umui be hekokoroku taudia dainai, lau ese umui do lau bamoa lasi, dala dekenai umui do lau hadikaia ore garina.”

⁴Inai Dirava ena hereva be Mose ese ia hadibadia neganai, Israela taudia be edia lalona idia hisihisi. Edia herahera gaudia be edia kopina dekenai idia atoa lou lasi.

⁵Badina be Lohiabada ese Mose ia hamaoroa vadaeni, ia gwau, “Israela taudia do oi hamaorodia, do oi gwau, ‘Umui be hekokoroku taudia. Bema nega sisina sibona umui do lau bamoa neganai, lau ese umui do lau hadikaia ore. Unai dainai emui herahera gaudia do umui kokia, vadaeni lauegu kara, umui dekenai do lau karaia gauna, be do lau laloa.’ ”

⁶Unai dainai Israela taudia ese Sinai Ororo idia rakatania neganai, herahera gaudia edia kopina dekenai idia atoa lou lasi.

⁷Mose ena kara be inai bamona: Israela taudia ese kamepa idia haginia negadia ibounai, Mose ese Palai Ruma be kamepa ena murimurina dekenai ia haginia. Bona unai Palai Ruma ena ladana be, Lohiabada ia noho Palai Rumana. Vadaeni tau ta bema Lohiabada ena ura ia ura diba neganai, ia ese unai Palai Ruma dekenai ia lao diba.

⁸To Mose be unai Lohiabada ena Palai Ruma dekenai ia lao negadia ibounai, taunimanima ibounai idia toreisi, edia palai rumadia ta ta edia iduara dekenai idia gini, Mose idia itaia noho, ia raka vareai.

⁹Badina be Mose be unai Palai Ruma ia raka vareai negadia ibounai, ori ta ia diho, Palai Ruma ena iduara dekenai ia gini, bona Lohiabada ese unai ori ena lalona dekena amo Mose dekenai ia hereva henia.

¹⁰Kamepa taudia ese unai ori be Palai Ruma ena iduara dekenai idia itaia neganai, idia ta ta edia palai ruma iduara ta ta dekenai idia gini, edia kwarana idia atoa diho.

¹¹Lohiabada ese Mose ia hereva henia, tau ta ese iena turana ia hereva henia bamona. Ruaosi edia hereva ia ore neganai, Mose be kamepa dekenai ia giroa lou. To Mose ena durua tauna, ena ladana Iosua Nunu, eregabe tauna ta, be unai Palai Ruma ia rakatania lasi.

¹²Mose ese Lohiabada dekenai ia hereva, ia gwau, “Mani oi laloa, lau oi hamaoroa vadaeni, oi gwau, ‘Inai taunimanima do oi hakaua lao.’ To daika tauna do oi siaia, ia ese lau do ia bamoa, be lau do oi hamaoroa lasi. Ma lau oi hamaoroa vadaeni, oi gwau, ‘Oiemu kara lau diba namonamo, bona oi lau ura henia.’

¹³Vadaeni bema oi ura henia lau, lau ura oiemu palani be lau dekenai mani do oi hadibaia. Unai neganai oi do lau diba, bona oiemu ura be nega ibounai do lau karaia. Bona mani emu kara, lau ura oi laloa noho, inai bese be oi abia hidi vadaeni, oiemu bese korikori.”

¹⁴Lohiabada ia gwau, “Lau ese oi do lau bamoa, bona kwalimu oi dekenai do lau henia.”

¹⁵Mose ia haere, ia gwau, “Bema oi ese ai do oi bamoa lasi, mani emu kara inai gabu dekena amo ai do oi siaia lasi.

¹⁶Bema oi ese ai do oi bamoa lasi neganai, edena bamona idau bese taudia do idia diba oi ese lau bona oiemu orea taudia oi ura henia? To bema oi be ai danu ita lao neganai, idau bese taudia do idia diba namonamo, ai be bese idauna momokani, tanobada besedia ibounai edia huanai.”

¹⁷Vadaeni Lohiabada ese Mose dekenai ia haere, ia gwau, “Oiemu noinoi hegeregerena do lau karaia, badina be oiemu kara lau diba namonamo, bona oi lau ura henia.”

¹⁸Mose ese Lohiabada ma ia noia, ia gwau, “Mani emu kara oiemu hairaina ena diaridiari lau dekenai do oi hedinaraia.”

¹⁹Lohiabada ia haere, ia gwau, “Lauegu kara namona ibounai be oi dekenai do lau hedinaraia, bona lauegu ladana helagana, Lohiabada, be oiemu vairana dekenai do lau gwauraia. Kamonai, bema lau ura tau ta do lau bogahisihisi henia neganai, unai tau do lau bogahisihisi henia.

²⁰“To lauegu vairana be oi dekenai do lau hedinaraia lasi, badina be bema tau ta ese lauegu vairana ia itaia neganai, unai tau be do ia mase.”

²¹Lohiabada ma ia gwau, “Oi itaia, nadi badana ta lauegu badinai ia noho. Unai nadi ena latanai do oi gini.

²²Vadaeni lauegu hairaina ena diaridiari oi kahirakahira do ia raka hanaia neganai, lau ese nadi ena matuna ta lalonai oi do lau atoa vareai, bona egu imana dekenai inai matuna do lau koua, ela bona lau raka hanaia vadaeni.

²³Unai murinai lauegu imana do lau kokia, bona lauegu doruna sibona do oi itaia, to egu vairana do oi itaia lasi.”